नव्या शिक्षणीक वर्सांत नवें शिक्षणीक धोरण

भांगरभूंय | प्रतिनिधी

चालंत शिक्षणीक वर्स फुडल्या सप्तकांत सोंपता. जुनाच्या पयल्या सप्तकांत नवें शिक्षणीक वर्स सुरू जातलें. शिक्षणीक मळावेले वावुरपी नव्या शिक्षणीक वर्साची आतुरतायेन वाट पळयतात. नव्या शिक्षणीक वर्सांत नवें शिक्षणीक धोरण ताच्या मार्गदर्शक तत्वां आनी उद्दिश्टां सयत चालीक लागतलें म्हणपाचो आशावाद तांकां आसा.
चाळीस वर्सां उपरांत वाजत- गाजत आयिल्लें नवें राश्ट्रीय शिक्षणीक धोरण जाहीर जाल्ल्याक आतां तीन वर्सां जायत आयलीं. ह्या तीन वर्सांच्या काळांत गोंयच्या शिक्षणीक मळार कसले नवे धोरणात्मक बदल आयले तो संशोधनाचो विशय. मुळांत शिक्षणीक मळावेले प्रशासक, शिक्षक आनी पालक ह्या घटकांनी नवें शिक्षणीक धोरण समजून घेतलां काय? काय चलता तें बरें आसा ही मानसिकता शिक्षणीक धोरणाकय संबंदीत घटक लागू करतले.
शिक्षणीक धोरण चालीक लावपाची घोशणा फाटलीं दोन वर्सां सरकार करत आयलां. पूण, धोरणाच्या अंमलबजावणे खातीर गरजेची साधनसुविधा, पाठ्यपुस्तकां, हेर शिक्षणीक साहित्य, शिक्षकांचें प्रशिक्षण आदी विशयां संदर्भांत अजूनय गरजेची तयारी आनी गती दिसना. नव्या शिक्षणीक धोरणाक धरून आतां सद्याची 5+3+2+2 (10+2) अश्या स्वरुपांतली शिक्षण वेवस्था 5+3+3+4 अश्या नव्या स्वरुपांत येतली. हातूंतलीं पयलीं तीन वर्सां पूर्व शालेय आनी मुळाव्या पांवड्यावेलीं वर्सां आत्तां विचारांत घेवप गरजेचीं आसात. कारण पूर्व शालेय पांवड्यावेल्यान ह्या धोरणाचो खऱ्या अर्थान आरंभ जावपाचो आसा.
पूर्व शालेय पांवड्यार लागपी पाठ्यपुस्तकांची निर्मिती बेगिनात बेगीन जावपाची गरज आसा. सगल्यांत म्हत्वाचें म्हणल्यार शिक्षणाचें माध्यम थारप भोव गरजेचें आसा आनी तें प्राधान्यान थारावपाक जाय. नाजाल्यार शिक्षणीक धोरणांत सांगिल्ल्या मूळ तत्वांकडेनच तडजोड केल्ल्याचें पातक सरकाराक लागतलें. गोंयांतल्यो साबार पूर्व प्राथमीक शाळा अक्षरशा शारांतल्या गजबजाटांत पसऱ्यांनी चलतात अशें म्हणल्यार अतिताय जावची ना. थंय शिक्षणीक वातावरणाचो उणाव आसा. जाय ती सुरक्षा ना. कुकडांक घुडांत भरचीं तशीं भुरग्यांक ल्हानश्या कुडांत चेंपणाक घाल्लीं दिश्टी पडटात. अश्या शाळांक एक तर गरजेची साधनसुविधा बेगीनात बेगीन तयार करात म्हूण सांगपाची वा शाळेची मान्यताय काडून घेतले म्हणपाची शिटकावणी दिवपाची गरज आसा. ह्या शाळांतले भोवतेक शिक्षक मुळाव्या पांवड्यार अध्यापनाच्या कसल्याच प्रशिक्षणा बगर शिकयतात. राश्ट्रीय शिक्षणीक धोरणांत भुरग्यांच्या आरंभाच्या वर्सांक धरून साबार नवे उपक्रम सांगिल्ले आसात. ते प्रभावीपणान आकाराक येतले जाल्यार तातडीन शिक्षकांक प्रशिक्षीत करपाक जाय.
पालक प्रबोधन ही संकल्पना गोंयच्या शिक्षण वेवस्थेंत दुर्लक्षीत कशी. तिची जाणीव आनी म्हत्व लेगीत संबंदितांक खबर ना. दुर्दैवान, शासकीय मळाचेर ना जाल्यार निदान पालकांच्या पांवड्यार तरी प्रबोधनाचे नदरेन पावलां उबारिल्लीं दिसूंक जाय आशिल्लीं. पूण, तशें घडिल्लें दिसना. भुरग्याचीं आवय- बापूय जावप आनी तांचो पालक जावप ह्यो दोन विंगड भुमिका हें पालकांक कळना. भुरग्याची सर्वांगी उदरगत आवय- बापायचे भुमिके परस पालकांचे भुमिकेंत योग्य रितीन जावंक शकता हें आमी मतींत दवरपाक जाय.
