भांगरभूंय | प्रतिनिधी
पेडणें : मनोहर आंतरराष्ट्रीय विमानतळ मोपा नागझर हांगचो लिंक रस्तो तयार जाल्ल्यान चडांत चड येरादारी हांगच्यान चालू जाल्यात. हाका लागून नागझर जंक्शना कडेन आदीं घातिल्ल्या ट्राफीक सिग्नलाचे वेळेंत बदल करचे, अशी लोकांची मागणी आसा.
मोपा विमानतळावेलो लिंक रस्तो सुरू जाल्ल्यान आतां मोपा विमानतळावेल्यो टॅक्सी वा हेर येरादारी नागझरच्यान उणी जाल्या. हाका लागून मोपा विमानतळ ते सुकेकुळण मार्गावेली लायटीचीं सिग्नलां चड वेळ दवरिल्ल्यान हेर मार्गांचेर गाडयांच्यो रांको लागतात. कारण जंय गाडयांची यो-वच उणी आसा थंय लायट सिग्नल चड वेळ आसा आनी चड गाडयो सुरू आसा थंय लायट सिग्नलाचो वेळे उणो आसा. हाका लागून म्हापशें मर्गान येवपी लोकल बसी, ट्रक आनी चांदेलच्यान वचपी गाडयांची रांक लागता. हाका लागून बँक, हॉटेलां आनी सरकारी स्कूल लागीं आशिल्ल्यान गाडयांचो आवाज आनी भुरग्यां हाडपा व्हरपाक शिक्षकांक आनी पालकांक हाचो खूब त्रास सोंसचो पडटा.
हाका लागून उदय महाले हांणी लोकांच्या वतीन आनी लोकांच्या मागण्यां प्रमाण, हें निवेदन ट्राफिक पुलीस, इन्स्पेक्टर, पुलीस स्टेशन मोपा हांकां लेखी स्वरूपांत दिवनूय ताची अंमलबजावणी जावंक ना.
नागझर जंक्शनाचेर लायट सिग्नल आसा. मात रस्त्यार धांवपी गाडयांच्या वेळा प्रमाण तें सिग्नल सारकें नाशिल्ल्यान ते कोण सारकें पाळिनात. त्या सिग्नला कडेन पुलीस आसल्यार गाडयांची गर्दी जाली काय ताकाय नियंत्रणांत हाडप खूब कठीण जाता. तेन्ना ह्या जंक्शनाचेर केन्ना अपघात जायत हें सांगूं येना.
तेन्ना या ट्रॅफीक सिग्नलाच्या वेळार पीडब्ल्यूडी आनी ट्राफिक पुलीस अधिकार्यांनी मेळून बेगीनूच बदल करून लोकांची समस्या पयस करची अशी मागणी उदय महाले हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
