भांगरभूंय | प्रतिनिधी
कांय न्हय करुन आनीक एक वर्सं अशेंच सोंपलें. आतांचीं हीं वर्सां कशी आनी केन्ना पासार जातात, कांयच कळना. कोणा खातीर तें वर्सं बरें थारता तर कोणा खातीर वायट. जिवीतांत येता त्या सगल्या प्रसंगांक तोंड दिवन मुखार सरपाची दर एकल्याची तयारी आसता. डिसेंबर म्हयनो आयलो की सगळ्यांच्या मनांत हुसको सुरु जाता आनी पुराय वर्सांतले जिणेचो हिशोब करपाक दर एकलो सुरवात करता.
वर्साचे सुरवातेक आमी कितलेशेच नवे संकल्प करतात, पूण म्हयने वतात तशें तशें आमी तें सगलें विसरतात आनी वर्सांच्या शेवटाक एकूय संकल्प पुराय जाल्लो नासता. जशी वर्सां बदलतात, तशें मनशांचे विचार, परिस्थिती बदलता व्हय? पयलींच्या वर्सांनी तरी गोंयात जायती सुदारणा आसली म्हणपाची. हालींसराक सगली परिस्थिती बिकट जाल्या. ना बायलां- चलयां खातीर गोंय सुरक्षीत उरिल्ले आसा, ना तरणाटे पिळगेक. 17-18 वर्सांचे तरणाटे चुकीच्या मार्गार भरकटत चल्ल्यात. दिसांन दीस अपघाताचें प्रमाण वाडतच चल्लां.
ह्या वर्सां सगळ्यांत वायट आनी धक्को दिवपी घडणुकी खूब घडल्यो. कितें कितें घडलें ना तें विचारात. बलात्कार, अपघात, खून, चोरी… एका फाटल्यान एक चालूच. दिसाच्या वेळार रस्त्याचेर खून, चोरयो जावपाक लागल्यो. बलात्कार जावपाक लागले. दिसपट्टो अपघातांचो आंकडोय वाडत गेलो. तातूंत मागीर कांय जणांक मरण आयलें. कांय जाणांची मस्ती तर कांय कडेन स्वताची चुक… आनी फोंडांत कोण दुसरेच पडले, अशेंय जाले. घुंवळे वखदां, सोरो पियोवप, रातभर पार्टी करप, ल्हान पिरायेचेर वाहनां चलोवप हाची चर्चा ह्या वर्सा खूब जाली. अपघातांत जखमी जावपी, मरप्यांच्यो चडसो आंकडो तरणाट्यांचो आशिल्लो. कोण घुंवळे वखदां घेतिल्ले तर कोण सोरो पियोवन. हें अशेंच चालू उरलें तर आतांचे हे तरणाटे पिळगेचो फुडार कसो घडटलो कांय, होच एक व्हड प्रस्न मुखार उबो रावला.
वर्सां वचत आसात, पूण गोंयांत सुदारणा कांयच ना. बेकारी, येरादारीची कोंयडी, रस्त्यांची वायट स्थिती ह्या समस्यां पसून आमकां केन्ना सुटका मेळटली कांय? विकास सगल्यांकूच जाय, पूण ते खातीर कितलीं वर्सां त्रास सोंसपाचो? वर्सान वर्स बेकारेचो आंकडो वाडतच आसा. खूब भुरगे नोकऱ्यो सोदतात, तर थोडे 15-20 हजारांक रात- दीस राबतात. इतल्या पगाराचेर गोंयांत जगप भोव कठीण. वचत त्या वाठारांनी येरादारीची कोंयडी जाता. रस्त्याची वायट स्थिती जाल्या. वचत थंय रस्ते खणून दवरल्यात. रस्त्यांचेर फोंडकुलां. 2023 वर्सां तरी ह्या समस्या पसून आमकां सुटका मेळटली?
2020 आनी 2021 वर्सां कोरोनाचे बाबतींत जें घडलें तशेंच आतां परत ह्या वर्सां जातलें कांय असो परतून एकदा दरेकाच्या मनांत भंय निर्माण जाला. वर्स सोंपता सोंपता म्हळ्यार सगळ्यांत वायट बातमी मेळ्ळी ती हीच. कोरोनाचें चवथें ल्हार येवपाची. आता परत कोरोना दुयेंस संवसारात पातळपाक लागला. चीन, जपान, अमेरिकेंत आनी हेर कांय देशांनी कोरोनाचे दुयेंती खूब वाडल्यात. ल्हवू ल्हवू गोंयांत हें सगलें परत सुरु जातलें कांय, असो हुस्को सगळ्यांक जाला. एक वटेन ख्रिसमस आनी नवें वर्स सुरु जावपाची सगल्यांक उमेद, देश- विदेशांतल्यान पर्यटक गोंयांत आयल्यात. गोंयभर ते दिश्टी पडटात. ताचो गोंयचे अर्थवेवस्थेक फायदो जातलो.
हालींच्या वर्सांनी वेगान धांवपी संवसारांत, दिसपट्टो आपले खातीर वेळ काडप कठीण जालां. भलायकेची जतनाय घेवपाक वेळ मेळनाशिल्ल्यान हालींसरांक जायतीं दुयेंसां जावपाक लागल्यांत. आयज आशिल्लो मनीस, फाल्यां ना अशी परिस्थिती आयल्या. काळजाच्या आताकान, कॅन्सर आनी हेर कांय दुयेंसांक लागून खूब लोकांक मरण येता.
2022 वर्सांत घडिल्ल्या वायट प्रसंगांचेर विसर घालून 2023 वर्सांक येवकार दिवया. नवीन वर्सांचो संकल्प करुया. दरेक जण आपले भलायकेची जतनाय घेतलीं. मन लावन अभ्यास, काम करतलीं. वयर उल्लेख केल्ल्या गजालीं विशीं विचार करुन 2023 वर्सा सगले आपापले परीन शक्य तितले यत्न करतले आनी त्यो सुदारपाक वावुरतले, असो नव्या वर्सांचो संकल्प करुया… आनी सगल्यो गजाली मतींत दवरुन नव्या वर्सांक येवकार दिवया.
प्राची गांवकार
सुर्ल – सत्तरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
