भांगरभूंय | प्रतिनिधी
पणजी : हिंदू पंचांगा प्रमाण १९ मार्चाक पुराय गोंयांत संवसार पाडवो मनयतले. हाका लागून अंदूंचें नवें वर्स पावसान सुरू जावपाची शक्यताय आसा. कर्नाटक आनी तामिळनाडू मजगतीं तयार जाल्लें टर्फ तशेंच हेर वातावरणीय बदलाक लागून राज्यांत १८ आनी १९ मार्चाक पावस पडपाची शक्यताय हवामान खात्यान उक्तायल्या. हे दोन दीस जोगलां आनी गडगडा सयत पावस पडपाची शक्यताय आसा. ते प्रमाण खात्यान ह्या दोन दिसां खातीर पावसाचो येलो अलर्ट जारी केला. जाल्यार २० ते २३ मार्च मजगतीं राज्यांतलें वातावरण सुकें उरपाची शक्यताय आसा.
मंगळारा पणजे चडांत चड ३३ अंश जाल्यार उण्यात उणे २४ अंश सेल्सिअस तापमानाची नोंद जाली. मुरगांवां चडांत चड तापमान ३२.८ अंश आनी उण्यात उणो तापमान २३ अंश सेल्सिअस उरतलो. फुडले स दीस राज्यांतलो चडांत चड तापमान ३३ ते ३४ अंश जाल्यार उण्यात उणो तापमान २४ ते २५ अंश सेल्सिअस मेरेन उरपाची शक्यताय हवामान खात्यान उक्तायल्या. फाटले कांय दीस राज्यांतल्या कांय वाठारांनी धुकें आशिल्लें. मात पावसाची नोंद जावंक ना.
ह्यान पयलीं खात्यान मार्च, एप्रिल आनी मे ह्या तीन म्हयन्यांच्या काळांत गोंयांत चडांत चड आनी उण्यात उणें तापमान सरासरी परस चड उरपाची शक्यताय उक्तायल्या. अशें जरी आसलें तरी गोंयांत उश्णताय नाशिल्ल्याचें खात्यान स्पश्ट केल्लें. वयल्या काळांत राज्यात सरासरी इतलो वा ताचे परस मात्सो उणो पावस पडपाची शक्यताय खात्यान उक्तायल्ली.
मजगतीं, फाटल्या वर्सा मार्च म्हयन्यांत गरमी वाडिल्ली. खात्यान १ ते १० मार्च २०२५ मजगतीं उश्णतायेचो येलो अलर्ट जारी केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
