भांगरभूंय | प्रतिनिधी
नवी दिल्ली, खबरां संस्था : नवें वर्स एक बरी खबर घेवन आयलां. नव्या वर्साच्या पयल्याच दिसा गॅस सिलिंडराची किंमत उणी केल्या. ह्या निर्णयाक लागून हॉटेल तशेंच हेर वेवसायिकांक बरोच फायदो जातलो. ऑयल मार्केटिंग कंपन्यांनी हो निर्णय घेतला.
तेल कंपन्यांनी १९ किलोग्रॅम वजनाच्या वेवसायीक गॅस सिलिंडराच्या दरांत कपात केल्या. १ जानेवारी २०२५ सावन वेवसायीक गॅस सिलिंडर १४.५० रुपयांनी सवाय जाला. घरगुती गॅस सिलिंडराच्या दरांत कांयच बदल जावंक ना. फाटल्या वर्सा १ मार्चाक घरगुती गॅस सिलिंडराचो दर देंविल्लो. उपरांत घरगुती गॅस सिलिंडराच्या दरांत आजून कांयच बदल जावंक ना.
खंयच्या शारांत दर कितलो?
ऑयल कंपनी दरेका म्हयन्याचे १ तारखेक गॅस सिलिंडराचो दर नव्यान थारायता. हे फावटींय १ जानेवारीक सिलिंडरचे नवे दर लागू केल्यात. ह्या निर्णया प्रमाण १ जानेवारी २०२५ सावन दिल्लीक १९ किलोग्रॅम वेवसायीक गॅस सिलिंडर १८०४ रुपयांक, मुंबय १७५६ रुपया, चेन्नय १९६६ रुपया, जाल्यार कोलकाता शारांत १९११ रुपयांक मेळटलो. ह्यान पयलीं वेवसायीक गॅस सिलिंडराचो दर दिल्लीक १८१८.५० रुपया आशिल्लो. दिल्लीक आतां घरगुती गॅस सिलिंडरचें मोल ८०३ रुपया, कोलकाता ८२९ रुपया, मुंबय ८०२.५० जाल्यार चेन्नयक ८१८.५० रुपया आसा.
स म्हयन्यांनी वेवसायीक सिलिंडराचो दर देंवला. जुलय म्हयन्या सावन डिसेंबर म्हयन्या मेरेन वेवसायीक गॅस सिलिंडराच्या दरांत सेगीत वाड जायत आशिल्ली. ह्या काळांत दिल्लींत वेवसायीक गॅस सिलिंडराच्या दरात वट्ट १७२.५ रुपयांची वाड जाल्ली.
मजगतीं, हे फावटींय ऑयल कंपन्यांनी घरगुती गॅस सिलिंडराच्या दरांत कसलोच बदल करूंक ना. ह्या काळांत घरगुती गॅस सिलिंडर १०० रुपयांनी सवाय जाल्लो. ३० ऑगस्ट २०२३ दिसा घरगुती गॅस सिलिंडर २०० रुपयांनी सवाय केल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
