भांगरभूंय | प्रतिनिधी
आयज 31 डिसेंबर. वर्साचो निमाणो दीस. 2024 सोंपून 2025 लागतलें. पोरण्या वर्साक आदेवश करप हो खरें म्हणल्यार चुरको लावपी, दुख्खी करपी खीण. मात आमी ते दीस वा ताच्या आठ- धा दीस पयलीं सामके खुशालभरीत जावन नाचतात, गातात, पितात, खातात. मनाक आवडटा तें करचें, पूण ताचो दुसऱ्यांक त्रास, मनस्ताप जावचो ना, हाचीय जतनाय घेवची. पूण, मनोरंजनाची आमची व्याख्या दिसानदीस बदलत आसा. शेजराच्या राज्यांतली एक खबर आयकली. पर्यटकांक नवें वर्स मनोवपा खातीर सरकारान मध्यानरातीं मेरेन बार, पब उक्ते दवरपाक परवानगी दिल्या. म्हणल्यार, तांकां सोरो पियेवपाक मेळचो, तो मेळपाक तांकां अडचण येवची न्हय, म्हूण सरकारान केल्ली ही तजवीज? वर्साक एक- दोन फावटी कोण ना कोण सहलीक, भोंवडेर वतातूच. थंय वतना वांगडा चिकन, मटण, सोरो, बियर वा शिवराक आसल्यार झणझणीत मसाल्याचे, तळिल्ले जिनसूच व्हरपाक जाय? सोरो, मसाल्याचे, मासाहारी पदार्थ म्हणल्यारुच मौज, मजा? हें केलें ना जाल्यार ती शिवराक बाप्पाची पिकनीक, अळणी टुर असो एक समज वा परंपराच फाटल्या कांय वर्सां सावन पडल्या. हाच्या फाटल्या मानसशास्त्राचो अभ्यास समंजस मनशांनी करपाक जाय. खास करून गोंयांत येवपी कांय पर्यटक सोरो पियेवप हे कर्तव्यूच समजतात. आग्रा वचून ताजमहाल पळोवंक ना, जाल्यार कसली ती भोंवडी अशें म्हणटात, तसलोच कांयसो हो प्रकार. भलायकेची, प्रतिश्ठेची वाट लावपी हे मजेची थोड्यांक इतली आवड कित्याक तें कळना. हे आवडीचें मागीर वेसनांत रुपांतर जावं येता आनी तें जालें जाल्यार सगलेंच मातये भरवण!!
आयची 31 डिसेंबराची रात ही वेसनाची. कांय जाणांक तरी तें लागताच. नव्या वर्साच्या येवकाराचोच न्हय, तर कसलोय खीण मनोवपाक हेर बरेच मार्ग आसात. संगीत, वादनाची कार्यावळ दवरूं येता, ते पळोवंक वचूं येता. मात हें संगीत चार- चवगांच्या मनाक भावपी आसचें. फक्त भार आयिल्ले वरी नाचपाक मेळटा, तेंच खोशेचे खीण मनोवपाचें संगीत न्हय. नशा येवची ना अशें कितेंय खाल्यार, पिल्यार खोस मनोवपाक मेळना काय? जाणकारांच्या मतान, नरकासुराची आनी नव्या वर्साची रात ही सोऱ्याचें वेसन लागपाची. ते रातीं खास करुन तरणाट्यांनी सादूर रावंक जाय. कारण ह्या वेसनाचे बाबतींत एकदां पांय निसरलो काय सांवरप खूब कठीण. महाराष्ट्रांतल्या एका पबान नव्या वर्साच्या सुवाळ्याची आमंत्रण पत्रिका सोशल मिडिया वयल्यान तरणाट्यांक धाडल्या, तिची जायरात केल्या. तातूंत तरणाट्यांक कंडोम आनी तोंडान घेवपाच्यो गुळयांचीं पाकिटां मुफत दिवपाची घोशणा केल्या. खबरां चॅनलांचेर ही खबर येतकच बोवाळ जालो, महिला आयोगानूच हाची दखल घेतली. आधुनिकतायेच्या नांवा खाला खंय वचपाक लागल्यात आमी? चंगळवाद सगल्यांक आवडटा. तो करचोय बी. पूण हो असलो न्हय!
नव्या वर्सा निमतान जायते जाण संकल्प करतले, पूण तांणी ते जिद्दीन पुराय करपाचो यत्न करूंक जाय. फेब्रुवारी लागता म्हणसर संकल्प विसरुंक जायनात. कसलेच तरेचो भ्रश्टाचार करचो ना, लाच दिवचो ना, असो संकल्प करचो. ओठांचेर येवपी सुवार्थाचो सुवाद थुकून उडोवन अन्याया आड आवाज काडपाचो निर्धार करचो. सरभोंवतणी जायते गरीब, दुबळे लोक आसात, तांकां मजतीचो हात दिवचो. तांचे खातीर सप्तकांतल्यान एक वर तरी दिवचें. समाजांतले आदर्श उणें जायत आसात. दरेकल्यान बरे गुण आंगांत केळोवन स्वता एक आदर्श जावपाचो यत्न करचो. कठीण न्हय हें.
बरी गजाल मनोवपाक छंद बाळगुचे. अर्थांत बरे. काम, शिक्षणाचे गडबडींत कांय आवडी पूर्ण करप जमना. तांचे खातीर वेळ दिवचो. संगीत, वाचन, चित्रकला, वाद्य शिकप, वाहन चलोवप, भाशा शिकप, टायपींग शिकप, अभिनय, लिखाण…. बरोसो सिनेमा पळोवं येता, टेलिस्काॅपांतल्यान मळबांतलीं नकेत्रां पळोवप, घरचे घरा पार्टी करून खेळप……. करपा सारकें खूब कितें आसा.
छंद, आवडी, प्रतिभा विकसीत केल्यार तुमच्या व्यक्तीमत्वाचीय उदरगत जाता. जिवीतांत आडमेळीं, आव्हानां येतात, तांकां सामकार वचप सोंपें जाता. गिन्यान वाडटकच ताचो फायदो आपल्याकूच जाता आनी तो जिवीत बदलपीय आसपाक शकता. नव्या वर्साय अशेंच कितें तरी नवें, वेगळें करुया. सदच्याच गजालींक विसव दिल्यार, तें आमचेच भलायकेक बरें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
