भांगरभूंय | प्रतिनिधी
साबार देशांनी केलो काश्मीर हल्ल्याचो निशेध
पहलगाम, खबरां संस्था: जम्मू आनी काश्मीरांतल्या पहलगामांत जाल्ल्या आतंकवादी हल्ल्यांत २८७ जाणांक मरण आयलें. मंगळारा दनपरां सुमार २.४५ वरांचेर बैसारन व्हॅली वाठारांत ही घडणूक घडली. आतंकवाद्यांनी उत्तर प्रदेशांतल्या शुभम द्विवेदीचें नांव विचारलें आनी उपरांत तांचे तकलेर गुळी घाली. पहलगाम हल्ल्यांत दोन परदेशी आनी दोन थळाव्या आतंकवाद्यांचो आसपाव आशिल्ल्याचें गुपीत सुत्रांनी सांगलें.
एकेकट्याक नांव विचारून, कलमा म्हणून दाखय, अशें म्हणीत तांणी हेर लोकांचेर फारपेट केलो आनी ते थंयच्यान पळून गेले. लष्कर- ए- तैयबान ह्या हल्ल्याची जापसालदारकी स्विकारल्या. मरण आयिल्ल्यां मदीं उत्तर प्रदेश, गुजरात, महाराष्ट्र, कर्नाटक, तामिळनाडू आनी ओडिशांतल्या पर्यटकांचो आसपाव आसा. नेपाळांतलो एक पर्यटक आनी युएईचो एक पर्यटक आनी दोन थळाव्या नागरिकांचोय आसपाव आसा.
जम्मू- काश्मीरांत फाटलीं १० वर्सां सातत्यान हल्ले जायत आसा. चडशें जवानांक मरण आयलां. २०१९ च्या पुलवामा हल्ल्या उपरांत जम्मू आनी कश्मिरांतलो हो सगल्यांत व्हडलो हल्लो. उपरांत ४० सीआरपीएफ जवान शहीद जाले.
देशांनी केलो निशेध
हल्ल्याची म्हायती मेळटांच केंद्रीय गृहमंत्री अमित शहा हलगाम पावले. मजगतीं, सौदी अरेबियाच्या दोन दिसांच्या दौर्यार आशिल्ले प्रधानमंत्री मोदी बुधवारा सकाळीं आपलो दौरो अर्ध्यारूच सोडून भारतांत परतले. अमेरिका, इराण, रशिया, इटली, युएई आनी हेर देशांनी पहलगाम हल्ल्याचो निशेध केला. तांणी भारता वांगडा उबें रावपा विशीं उलयलां.
शुभमाचो काका सांगता
म्हजो पुतणयो शुभम आनी सून पहलगामूच गेल्लीं. आतंकवाद्यांनी शुभमाक ताचे बायले मुखार गुळयो घाल्यो. हाका लागून सुनेन आतंकवाद्यांक आपल्याकूय गुळयो घाल अशें सांगलें. हाचेर आतंकवाद्यांनी जाप दिली, ‘आमी तुका मारचे नात, तुवें हें सगलें वचून केंद्र सरकाराक सांगचें आनी म्हणूनच तुका जिवी सोडून वतात.’
आतंकवादी हल्ल्यांत मरण आयिल्ले शुभम हांचे काका, ज्योतिषी पंडित मनोज द्विवेदी हांणी सांगलें, जेन्ना ते तांचे सुने कडेन उलयताले तेन्ना तिणें तांका पुराय काणी सांगली. तांणी म्हणलें, जेन्ना भाव संजय कडेन उलयलों तेन्ना तो सामको भियेल्लो. शुभम हो मुळचो कानपुरचो. शुभम आनी ताची बायल, भाव संजय आनी वयनी सीमा हांचे सयत कुटुंबांतले ११ वांगडी जम्मू आनी काश्मीराक गेल्ले.
मंगळारा दनपरां चॅनेलाचेर बातम्यो पळयतना आमकां जम्मूंतल्या आतंकवादी हल्ल्याची म्हायती मेळ्ळी. हाचे उपरांत हांवें स्वता भाव संजयाक फोन केलो. ह्या वेळार तो खूब भियेल्लो आनी ताका सांगलें, आतंकवादी हल्लो जाला आनी तातूंत शुभम आडकला.
