भांगरभूंय | प्रतिनिधी
-सरकारी कर्मचारी भरती आयोगा वरवीचः मुख्यमंत्रीपणजीः नव्या शिक्षण धोरणा खाला उत्तर आनी दक्षीण ह्या दोनूय जिल्ह्यांनी दोन क्लस्टर विद्यापीठ स्थापन करतले. पूण, गोंय विद्यापीठ तशेंच उरतलें, अशें मुख्यमंत्री डॉ. प्रमोद सावंत हांणी मंगळारा पत्रकारां कडेन उलयतना ही गजाल स्पश्ट केली.
केंद्र सरकाराची ‘इनईपी’ नेटान चालीक लावपी गोंय देशांतलें पयलें राज्य जालां. फाटलीं दोन वर्सां शिक्षणीक मळार गरजे प्रमाण हें धोरण चालीक लायलां. आतां ह्या धोरणांतल्यान राज्यांतल्या दोनूय जिल्ह्यांनी दोन क्लस्टर युनिव्हर्सिटी स्थापन करपाचो निर्णय सरकारान घेतला अशें मुख्यमंत्री डॉ. सावंत हांणी म्हणालें.
सरकारी नोकरी भरपाक भ्रश्टाचार जावचो न्हय हे खातीर आमी कर्मचारी भरती आयोगाची थापणूक केली. फाटल्या वर्सा सावन आयोग ‘सी’ वर्गांतलीं सरकारी नोकरी पदां भरपा खातीर परिक्षा घेता. संगणक आदारीत चांचणी (सीबीआरटी) वरवीं ही परिक्षा पारदर्शकपणान जाता देखून राज्यभरांतल्या तरणाट्यांचोय सकारात्मक प्रतिसाद मेळटा. हाकाच लागून आतां सावन एका वेळार उण्यांत उणे धा हजार विद्यार्थ्यांक परिक्षा घेवंक मेळची अशी सुविधा निर्माण करपाचो यत्न करतात अशें तांणी सांगलें.
……………………………….
मोपाः पयल्या म्हयन्यांत 8 कोटी रुपयांची येणावळ
मोपा हांगा चालीक लायिल्ल्या मनोहर आंतरराष्ट्रीय विमानतळ प्रकल्पांतल्यान राज्याक येणावळ मेळपाक सुरवात जाल्या. पयल्या म्हयन्यांतच ह्या प्रकल्पांतल्यान राज्याक आठ कोटी रुपयांची येणावळ मेळ्ळ्या. फुडाराक ही येणावळ आनीक वाडटली अशेंय मुख्यमंत्री डॉ. प्रमोद सावंत हांणी स्पश्ट केलें.
………………………………………..
स्पर्धात्मक परिक्षे खातीरच्या विद्यार्थ्यांक दितले मजत
राज्यांतले जायते विद्यार्थी आयएएस, आयपीएस आनी हेर स्पर्धात्मक परिक्षेची तयारी करपा खातीर हेर राज्यांनी वतात. थंय तांकां चड करून रावपा खातीर घरांचो त्रास सोंसचो पडटा. देखून त्या राज्यांनी अशा विद्यार्थ्यां खातीर रावपाची वेवस्था करपाक राज्य सरकार सहकार दितलें अशें मुख्यमंत्री डॉ. सावंत म्हणालें. तशेंच राज्यांतल्या चडांत चड विद्यार्थ्यांनी स्पर्धात्मक परिक्षांनी प्रभावी कामगिरी करची हे खातीर यत्न सुरू आसात अशें तांणी सांगलें.
………………………………………..
सरकारी हॉस्पिटलांनी कंत्राटी तत्वाचेर भरती सुरू
सरकारी हॉस्पिटलांत दोतोर आनी हेर तज्ञ दोतोरांचो उणाव जावचो न्हय हे खातीर सरकारान कंत्राटी पद्दतीन अशीं पदां भरपाचो निर्णय घेतला. फाटल्या कांय म्हयन्यां सावन गोंय वैजकी म्हाविद्यालय (जीएमसी) सयत हेर सरकारी हॉस्पिटलांतल्या दोतोर आनी हेर तज्ञांचीं पदां कंत्राटी पद्दतीन भरतात अशेंय मुख्यमंत्र्यांनी स्पश्ट केलें.
—
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
