भांगरभूंय | प्रतिनिधी
भांगरभूंय । प्रतिनिधी
वाळपयः नव्या शिक्षणीक धोरणाक लागून भुरग्यांचे बौद्धिक उदरगतीक चालना मेळटली. पयलेट फावट अणभवांतल्यान शिक्षण घेवपाची संद भुरग्यांक मेळटली. भुरग्यांक खोशयेन शिक्षण घेवपाची ही प्रक्रिया आसा अशें दाबें सत्तरीच्या सरकारी माध्यमीक विद्यालयाची मुख्याध्यापिका रोशन पैंगीणकार हिणे सांगले.
जनभागिदारींतल्यान शिक्षण हे संबंदीचे कार्यावळींत ती उलयताली. ह्या वेळार शिक्षिका नितिशा पार्सेकार, स्वाती गांवकार, मनोज देसाय, विश्राम मळीक, वरूण मळीक, रक्षदा गांवस हाजीर आशिल्ली. नव्या शिक्षणीक धोरणाक लागून शिक्षकांनी भुरग्यांची बौद्धीक वाड जातली हाचे कडेन लक्ष दिवपाची गरज आसतली. नव्या शिक्षणीक धोरणाक अनुसरून शाळेंत वेगवेगळ्या तरेच्यो कार्यावळी करून नवे उपक्रम चालीक लायतले अशी म्हायती तिणे दिली.
चित्रकला शिक्षक मनोज देसाय हाच्या मार्गदर्शना खाला ह्या वेळार पोस्टर सर्त जाली. पयल्या गटांत नियती गांवकार, श्रेया गांवस, अंश गांवकार हांणी पयले तीन नंबर मेळयलें जाल्यार दुसऱ्या गटांत संकेश गांवकार, समिक्षा गांवकार आनी तेजस्वी गांवकार हांणी पयले तीन नंबर मेळयले. मानेस्ताचे हस्तुकीं इनामां भेटयलीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
