भांगरभूंय | प्रतिनिधी
दूद उत्पादन वाडोवपाक 195 कोटी खर्च, वाड मात 7,787 लिटरूच
भांगरभूंय । प्रतिनिधी
पणजीः गोंयांतलें दूद उत्पादन वाडोवपा खातीर गोंय सरकारान विवीध येवजण्यांच्या माध्यमांतल्यान चार वर्सांत शेतकारांचेर 195.17 कोटी मोडले. पूण ह्या चार वर्सांत दुदाचें उत्पादन फक्त 7.787 लिटरानूच वाडिल्ल्याचें पशुपालन आनी पशुसंवर्धन खात्याचे नंत्री नीळकंठ हळर्णकार हांणी विधानसभेंत लेखी प्रस्नाक दिल्ले जापेंतले आकडेवारींतल्यान मुखार आयलां.
आमदार डॉ. चंद्रकांत शेट्ये हांणी हे विशींचो प्रस्न विचारिल्लो. गोंयांत सध्या दुदाचें कितलें उत्पादन जाता आनी कितलें दूद भायल्यान येता?
ह्या प्रस्नाक जाप दितना हळर्णकार हांणी सांगलें, गोंयात सध्या दिसाक 1.76 लाख लिटर दुदाचें उत्पादन जाता. गोवा डॅरी कडल्यान दिसाक 13,676 लिटर जाल्यार सुमुला कडल्यान 89,597 लिटर दुदाची आयात करतात.
मुख्यमंत्री सुदारीत कामधेनू येवजणेचे अंमलबजावणी उपरांत खात्यान कितल्या शेतकारांक कितल्यो गायी दिल्यात, असोय प्रस्न आमदार डॉ. शेट्ये हांणी विचारिल्लो.
2021- 22 त 300 शेतकारांक 1,739, 2022- 23 त 149 शेतकारांक 729 आनी 2023- 24 त 21 शेतकारांक 137 गायी दिल्ल्यो, अशें मंत्र्यान म्हणलां. मजगतीं, गोंयांतलें दूद उत्पादन वाडोवपा खातीर पशुपालन आनी पशुसंवर्धन खात्या कडल्यान मुख्यमंत्री सुदारीत कामधेनू, सामुहीक डॅरी फार्मींग, पशुपालन, डॅरी साधनसुविधा अनुसुचीत जाती- जमातींतले दूद उत्पादक शेतकारांक अर्थीक आदार, उण्या कळंतरान रीण हे सारक्यो येवजण्यो चालीक लायल्यात, अशेंय मंत्री हळर्णकार हांणी स्पश्ट केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
