नव्या वर्साक गुजराताक गिनीज बुक ऑफ वर्ल्ड रेकॉर्ड
भांगरभूंय | प्रतिनिधी
४ हजारां परस चड लोकांनी घालो सूर्यनमस्कार
अहमदाबाद, खबरां संस्था: नव्या वर्सा गुजरातान आपलें नांव एके खाशेले कार्यावळी वरवीं सरळ गिनीज बुक ऑफ वर्ल्ड रेकॉर्डांत नोंद केलां. गिनीज बुक ऑफ वर्ल्ड रेकॉर्डचे प्रतिनिधी ह्या नियोजनाची पळोवणी करपा खातीर स्वता हाजीर आशिल्ले. ह्या वेळार गुजरातचे मुख्यमंत्री भुपेंद्र पटेल आनी गृहमंत्री हर्ष संघवीय हाजीर आशिल्ले.
नेमकें कितें घडलें?
फाटल्या वर्सा गुजराताक व्हडा प्रमाणांत लोकांनी हाजेरी लावन एकाच वेळार योग करपाचो विश्वविक्रम आपल्या नांवार केल्लो. हेच तरेन २०२४ नव्या वर्साच्या पयल्या दिसा सगळ्यांत चड लोकांनी सूर्यनमस्कार घालपाचो विक्रम आपल्या नांवार केलो. गुजरातच्या मोढेरा सूर्य मंदीर आनी आशिकुशीकच्या वाठारांत ह्या उपक्रमाचें आयोजन केल्लें. गिनीज बूक ऑफ वर्ल्ड रेकॉर्डचे प्रतिनिधी स्वप्नील डांगरीकार हांणी ह्या उपक्रमांत विश्वविक्रम प्रस्थापीत जाल्ल्याचें जाहीर केलें.
हांव हांगा सगळ्यांत चड लोक सूर्यनमस्कार घालपाच्या उपक्रमाचें परिक्षण करपाक आयिल्लों. हो एक नवे तरेचो विक्रम. ह्यान पयलीं असो विक्रम कोणेंच करूंक ना. ताका लागून आमी उण्यात उणी ३०० चो आंकडो दवरिल्लो. हांवें स्वता ह्या उपक्रमाची पळोवणी केल्या, अशें डांगणीकर हांणी सांगलें.
२०२४ चो हो पयलो विश्वविक्रम थारला. आयज सुमार ४ हजारां परस चड लोकांनी मोढेरा सूर्य मंदिरांत सूर्यनमस्कार उपक्रमांत वांटो घेतलो. हेर ५० सुवातांचेर असोच उपक्रम राबयल्लो, अशी म्हायती हर्ष संघवी हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