आतां मेरेन अपरी ते बालवर्ग 2 हें शिक्षण अधिकृत नाशिल्लें. ताका शासनान थारायिल्लो अभ्यासक्रम, प्रमाण पाठ्यपुस्तकां, प्रशिक्षीत शिक्षक, निर्धारीत साधनसुविधांचें प्रायोजन नाशिल्लें. आतां हें सगलें चालंत शिक्षण वेवस्थेचो भाग जातलें. मुळाव्या पांवड्यार शिक्षक- विद्यार्थी प्रमाण आदींच उणें आसा. तें वाडोवन उपरांत नव्या शिक्षणीक वेवस्थेंत प्रशिक्षीत शिक्षकांची नियुक्ती करप गरजेचें आसा.
सद्याक सरकाराचें कसलेंच नियंत्रण नाशिल्ले शिक्षणाच्या नांवान चलपी पसरे तांकां साधनसुविधा तयार करपाक सांगून अधिकृत करचे पडटले. शिक्षणाचो धंदो केल्ल्यो ह्यो संस्था आपल्याक जाय तशी फी घेतात. तांचेर सरकाराक नियंत्रण दवरचें पडटलें. नव्या शिक्षणीक धोरणांत शाळा समुहांची स्थापणूक करप गरजेची आसा. नव्या स्वरुपांतल्या शिक्षणीक पावंड्यांची अंमलबजावणी करतले जाल्यार क्लस्टर तयार करपाचें काम भोव बारिकसाणीन आनी कळाव लायले बगर जावंक जाय. म्हाविद्यालयीन पांवड्यार तें जालां, पूण पूर्व शालेय धरून माध्यमीक पांवड्या मेरेन तें अजून जावचें आसा. जितलें बेगीन तें जातलें तितले बेगीन विंगड शाळां मदीं समन्वय तयार जावपाक ताचो आदार जातलो.
गोंय शिक्षणीक मळार भारतांत आघाडेचेर आसा अशें एक चित्र सदांच उबें करप जाता. खऱ्यांनीच तशी वस्तुस्थिती आसा कांय तो एक आभास हाचो आमी विचार करपाक जाय. सातत्यपूर्ण सर्वंकश मुल्यमापनाची संकल्पना आनी आठवी मेरेन ना नापास धोरणाची गत गोंयांत कितें जाली तें शिक्षणीक मळार जागृत रावन वावर करतल्या सगल्यांक खबर आसा. शिक्षणीक धोरणाचीय गत तशीच जावची न्हय अशी प्रामाणीक अपेक्षा आसा.
शिक्षणीक धोरणाची अंमलबजावणी फकत कागदाचेर मर्यादीत उरची न्हय. पूर्व प्राथमीक शाळेंतल्या प्रवेशा खातीर तीन वर्सांची अट लायली म्हूण शिक्षणीक माध्यमाची अंमलबजावणी सुरू जाली अशें जर सरकार मानता आसत जाल्यार तें स्वताकच फटयता अशें म्हणचें पडटलें. गोंयांत गोमन्तक बालशिक्षण परिषद सारखी संघटना मुळाव्या पांवड्यावेल्या शिक्षणांत दर्जेदार बदल येवपाचे नदरेन वावर करता. शिक्षणीक साहित्य निर्माण करपाचे नदरेन कोंकणी भाशा मंडळ वावुरता. सरकारान अश्या संस्थांचो आनी तांच्या वावराचो फायदो करून घेवंक जाय.
शिक्षणीक संस्थां कडेन धोरणाचो दस्तावेज आसा. तांतुंतल्या भोवतेक प्रायोजनांचो आरंभ करप शिक्षणीक संस्थांक आपल्या पावंड्यार सहज शक्य आसा. अश्या जापसालदार शिक्षणीक संस्थांनी शासकीय परिपत्रकांची वाट पळयत बसपाची गरज ना. गोमन्तक बालशिक्षण परिषद वा कोंकणी भाशा मंडळ सारख्यो संस्था आपखोशयेन अश्या शिक्षणीक संस्थांक पालव दिवपाक तयार आसात. वेळ कित्याक करया? शासनाक कित्याक रावया? आयच्यान नव्या शिक्षणीक वर्सा नव्या शिक्षणीक धोरणाच्या अंमलबजावणेची वाट चलया.-

अनंत अग्नी
9422439903