भांगरभूंय | प्रतिनिधी
नांवांत कितें आसा, गुलाबाक दुसरें नांव दिलें म्हूण ताचो परमळ ना जाता, असो प्रस्न करपी म्हान साहित्यीक शेक्सपियर आयज आशिल्लो जाल्यार आपलेच पोले फोडून घेवपाचो. कारण नांवांत खूब कितें आसा, हें आयच्या काळांत सिद्ध जालां. नाजाल्यार लोक ओगीच नांवां, आडनांवां बदलपाचे? आमच्या सुपुल्ल्या गोंयांत दर दोन दिसांनी नांव, आडनांव बदलपाचो एक तरी अर्ज येताच येता. फाटल्या पांच वर्सांत 915 अर्ज आयल्यात खंय. तिसवाडी, फोंड्यां सगल्यांत चड. वर्साक खंय नांव बदलाच्यो दोनश्यां वयर जायराती उजवाडाक येतात. मेळत ताणें नांव बदलचें न्हय म्हूण कायद्यांत सुदारणा केल्यात, मात अर्ज उणें जावंक नात. म्हणल्यार ह्या कायद्यांत पळवाट आसतली! नांव, आडनांव सोडात, धर्मूय बदलपाचे प्रकार वाडल्यात. शिवोले न्हय, तर सरकारी कार्यालयांनी वचून! कोण बदलतात हीं आडनांवा? कोण तांकां ती बदलून दितात? सरकारी कर्मचारी? लोकप्रतिनिधी?
सिव्हील रजिस्ट्रार पयलीं हीं बारश्याचीं कामां करताले. मात हे प्रक्रियेंत गैरप्रकार जातात, अश्यो कागाळी आयिल्ल्यान 2022 त नांव बदलपाचो कायदो मुदार केलो. आतां पयलो वर्ग न्यायदंडाधिकाऱ्याक हो अधिकार दिला. न्यायालयांत सुनावणीय बी जाता. गोंयांत जल्मल्यांक वा गोंयकार पालक आशिल्ल्यांकूच हो अधिकार आसा. पूण आडनांवां बदलप्यां मदीं चडशे भायलेच आसात, अशें लोक म्हणटात, तर अधिकारी सांगतात, ते सगले गोंयांत रावपीच! नायक, गोवेकार, गांवकार अशे चडशे बदल आडनांवांनी जाल्यात. आडनांव बदलपी कितलो तेंप गोंयांत रावतात, तें कोण तपासता? गोंयांत भायलो- भितरलो वाद आसा, ताचो त्रास फुडल्या पिळग्यांक जावचो न्हय, म्हूण हें नामांतर जाता व्हय? काय सरकारी येवजण्यो, सवलती, अनुदानां खातीर? जाती, जमाती, धर्माचेर आदारीत सवलती, आरक्षणाचो लाव घेवपाक? नांव बदलपाक येवप्यांक ‘हाका कोणाची हरकत आसा’, अशें विचारतात?
थळावे समाजवावुरपी, भंडारी समाज, आमदारांनी हे मुद्दे उखलून धरिल्ले. कायद्यांत बदलूय जाले. मागीर हें सटी, बारशे अजून कित्याक? अशीं नांवां, आडनांवां बदलत रावल्यार फाल्यां सरकारा कडल्यान थळाव्यांक मेळटा ते सगले फायदे नामांतर करप्यांक मेळटले, सरकारी नोकऱ्यो मेळटल्यो. हो गोंयच्या तरणाट्यांचेर अन्याय. मालमत्ता, जमनीचे वेव्हार सोंपेपणी करपाक मेळटले. जाती, धर्माच्यो सवलती मेळटल्यो. आमचेच ते अशें समजून कोण चवकशीय करचो ना. आडनांवां बदलिल्ल्यान गोंयची वळख बदलतली. संस्कृतायेक धपको बसतलो. आडनांव सहज बदलून मेळटा, अशें फां फूं जायत जाल्यार फाल्यां भायल्यांची हांगा रीग लागतली. आडनांवां वयल्यान सोयरीक केली आनी मागीर खरें कितें तें कळ्ळें जाल्यार मानसीक ताण, तणाव वाडटले. देखून हाचेर आतां सावनूच खर बंधनां घालपाक जाय. जांचो आजो वा आजी गोंयकार तांकांच ही सवलत दिवं येता वा हेर कितें उपाय घेवं येतात. आडनांव बदलचे पयलीं थळावे ग्रामसभेंत वा पालिकेचे बसकेंत ताचेर चर्चा जावंक जाय. आडनांव बदलपाचो हेतू लेखी बरोवन घेवंक जाय. न्यायाधिशाची परवानगी आसले बगर नामांतर जावंक फावना. बेकायदेशीर पद्दतीन आडनांव बदल्ल्यार ते बदलून दिवपी आनी बदलपी दोगांकूय खर दंड घालपाक जाय. आयज गोंयांत रेशनकार्ड, लायटीचें- उदकाचें कनेक्शन रोखडेंच मेळटा, आमदारा कडेन मतांच्या बाबतींत निश्ठावान रावल्यात तो तुमच्या संवसाराचें अर्दें अदीक वजें उखलतात खंय. म्हणटकच हें आडनांव बदलप किस झाड की पत्ती?
भरपूर पयसो आसल्यार वा लाचारी, हुजरेगिरीची कला जमल्यार तुमकां रातीं भितर यश मेळटा, अशें म्हणटात. पयशे, सत्तेच्या बळग्याक भौसाक बागोवपाक मेळटा, हो समज चुकीचो थारावप, लोकांच्याच तर हातांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
