भांगरभूंय | प्रतिनिधी
मनोज सावयकार:सत्तरीच्या बालवाडी शिक्षिकाक शिक्षणीक धोरणा विशीं कार्यशाळा
वाळपय: 34 वर्सां उपरांत गोंयची शिक्षण पद्दत बदलतली. नव्या शिक्षणीक धोरणा प्रमाण भुरग्यांच्या पंचकोश तत्वांची उदरगत जातली. जशी तांतयांतल्यान नवी जीण तयार जाता तशें नव्या शिक्षणीक धोरणाक लागून भुरग्यांची बौध्दीक तांक वाडटली. हाका लागून नव्या शिक्षणीक धोरणा खाला येवपी भुरग्यांक शिक्षणीक सुविधायो बर्यो मेळटल्यो. पूण ही संकल्पना येसस्वी जावपा खातीर सगल्यांनी योगदान दिवप खूब गरजेचें. हातूंत बालवाडीच्या शिक्षकांची भुमिका म्हत्वाची जाल्ल्यान तांणी बरे तरेन सहकार्य केल्यार 2027 मेरेन नव्या शिक्षणीक धोरणाची शंभर टक्के अंमलबजावणी जातली अशें शिक्षण खात्याचे उत्तर गोंय उपसंचालक तशेंच निपुण भारत हे येवजणेचे मुखेली मनोज सावयकार हांणी सांगलें.
सत्तरी म्हालांतल्या बालवाडीच्या शिक्षिकां खातीर पांच दिसांचें मार्गदर्शन शिबीर आयोजीत केलां. हे कार्यावळीच्या उक्तावणा वेळार सावयकार उलयताले.
गोंय शक्षण खात्याच्या समग्र शिक्षा हांचे खाला सत्तरी म्हाल विभागा वतीन ह्या शिबिराचें आयोजन केलां. ह्या वेळार माचयेर सत्तरी म्हालाचे भाग शिक्षणाधिकारी भालचंद्र भावे हांणी स्वामी विवेकानंद विद्या मंदिराचे मुख्याध्यापक तशेंच प्रशिक्षक गोपीनाथ गांवस, युनिटी विद्यालयाचे मुख्याध्यापक आश्रम खान, समग्र सत्तरी विभाग मुखेली कुष्टा चोर्लेकार आनी हेर ह्या वेळार हाजीर आशिल्ले.
2020 वर्सा नवें शिक्षणीक धोरण तयार केलां. उपरांत टप्प्याटप्प्यान ताची अंमलबजावणी सुरू जाल्या. पूण भुरग्यांक बालवाडींतूच पंचकोश उदरगतीचें शिक्षण मेळचे खातीर ह्या नव्या शिक्षणीक धोरणांत एक खाशेलें प्रयोजन तयार केलां. आदीं अव्यवस्थीत पद्दत वापरताले. खेळ आनी कृती हाचे वरवीं शिक्षण दिताले. पूण ह्या शिक्षणा संबंदीं एक गैरसमज निर्माण जालो. बालवाडी शिक्षक स वर्सां मेरेन भुरग्यांची जतनाय घेतात. ताका लागून बालवाडींतल्या शिक्षकांक तांकां शिक्षण कशें दिवचें हाचेर प्रशिक्षण दितले आनी हे संबंदी ही कार्यशाळा आशिल्ल्याचें सावयकार हांणी सांगलें. सगळ्यांनी एकठांय येवन नव्या शिक्षणीक धोरणाची शंभर टक्के अंमलबजावणी करपाचेर भर दिवया अशी मागणी ह्या वेळार तांणी केली.
सत्तरी तालुक्याचे भाग शिक्षणाधिकारी भालचंद्र भावे हांणी नव्या शिक्षणीक धोरणाक लागून भुरग्यांच्या पंचकोश तत्त्वांची उदरगत जातली. खर्या अर्थान तांचे बौद्धीक तांकीची उदरगत जातली अशें तांणी म्हणलें.
सुरवातेक विभाग मुखेली कुष्टा चोर्लेकार हांणी सगळ्यांक येवकार आनी प्रास्तावीक केलें. तांणी प्रस्ताविका वरवीं येवपी 2017 मेरेन कसले उपक्रम आयोजीत करतले हे विशीं म्हायती दिली.
सुरवातेक परंपरीक दिवली पेटोवन कार्यावळ सुरू जाली. माचयेर हाजीर आशिल्ल्या मानेस्तांक श्रद्धा गांवस, योगिता नायक, सरिता गांवकार आनी गौतमी चारी हांणी फुलांचे तुरे भेटोवन येवकार दिलो. पुराय कार्यावळीचें सुत्रसंचालन प्रमिला गांवस आनी निमाणें उपकार श्रद्धा गांवस हांणी मानले.
हे पांच दिसांचे कार्यावळींत तज्ज्ञांकडल्यान मार्गदर्शन करतले. हातूंत गोपिनाथ गांवस, गोविंद गांवस, गौतमी च्यारी, सरिता गांवकार, संजीवनी गांवकार, स्वाती जुजवाडकार, पुजा राणे, शुभदा कुलकर्णी, भक्ती चिपळूणकार हांचो आसपाव आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
