नांव बदलपाच्या अलीसाबाच्या अर्जाक थळाव्यान घेतली हरकत

भांगरभूंय | प्रतिनिधी

नांव बदलपा फाटलो हेत तपासपाची केली मागणी

पणजी : गोंयांत अलीसाब अलगुंंडी हें नांव बदलून सुजल गांवकार हें नांव धारण करपा विशींची नोटीस व्हायरल जायत आसा. कनिश्ट दिवाणी न्यायाधिशा मुखार ह्या अर्जाक थळाव्यान हरकत घेतल्या. नांव बदलपा फाटलो हेत तपासपा सयत नांव बदलप गरजेचें अासा काय कितें? हाची तपासणी करपाची मागणी ताणें केल्या.

अलीसाब अलगुंंडी हें नांव बदलून सुजल गांवकार अशें नांव घेवपा खातीर न्यायालयांत अर्ज केला. अर्जदाराचें मूळ नांव पळयत जाल्यार तो गोंंयकार ना हें दिसून येता. गांवकार हें आडनांव जाले उपरांंत लोक ताका गोंंयकार म्हूण समजतले. गांवकार ह्या आडनांवाचे खूबशे जाण गोंंयांत आसात. ह्या लोकांं मदीं गैरसमज पातळपाची भिरांंत आसा. तशेंच ह्या नांवाचो वापर तो येवजणे खातीर करपाची शक्यताय आसा. नांव बदलपाचो ताचो हेत तशेंच ताच्या पयलींच्या इतिहासाची खोलायेन चवकशी करची. ताचो अर्ज भायरावचो अशी मागणी हरकतीच्या अर्जांत आसा.

गोंंयांंत नांव बदलपा खातीर दोन दिसांतल्यान एक अर्ज येता. नांव बदलपाच्या कायद्यांत दुरुस्ती करून अधिकार न्यायपालिके कडेन दिले उपरांंत लेगीत नांव बदलपाच्या अर्जांचे प्रमाण उणें जावंक ना.

गोंंय नांव आनी आडनांव बदलपाच्या कायद्या प्रमाण पयलीं सीव्हील रजिस्ट्रराक नांवां बदलपाचो अधिकार आशिल्लो. नांव आनी आडनांव बदलपाच्या कायद्याचो गैरवापर जाता. येवजणेचो लाव घेवपा खातीर गैर हेतान खूबशे जाण नांव वा आडनांव बदलतात, अश्यो कागाळी येवपाक लागल्यो. विधानसभेंत लेगीत हाचेर चर्चा जाल्या. गैरवेव्हारांक आळाबंंद घालपा खातीर सरकारान 2022 वर्सा गोंंय नांव आनी आडनांव बदल कायद्यांत दुरुस्ती केली. सिव्हील रजिस्ट्रार कडेन आशिल्लें नांव बदलपाचे अधिकार प्रथम वर्ग न्यायदंंडाधिकाऱ्यांं कडेन दिले. तशेंच गोंंयांत जल्म जाल्लो वा बापूय वा आवय गोंंयकार आशिल्ल्यांकूच नाव बदलपाची मेकळीक आसपाची तजवीज कायद्यांत केली. हाका लागून भायल्या मनशाक गोंंयांत नांव बदलपा खातीर अर्ज करपाक मेळना.

आतां नांव वा आडनांव बदलपाच्या अर्जांचेर न्यायालयां निर्णय घेतात. तांणी घेतिल्ल्या निर्णया प्रमाण कार्यवाही जाता. कायद्यांत बदल जावन लेगीत पयलींचें नांव बदलून गोंंयांंत परंंपरीक आशिल्लीं नांवां धारण करपाचे यत्न अजून सुरूच आसात.