भांगरभूंय | प्रतिनिधी
ईव्ही बशींची येणावळ उणी, खर्च चडः विधानसभेंत म्हायती
पणजीः ‘नाका परस मोती जड’ ही गत कदंब येरादारी म्हामंडळाच्या ईव्ही बशींची जाल्या.
ईव्ही बशींतल्यान कोटींची येणावळ येता ही खरी गजाल, पूण ते सगळे येणावळी वांगडाच अतिरिक्त पयशे ईव्ही बशी चलोवपी खाजगी प्लेअर्सांक दिवची पडटा. ते खातीर हे ईव्ही बशी बाबतींत म्हामंडळ 24.47 कोटींच्या लुकसाणेंत गेलां, अशी म्हायती येरादारी खात्यान दिल्या.
ईव्ही बशीं वरवीं कदंब म्हामंडळाक कितली येणावळ येता आनी तातूंतले कितले पयशे ही बसी चलोवपी खाजगी कंपनीचेर मोडटा, हाची म्हायती येरादारी खात्यान विधानसभेच्या पटलार दिली.
कदंब म्हामंडळाचे ड्रायव्हर ह्यो ईव्ही बशी चलयनात. ह्यो बशी चलोवपा खातीर आनी वेवस्थापन करपा खातीर म्हामंडळान त्यो ईव्ही ट्रान्स प्रायव्हेट लिमिटेडाक दिल्यात. फाटल्या चार वर्सांत ईव्ही बशींचे तिकेटींचेर कदंब म्हामंडळान 40.78 कोटी रुपया जोडले. जाल्यार ह्याच काळांत कदंबा म्हामंडळान 65.25 कोटी रुपया खाजगी कंत्राटदाराचेर खर्च केल्यात. ही सगळी येणावळ कंत्राटाराच्या बोल्सांत घातलीच, ते भायर अतिरिक्त 24 कोटी रुपया म्हामंडळान आपल्या बोल्सांतले मोडल्यात.
अर्थीक वर्स 2021-22 त येळावळ 3.91 कोटी रुपया आसली आनी 2.47 कोटी रुपया कंत्राटदाराक दिल्ले, 2022- 23 त 13.60 कोटी रुपयांची येणावळ आसली आनी 29.12 कोटी रुपया कंत्राटदारांक दिल्ले. 2023-24 त 18.51 कोटी रुपया येणावळ आसली आनी 26.70 कोटी रुपया कंत्राटदाराक दिल्ले. जाल्यार अंदूं जून 2024 मेरेन 4.76 कोटी रुपया इतली येणावळ कदंब म्हमंडळाक मेळ्ळ्या, पूण 6.96 कोटी रुपया कंत्राटदाराक दिल्यात. अर्थीक वर्स 2023-2024 आनी 2024-2025 च्या खर्चाचें ऑडीट जावंक ना, अशें खात्यान सांगलां. ईव्ही ट्रान्स प्रायव्हेट लिमिटेडाक म्हामंडळा खातीर ईव्ही बशी घेवपाची जापसालदारकी दिल्या. ती नोव्हेंबर मेरेन 9 मिटर लांबायेच्यो 100 बसी दिवपाचे आशिल्लेस पूण फक्त 100 तल्यो फक्त पांचूच बशी मेळ्ळ्यात. उरिल्ल्यो बशी नोव्हेंबर 2024 त मेळटल्यो. ते भायर कदंब म्हामंडळाचे स्वताचें चार्जींग स्टेशन ना. गोंयांत फक्त दोन चार्जींग स्टेशनां खाजगी ऑपरेटर चलयतात. एक मडगांवां कदंब बस डेपो आनी दुसरें कांपाल फुटबॉल ग्रांवडाचेर आसा. ते भायर ईव्ही ट्रान्स प्रायव्हेट लिमिटेड पणजे आनी वायग्राब सीटी बस ऑपरेशन प्रायव्हेट लिमिटेड पर्वरे कदंब डेपोचेर चार्जींग सुविधा उबारतात, अशी जाप खात्यान दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
