भांगरभूंय | प्रतिनिधी
पणजी ः नव्यान नेमिल्ल्या सरकारी कर्मचाऱ्यांनी राष्ट्रीय सेवा करून देशाचे उदरगतींत योगदान दिवचें. राष्ट्राची सोवा आनी लोकसेवा करप हें तांचें मुखेल कर्तव्य अशें मत केंद्रीय वीज राज्यमंत्री श्रीपाद नायक हांणी उक्तायलें. शेनवारा केंद्रीय रोजगार मेळाव्याच्या पंदराव्या टप्प्या खाला पणजेंत 47 जाणांक नेमणूक पत्रां वांटपाची कार्यावळ जाली. ह्या वेळार ते उलयताले. ह्या वेळार अबकारी आयुक्त सुधीर देशमुख, जीएसटी आयुक्त बिपिन कुमार उपाध्याय आनी हेर अधिकारी हाजीर आशिल्ले.
प्रधानमंत्री नरेंद्र मोदीन विकसीत भारताचें सपन पळयलां. ते खातीर तरणाट्यांक सशक्त आनी आत्मनिर्भर करप गरजेचें आसा. हाकाच लागून आयज देशभरांतल्या 51 हजार तरणाट्यांक रोजगार नेमणूक पत्रां दिल्यांत. हीं पत्रां मेळपी तरणाट्यांनी मेळिल्ली नोकरी लोकांचे सेवे खातीर आसा अशी समजूत घेवन वावुरपाची अपेक्षा आसा. ह्या कर्मचाऱ्यांनी सामान्य लोकांच्यो अपेक्षा पुराय करपाक जाय अशें नायक हांणी सांगलें.
लोकांचो विस्वास मेळोवपा खातीर प्रामाणीकपणान, समर्पण आनी नम्रतायेन वावुरचें अशें तांणी म्हणलें. सध्या संवसार नेटान बदलत आसा. एआयचो उपेग जायत्या सुवातींनी सुरू जाला. आयज नेमणुकेचीं पत्रां मेळिल्ल्या कर्मचाऱ्यांनी हाचोय विचार करचो. काळाप्रमाण आपली कुशळटाय, तांक आदी अपडेट करप गरजेचें आसा. शिकपाची प्रक्रिया चालू दवरल्यार फुडाराक कर्मचाऱ्यांक आनी देशाक ताचो फायदो जातलो.
विकसीत भारत सपन साकार करपा खातीर केंद्र सरकार रोजगर मेळावो उपक्रम चालीक लायता. जीएसटी, आयकर, अबकारी खातें, भारतीय रेल्वे, स्टेट बँक ऑफ इंडिया, टपाल आनी हेर केंद्रीय खात्यांत भरती करपा खातीर परिक्षा येसस्वीपणान पास जाल्ल्या कर्मचाऱ्यांक नेमणूक पत्रां दिल्यांत. आयज देशभरांतल्या 51 हजार तरणाट्यांक आत्मनिर्भर केलां. कर्मचाऱ्यांनी शिस्तींत काम करून देशाची सेवा करची अशें सुधीर देशमुख हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