तो इतलो भियेल्लो, तो हे विशीं आनीक म्हायती दिवपाक पावूंक ना. कांय वेळानूच टिवीचेर हल्ल्याच्यो बातम्यो येवपाक लागल्यो. तो मेरेन कसलीच म्हायती नाशिल्ली. मात आमी परत भैया कडेन उलयले आनी तांणी आमकां सांगलें, शुभमाक गुळी लागल्या म्हणून. आनीक एक गजाल मुखार आयली, आतंकवाद्यांनी शुभमाक सांगलां, जर ताणें कलमाचें पठण केल्यार ताका सोडटले. उपरांत आतंकवाद्यांनी ताचे तकलेर फार करून ताका जिवो मारलो. हें सगलें पळोवन सून भियेली. ती कांयच उलोवपाचे स्थितींत नाशिल्ली.
पाकिस्तानाची प्रतिक्रिया
हे घडणुकेच्या कांय वरांनी पाकिस्तानान पयली प्रतिक्रिया दिली. हे घडणुके कडेन आमचो कांयच संबंद ना. आमी सगले तरेच्या आतंकवादाक न्हयकार दितात, अशें पाकिस्तानान स्पश्ट केलां. पहलगामांतल्या आतंकवादी हल्ल्या कडेन पाकिस्तानाचो कसलोच संबंद ना, अशें पाकिस्तानाचे संरक्षण मंत्री ख्वाजा आसिफ हांणी म्हणलें. इतलेंच न्हय, हो हल्लो भारतांतल्या केंद्र सरकारा आड आशिल्लो. मणिपूर, नागालँड सावन काश्मीर मेरेन अशांतताय आशिल्ल्यान ह्या हल्ल्याक देशांतली परिस्थितीच जापसालदार आसा, अशी टिका तांणी केली.
आमी खंयच्याय स्वरुपांत आतंकवाद्यांचें समर्थन करिनात. थळावे लोक आतंकवाद्याचें लक्ष्य आसपाक जायना. आमचे हे भुमिके विशीं आमकां कसलेच तरेचो दुबाव ना. मात जर थळाव्या पांवड्यार भारत सरकाराक लोक लक्ष्य करता जाल्यार पाकिस्तानाक लक्ष्य करप सोपें आशिल्लें, अशेंय आसिफ हांणी म्हणलें. पाकिस्तानाच्या परराष्ट्र मंत्रालयाच्या प्रवक्त्यांनी दहशतवादी हल्ल्यांत मरण आयिल्ल्यांच्या कुटुंबीयां विशीं शोकसंवेदनाय उक्तायल्यो.
‘इंडिया टुडे’न दिल्ल्या वृत्ता प्रमाण, पाकिस्तानची दहशतवादी संघटणा लष्कर-ए-तैयबाचो वरीश्ठ कमांडर सैफुल्लाह कसुरी ऊर्फ खालिद हो पहलगामांत दहशतवादी हल्ल्याचो सुत्रधार आशिल्ल्याचें गुप्तचर यंत्रणांनी म्हणलां. सैफुल्लाह खालिद हो पाकिस्तानांतलो गुजरानवाला शारांतल्यान काम करता अशी म्हायती सुत्रांनी दिल्या.
थळाव्यांनी जीव वाटायलो
कर्नाटकच्या शिवमोग्गा जिल्ह्यांत रावपी मंजुनाथ हे ताची बायल पल्लवी आनी चल्या वांगडा जम्मू-काश्मीराक भोंवपाक आयिल्ले. ते पहलगाम भोंवतना हो आतंकवादी हल्लो जालो. ह्या हल्ल्यांत मंजुनाथ हांचेर आतंकवाद्यांनी गुळयो घाल्यो. पल्ववीन दिल्ले म्हायती प्रमाण, ते आतंकवादी फकत हिंदू लोकांक लक्ष्य करून तांचेर गुळयो घालताले. तांणी म्हज्या घोवाक मारले उपरांत हांवें आनी म्हज्या पुतान आतंकवाद्यांक सांगलें, तुमी म्हज्या घोवाक मारलो, आतां आमकांय मारात. ताचेर एका आतंकवाद्यान म्हाका सांगलें, हांव तुमकां मारचो ना. वचात आनी हें सगलें मोदींक सांगात. ह्या हल्ल्या उपरांत थळाव्यांनी आमकां मजत केली. थंयच्या तीन थळाव्या लोकांनी आमचो जीव वाटयलो, अशें तिणें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
