नागपूर विज्ञान शिक्षण संस्थे वतीनविजयकुमार वेरेकाराचो भोवमान

भांगरभूंय | प्रतिनिधी

भांगरभूंय । प्रतिनिधी
केरी-सत्तरीः नागपूरच्या विज्ञान शिक्षण संस्थेन ताचे रुप्या महोत्सवी वर्सा निमतान आयोजीत केल्ले कार्यावळींत विद्यार्थ्यांक गमती- जमती वरवीं विज्ञान विशय शिकोवपी ज्येश्ठ शिक्षक विजयकुमार वेरेकार हांचो भोवमान केलो. भारत सरकाराच्या विज्ञान प्रसार संस्थेचो संचालक डॉ नकुल पराशर हांचे हस्तुकीं ताका पुरस्कार भेटयलो.
नागपूरच्या अपूर्व विज्ञान मेळाव्या खातीर निवड केल्ले विजयकुमार वेरेकार हें गोंयांतले एकूच शिक्षक आशिल्ले.  विज्ञान शिक्षक सुरेश अगरवाल नागपूरांत विज्ञान मेळावो आयोजीत करतात. अदूं रुप्या महोत्सवाक लागून देशांतल्या 40 विज्ञान शिक्षकांची निवड करून तांचो भोवमान केलो. वेरेकार हे 24 वर्सां सावन विद्यार्थ्यांक विज्ञान विशयांत मार्गदर्शन करतात. आतां मेरेन तांणी गोंयांत 50 सुवातांन विज्ञान प्रयोग करून विद्यार्थ्यां मदीं विज्ञान विशयाची आवड तयार केल्या. साखळेच्या प्रोग्रेस हायस्कुलांत सहाय्यक मुख्याध्यापक पदाचेर काम करून ते निवृत्त जाले. तांका जायते पुरस्कार फावो जाल्यात. तांणी ‘छोटा सायन्सस्टित’ हें इंग्लिशींतल्यान आनी ‘हांसत खेळत विज्ञान’ हें कोंकणीतल्या 60 प्रयोगांचे पुस्तक प्रकाशीत केलां. विद्या भारतीन ह्या पुस्तकाचे मराणी, हिंदी, गुजराती आनी हेर भाशांतल्या आवृत्ती काडल्यात. वेरेकार हांका हाचे पयलीं केंद्रीय विज्ञान आनी तंत्रज्ञान मंत्रालयाचो दोन लाख रुपयांचो पुरस्कार फावो जाला. गोंय सरकाराचो आदर्श शिक्षक हो पुरस्कार तांकां फावो जाला.