भांगरभूंय | प्रतिनिधी
डॉ. नारायण देसाय: गुरुदास गांवस विद्यालयांत नव्या शिक्षणीक धोरणाचेर कार्यशाळा
दिवचल: नव्या शिक्षणीक धोरणान मुळाव्या शिक्षणाचेर भर दिल्या. भुरग्यांचे बुद्धीची वाड ल्हान पिरायेचेरूच जायत आसता देखून तांकां आमी समजून घेतल्यार संस्कारी भुरगीं घडपाक शकतात. भुरग्यां मदलो परिक्षेचो भंय काडून उडोवन तांकां शाळेची गोडी लावप गरजेचें. भुरग्यांची पुरायेन उदरगत कशी करची हाचेर नव्या शिक्षणीक धोरणान भर दिल्या अशें गोमंतक बालशिक्षण परिशदेचे अध्यक्ष डॉ. नारायण देसाय हांणी सांगलें.
सांखळेच्या गुरुदास गांवस विद्यालयांत नव्या शिक्षणीक धोरणाचेर कार्यशाळा आयोजीत केली. ह्या वेळार मुखेल सोयरे म्हणून डॉ. देसाय उलयताले. माचयेर उपाध्यक्ष झिलू गांवकार, कार्यशाळा संयोजक सुनीत देसाय, पांडुरंग गावडे तशेंच प्रभारी मुख्याध्यापिका लक्ष्मी सिनारी हाजीर आशिल्ले.
ह्या वेळार गोंय बालशिक्षण परिशदेचे उपाध्यक्ष झिलू गांवकार हांणी बालशिक्षण परिशदेचें काम स्पश्ट केलें. आपल्या भुरग्यांक वळखप, तांची आवड लक्षांत घेवन ते प्रमाण आवश्यक शिक्षण दिवप हे खातीर बाल शिक्षण परिशद कार्यरत आसा अशें तांणी म्हणलें.
सुनीत देसाय हांणी आपले शिक्षणीक अणभव सांगतना भुरग्यांक उमेदीन शिक्षण दिवपाक शिक्षकांनी कितें बदल करचे, शाळेंतलें वातावरण कशें आसचें हे विशीं म्हायती दिली.
कार्यावळीचें सुत्रसंचालन शिक्षिका अर्चना नायक आनी उपकार प्रभारी मुख्याध्यापिका लक्ष्मी सिनारी हांणी मानले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
