भांगरभूंय | प्रतिनिधी
भावंडांनो,
वाऱ्यार पानां हुबून वचचीं तशे दीस , सप्तकां, पंद्रसी आनी म्हयने कशे हुबून गेले तेंच कळ्ळेंना. 2024 वर्स सोंपत आयलें. दोन दिसांनी 2025 नवें वर्स आमच्या वांट्याक येतलें. तें आमच्या खातीर कितें नवें घेवन येतलें ताचो नेम ना. भावंडांनो, ताका आनी उमेदीन, खोशयेन येवकार दिवयाच.. तेच बराबर फाटल्या वर्साचो विसर आमी घालूंक उपकारना. 2024 वर्स जरी सोंपलें तरी आमचें म्हणल्यार तुमचें भावंडांचे शिक्षणीक वरस सोंपूंक ना. तें सोंपपाक आनीक चार म्हयने उरल्यात हाची जाण आमी आनीक चार म्हयने तरी दवरूंकच जाय. याद आसा न्हय तुमकां
भावंडांनो, जाण्टेलीं अशें म्हणटात की काळाचें दरेक पावल उश्टावल्लें आसता तरी तो आमच्या वांट्याक येतना नवो ताल्ल जावन येता. फाटलें वर्स तुमच्या जिवितांत कशें परिणामी थारलां हें तुमीं पळयलांच. जिवितांत खुबश्यो बऱ्यो गजाली घडल्यात तेंचपरी कांय दिसांनी वायट परिस्थितिचो अणभव दिला. पुणून तरी आसतना तुमी बरे देखीचीं भुरगीं आशिल्ल्यान जें कितें वायट घडलें तें विसरून आमी बरें तेंच आपणायतलीं हे इत्सेन, धिरान फुडलें पावल घालें. तुमच्या वांट्याक आयिल्ल्या अपेसाक माड्डीत नवें जैत मेळोवपाचें मोखीन मुखार सावन कश्ट घेयत रावलीं. तुमी तुमचे मना बळगें वाडयत रावलीं. तुमी हें जें पावल उखल्लां तें भावंडांनो, खूब तोखणायेचें आसा. फुडारांतूय तुमी अशींच धिरान, सकारात्मकतायेन उकळीत रावात हां. देव तुमच्या यत्नांक आनी धिराक मुजरत येस दितलो आनी तुमी सातत्यान धडपडत घेयत आशिल्ल्या कश्टांचें गोड फळ तुमकां चाखूंक मेळटलें.
भावंडांनो, तुमच्यांतल्या कांय भावंडांचें शिक्षणीक वर्स सोंपपाक फकत दोनूच म्हयने उरल्यात. त्या शिक्षणीक वर्सांत घसघशीत जैत मेळोवपा खातीर तुमी कश्ट घेयत आसात. घरांतल्या जाणट्या मनशांचे मार्गदर्शन घेयत, तांच्या संस्कारा वरवी तुमी तुमची मोख गाठूंक गती घेयत आसात. त्या वावरांत तुमकां मात्शे त्रास जातले खरे. पुणून भावंडांनो, तुमच्या कश्टांच्या बियांक फळफळून घसघशीत यशाचें पीक लागतलें हातूंत दुबाव ना. मातशे त्रास घेयात. उपरांत दोन म्हयने विसव घेयात. तुमकां बरें येस आनी भलायकी आवंडेतां.
कांय जाणांचें वर्स सोंपपाक आनीक चार म्हयने उरल्यात म्हूण आळशीपणां करूं नाकात. तुमचे यत्न चालूच दवरात. भावंडांनो, आळसाय मनशाक दुबळी करता. हार, अपेस वांट्याक हाडटा. ती वांट्याक मेळची न्हय देखून नव्या वर्साचे सुरवेक संकल्प करात. तुमचे कश्ट, मानादीक, मायेस्त घरच्यांचें मार्गदर्शन, संस्कार सदांच तुमकां राखतले आनी राखूं. हीच म्हजी तुमचे खातीर नव्या वरसा निमतान सांगणी आनी मना काळजा सावन परबी. बरें तर, येयात..
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
