भांगरभूंय | प्रतिनिधी
सैराटाक स वर्सां जालीं, पूण तरी लेगीत तो ताजो आनी जिवो दिसता. हांवें बरयल्लो ‘पिंडदान’ सिनेमा त्याच वर्सा प्रदर्शीत जालो. गोंय महोत्सवांत ‘पिंडदान’ दाखयतात, अशें हांवें मुंबयच्या म्हज्या एका अमराठी इश्टाक सांगलें. खरें तर म्हाका ह्या महोत्सवाक प्राॅडक्शनान आपोवंक नासलें. वचप काय ना तें कळनासलें. ‘सैराट आसा? सगले येतले? म्हणल्यार ती नायिका आर्ची?’ इश्टाचो प्रस्न.
हांव- ‘हय!’ हाचेर इश्टान म्हणलें ‘जायेंगे, तेरा पिक्चर है, थोडा इंप्रेशन गिरना मंगताय उधर’ ताणें आपल्या एका इश्टाची पंचवीस एक लाखाचे पाजेरो स्पोर्ट्स गाडयेची वेवस्था केली. म्हज्या आवडीच्या गोंयांत म्हजो सिनेमा प्रदर्शीत जाल्लो पळोवंक मेळटलो हाची म्हाका खोशी जाली.
कला अकादमींत ‘पिंडदान’ चो शो जालो. हांव हाजीर आसा हें मतींत घेवन आयोजक आमचो दिग्दर्शक आनी पंगडाचें अभिनंदन करताले. अचकीत म्हाका माचयेर आपयलो. गोंयकारांनी सिनेमा लेखकांक दिल्लो आदर पळोवन हांव खोशी जालों. ‘गोवा मराठी फिल्म फेस्टिवल’च्या आयोजकांनी ‘पिंडदान’च्या पंगडाची हॉटेलांत रावपाची वेवस्था केल्या’ असो संदेश मेळ्ळो, पूण हांवें इश्ट वाल्मिकी सिकेराच्या घरा रावप चड पसंत केलें.
वाल्मिकी हें आगळें व्यक्तीमत्व. आपल्या 200 वर्सांच्या आदल्या घरांत तो रावता. पोरसांतलीं चिकू, आंबे, पेराचीं झाडां, कावळे, चिमण्यो हांची काणी तो किर्तनकाराच्या थाटांत सांगता. केन्नाय दिसपी सोरपाक मात तो भियेता. कोंकण आनी गोंयांत आदल्या नागांक ‘राखणदार’ म्हणटात. हांव वाल्मिकीच्या पोरसांत दिसपी सोरपाक ‘नागराज’ म्हणटां. वाल्मिकीक हाची संवय जाल्या. नागराजाच्या ‘सैराट’ सिनेमान 100 कोटीं वयर वेवसाय केला, अशें हांवें ताका सांगतकच, ‘तो पोरण्यां नागीन सिनेमा परस बरो आसा?’, अशें ताणें विचारलें. काजोल, आरडी बर्मनाची चार पदां आनी पोपटलालाची भुमिका करपी राजेंद्रनाथ इतलेंच ताचें सिनेमाचें ज्ञान. ‘हांवें तियात्रांत काम केलां, म्हाका एक फावट तुज्या सिनेमांत काम दी मरे’, अशें तो म्हणटा आनी हांव सांगता ‘हाँ, नागराज की स्टायलमें मै भी कुछ करना चाहता हूँ’. हे जापेचो अर्थ वाल्मिकीक कळना.
खरें तर नागराज मंजुळे म्हणटा, ‘सरभोंवतणचे सामान्य लोक वेगळेच आसतात. ते राजा आसतात. फक्त तांचे कडेन शिंवासन नासता. तांकां छापप गरजेचें.’ मनशाच्या जिवेंपणाचें नागराज एक प्रकारान डाॅक्युमेंटेशन करतात. सत्यजीत रे हेवूय अशेंच करताले. हौशी कलाकारांक वा जांकां मात्तूय अभिनय कळना तांकां कॅमेऱ्या मुखार उबे करताले. तांचे सिनेमा कलात्मक आशिल्ले, पूण नागराज हो प्रयोग वेवसायिक सिनेमांनीय करता. गांवगिऱ्या वाठारांतल्या सिनेमा करपाक सोदपी पूण अर्थीक फाटबळ नाशिल्ल्या तरणाट्यांक नागराज हांणी वाट दाखयल्या.
मराठी वेवसायीक सिनेमाक नागराज मंजुळे यशाचीं नवीं सोंपणां चडयत आसा, हें खूब आशादायक चित्र. वाल्मिकी सिकेराक जर हांवें ‘नागराज बरो मनीस मरे’ अशें म्हणलें जाल्यार ताका नेमकें कितें तें कळचें ना. पूण ‘नागराज राखणदार आसा’ अशें सांगल्यार ताचेर ताचें दुमत आसचें ना.
अविनाश भानु आशा घोडके
9892166366
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
