भांगरभूंय | प्रतिनिधी
लोकसभेंतलो विरोधी पक्ष फुडारी कसो नासचो हाचो विचार करपाची संद फाटल्या पांच स दसकांत तशी कोणाकूच मेळिल्ली ना, वा तो करचो अशेंय कोणाक दिसूंक ना. काँग्रेसी पसून भाजप पश्रणीत खूबशीं सरकारां देशांत सत्तेर आयलीं आनी गेलीं लेगीत. पूण त्या काळांतले दरेक विरोधी पक्ष फुडाऱ्यांंनी आपले तांकी प्रमाण काम करतना ह्या घटनात्मक पदाक बरे पैकी न्याय दिल्ल्यान किरकोळ वाद वा जाल्ले मतभेद हाचो अपवाद सोडल्यार एकूय विशिश्ट विरोधी पक्ष फुडाऱ्यांचें नांव घेवंक मेळचें ना, की जांणी ह्या पदार आसतना आपलें कर्तव्य पार पाडटना कसलीय कसर केली. लोकसभेंतले आतां मेरेनच्या विरोधी पक्ष फुडाऱ्यांंच्या नांवांची वळेरी नदरे खाला घाली जाल्यार ह्या सगल्याच फुडाऱ्यांंनी त्या पदार रावन घटनेचे फास्केंतच जें काम केलें, सरकारा आड सुमारा भायर बोवाळ घालो हें स्पश्टपणान जाणवता. नांवांच घेवपाची आसत जाल्यार जगजीवन राम- यशवंतराव चव्हाण हांचे सावन राजीव गांधी आनी शरद पवार आनी लालकृष्ण अडवाणी सावन अटल बिहारी वाजपेयी – सुषमा स्वराज हांचे मेरेन खूबशा जाणांचीं घेवंक मेळटलीं. काँग्रेस पक्षाचे आयचे राष्ट्रीय अध्यक्ष मल्लिकार्जून खर्गे हांचेंय नांव हे वळेरेंत आसा. पूण ह्या सगल्यांनीच लोकसभेंतले विरोधी पक्ष फुडारी म्हूण काम करतना केन्नाच ह्या पदा खातीर घालून दिल्ल्या मर्यादांचें उल्लंघन केन्नाच केल्ल्याचो दावो कोणूच करचो ना. पूण आयज मात आमचे लोकसभेंतले विरोधी पक्ष फुडारी नेमको कसो आसचो न्हय हाची चर्चा जातना दिसता. हाचे फाटलीं कारणां सांगपाचीं जाल्यार सद्याचे विरोधी पक्ष फुडारी राहूल गांधी हांणी तांच्या अमेरिका भेटींत जे गूण दाखयले ताची दिवंक येतली.
राहूल गांधी हांकां विरोधी पक्ष फुडारी कशें मेळ्ळें हाचो इतिहास ताजो आशिल्ल्यान ताचेर चड कांय सांगपाची गरज आसा अशें दिसना. विरोधी पक्ष फुडारीपद हें फक्त सरकारा आडच न्हय जाल्यार राष्ट्र विरोधांतूय उलोवपा खातीर मेळिल्लो अधिकृत परवानो आसा असोच समज राहूल गांधी हांणी करून घेवंक ना मूं? अशें अमेरिका भेटींत तांणी जीं मुक्तांफळां उधळ्ळीं ताचे वेल्यान कोणाकूय दिसुये. विरोधी पक्ष फुडारी हो राष्ट्रविरोधी फुडारी आसूंक जाय असोय विचार करपाक लावपी राहूल गांधी हांची ही अमेरिका भेट थारली. सहाजिकूच ताचेर राजकी बोवाळ जावप अपेक्षितूच आशिल्लें. तांच्या पक्षांतले कांय फुडारी आनी एखाद्या दुसऱ्या हेर पक्षीय फुडाऱ्यांंनीच राहूल गांधी हांची री ओडली पूण सर्वसादारपणान राहूल गांधी हांची अमेरिकेंतली राष्ट्रविरोधी उलोवप हाका कोणे येवकार दिलो अशें चित्र मात दिसून आयलें ना. तांच्या इंडी आघाडीतले खूबशे पक्षूय हाचे पसून कुशिकूच रावले. विदेशांत वचून आपल्याच देशाची लज काडप हें तशें स्विकार कोणूच करचो ना. आनी तातूंतच लोकसभेंतले विरोधी पक्ष फुडाऱ्यान हें सगलें करचें हाची तर कोणूच अपेक्षाय करचो ना. पूण राहूल गांधी हांणी अमेरिकेंत जी विवादास्पद उलोवपां केलीं तीं पळयत जाल्यार विरोधी पक्ष फुडारी कसो नासचो हाचो विचार कोणेय केलोच जाल्यार ताचे अजाप दिसूंक नाका. विरोधी पक्ष फुडारी ह्या नत्यान पयलेच फावटी अमेरिका भेटीर गेल्ल्या राहूल गांधी हांणी थंय केल्ल्या वादग्रस्त आनी राष्ट्रविरोधी उलोवपाची वळेरी तशी व्हड आसून काँग्रेस जर तातूंतल्यान राजकी लावाची अपेक्षा करता आसत जाल्यार ती निश्चीतपणान चुकीची म्हणूंक येतली.
