भांगरभूंय | प्रतिनिधी
पणजी : गोंयच्या दर्यादेगांचेर फाटल्या वर्साक निरोप दिवपा खातीर बरीच गर्दी जाल्ली पळोवपाक मेळ्ळी. दर्यादेगेर सूर्य उदेतना, सूर्यास्त, लकलकपी रेंव, ल्हारां, मडांचे मळे आनी पांचवोचार सैम अणभवपाक देशी, विदेशी पर्यटकांचे पांय आपूण गोंयांत वळटात. गोंयांत ह्या दृश्याचो अणभव घेवपाक हजारांनी देशी, विदेशी पर्यटकांनी एकूच गर्दी केल्ली. तातूंत थळाव्यांचो आसपाव आशिल्लो. लोकांची गर्दी वाडिल्ल्यान खुबश्या सुवातांचेर येरादारी कोयंडीक तोंड दिवचें पडलें.
गोंयांत ३१ डिसेंबराचे फाटभूंयेर जावपी गर्दी लक्षांत घेवन वट्ट परिस्थिती सांबाळपा खातीर ३,५०० पुलीस तैनात केल्लें. सोर्याचे घुवळेंत वाहनां धांवड्यावप्यांचेर लक्ष दवरप, येरादारीचे नेम मोडून वाहनां चलोवन येरादारी कोयंडीक कारण थारपी आनी वट्ट परिस्थिती सांबाळपाची व्हड जापसालदारकी पुलिसांचेर आशिल्ली. ते खातीर सगल्याक पुलीस दिसताले. ‘फ्लायओव्हर’च्या बांदकामाक लागून एनएच ६६ राष्ट्रीय हमरस्त्याचेर पर्वरी वटेन येरादारीक बरेच त्रास सोंसचे पडले. गोंयचे गांव आनी शारांतल्या क्रिस्तांव भावांनी इगर्जेंत प्रार्थने खातीर गर्दी केल्ली दिसताली. तांणी एका मेकाच्या घरांनी वचून नव्या वर्साचीं परबीं भेटयलीं. खुबश्या सुवातांचेर रातचो फोग लायलो. गांवांनी परंपरीक नाच केलो. हॉटेल्स, नायट क्लबांनी वेवसायूक पार्ट्यो रंगल्यो. कांय कडेन तयार केल्ले ‘ओल्ड मॅन’चे पुतळे रातचे लासले.
दर्यादेगांचेर फाटल्या वर्साचो निमाणो मावळपी सूर्य पळोवपा खातीर लोकांची गर्दी पडिल्ली. बागा, कळंगूटे, हणजूण, मांद्रें, मोरजी, हरमल, बोगमाळो, कोलवा, बाणावली, उतोर्डा, माजोर्डा, आगोंदा, पाळोळे, गालजीबाग ह्या दर्यादेगांचेर देशी विदेशी पर्यटकांनी गर्दी केल्ली. लोकांच्या गर्दीक लागून रस्त्यांचेर येरादारी कोयंडी जाली.
फोग, ट्रान्स पार्ट्या, मध्यरातची प्रार्थना आनी विवीध कार्यावळींनी आदल्या वर्साक निरोप दिवन न्या वर्साक लोकांनी येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