राहूल गांधी आपल्या काँग्रेस पक्षा खातीर एक नवोच मार्ग सोदूंक लागल्यात काय कितें अशेंय तांच्या वट्ट देहबोलींतल्यान दिसूंक लागलां. पूण शिकड्यांची पगडी आनी कडें हाचे वेल्यान तांणी केल्लें उलोवप तांकां राजकी लाव मेळोवन दितलो काय कितें हो दुबाव दिसता. कसलोच विचार करिनासतना राहूल गांधी अमेरिकेंत उलयत गेले खरें, आनी कांय प्रमाणांत तांकां प्रसिद्धीय मेळ्ळी हें खरें आसलें तरी ताका लागून जावपी लुकसाण चडूच आसतलें हें कालांतरान स्पश्ट जातलें. शिकड्यांचे बाबतींत केल्लें भडकावू उलोवप जाल्यार खलिस्तानवादी आतंकवादी पन्नू हांच्या दाव्याक घटाय दिवपी आसा आनी पन्नू हाणें ह्या उलोवपाक येवकार दिल्ल्याच्यो खबरो येत आसात. पंजाबांत निदान राहूल गांधी आनी तांच्या काँग्रेसीची हाका लागून पंचायत जातलीच, पूण तेच बरोबर हरयाणांत जावपी विधानसभा वेंचणुकेंतूय कांय प्रमाणांत ताचें मोल मेजचें पडटलें हातूंत दुबाव ना.
हरयाणांत आम आदमी पार्टीनूय काँग्रेसीक पयसूच दवरिल्ल्यान तांचें काम अदिकूच कठीण जातलें आनी अर्थातूच भाजपाक ताचो फायदो जावपाची शक्यताय न्हयकारूं येना. भारताच्या विरोधांत सेगीत वीख ओंकपी अमेरिकन खासदार इलहान उमर हांची राहूल गांधीन घेतिल्ली भेट आनी केल्ली चर्चाय अशीच वादग्रस्त थारल्या. हाचे वेल्यानूय केंद्रांतल्या भाजप सरकारान राहूल गांधींक पुरायपणान घेराव घाल्लो आसून फुडलो कांय काळ तरी ताचे वेल्यान जाल्लो वाद सोंपतलो अशें दिसना.
राहूल गांधी हांगाच रावले नात जाल्यार तांचो चीना खातीर आशिल्लो मोगूय वयर सरलो. आनी प्रधानमंत्री नरेंद्र मोदी हांचेर हल्लो करपाच्या बोवाळांत आमचें दुस्मान राष्ट्र आशिल्ल्या चीनाक तांणी प्रमाणपत्र दिवन उडयलें. चीनान आमची सुमार वीस हजार चौखण किलोमिटर क्षेत्रफळाची जमीन हडप केल्या आनी मोदी ताचेर कांयच करूंक शकना अशें उलोवप लोकसभेंतले विरोधी पक्ष फुडाऱ्यांन करचें हाचें कोणाकूय अजाप दिसचें. भारता सारक्या लोकशायप्रधान खंडप्राय देशाच्या लोकसभेंतले विरोधी पक्ष फुडारी इतलो अपरिपक्व आसूंक शकता काय कितें असो प्रस्न राहूल गांधीची अमेरिकेंतली उलोवपां आयकले उपरांत कोणाकूय दिसूंक शकता. पूण दुर्दैवान आयज ते वास्तव जालां. लोकसभेंतलो विरोधी पक्ष फुडारी कसो आसचो न्हय हाचें उदाहरण म्हूण आयज राहूल गांधी हांचे कडेन आमी पळोवंक शकता. विरोधी पक्ष फुडाऱ्यां कडल्यान नेमकीं कसली अपेक्षा आसता हें हाचें पयलींच्या खूबशा विरोधी फुडाऱ्यांंनी दाखोवन दिलां.
अटल बिहारी वाजपेयी हांचे सयत खूबशा जाणांचो आदर्श घेवंक येतलो. पूण राहूल गांधी हांकां विरोधी पक्ष फुडाऱ्यांची जापसालदारकी वेगळी दिसता. वैयक्तीक सचोटी आनी विस्वासर्हतेचो उंचेलो मापदंड राखप हें खरें पळोवंक गेल्यार विरोधी पक्ष फुडाऱ्यांचें खरें काम आसा. पूण आयज हें चित्र दिसप कठीण जालां. ह्या अपेक्षांची पुरतताय करून विरोधी पक्ष फुडाऱ्यान निरोगी लोकशाय सुनिश्चीत करपाक आनी सत्ताधारी पक्षाक एक घटमूट पर्याय प्रदान करपाक म्हत्वपूर्ण भुमिका वठोवप अपेक्षीत आसता. पूण आयज हें चित्र अभावानूच पळोवंक मेळटा. राहूल गांधी हे नव्या राजकी पर्वातले विरोधी पक्ष फुडारी आसात. तांणी स्विकारिल्लो मार्ग कितलो मेरेन योग्य आसा हाची जाप येवपी काळूच दितलो.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
