भांगरभूंय | प्रतिनिधी
मुख्यमंत्री: सांखळे अखील भारतीय सहकार सप्ता सुवाळो
सांखळी: क्रेडीट सोसायट्यांनी रिणां घेवन उपरांत तीं फारीक करप ना अशे तरेचे लुटीचे धंदे सेगीत वाडल्यात. एकूच व्यक्ती आपल्या वाठारांतल्या खुबश्या सोसायट्यांनी रिणां घेवन निमाणें तें रीण फारीक करिना. तांची वृत्तीच रीण फारीक न करपाची आशिल्ल्यान आतां हाचे मुखार अशा परंपरीक क्रेडीट सोसायट्यांक सरकारा वतीन परवानगी मेळची ना. सहकार खात्यान हाचे मुखार अशा नव्या परंपरीक क्रेडीट सोसायट्यांक परवानगी दिवची न्हय. उरफाटें सोसायट्यांनी प्रधानमंत्री विमो येवजणेंतल्यान दरेक रिणाचो विमो करचो. हें परिपत्रक सहकार खात्यान काडचें अशें आवाहन मुख्यमंत्री डॉ. प्रमोद सावंत हांणी सांखळे रवींद्र भवनांत केलें.
सांखळे रवींद्र भवनांत गोवा थ्रीफ्ट क्रेडीट सोसायटी आनी हेर विवीध सोसायट्यांच्या जोड पालवान 72वो अखील भारतीय सहकार सप्ता 2025 हे कार्यावळींत मुख्यमंत्री उलयताले.
ह्या वेळार माचयेर गोंय राज्य सहकारी बँकेचे अध्यक्ष पांडुरंग कुट्टीकार, उपाध्यक्ष कृष्णा कुडणेंकार, सहकार खात्याचे निबंधक आशुतोष आपटे, मुखेल उलोवपी म्हूण बुलढाणा सहकारी पतसंस्थेचे सिईओ शिरीष देशपांडे आनी हेर मानेस्त हाजीर आशिल्ले.
देशांत 75 वर्सां उपरांत पयलेच फावटी सहकार मळार उदरगत सादपा खातीर केंद्र सरकारान स्वतंत्र सहकार खातें स्थापन केलां. ताचें मंत्री केंद्रीय गृह मंत्री अमीत शाह हेच आसात. हाचे वेल्यान सहकार मळार देशांत उंचेल्या पांवड्यार व्हरपाचो सरकाराचो विचार आसा. गोंय सरकारानूय सहकार मळार नवे नवे बदल हाडपाचो विचार केला. ह्या मळा वेल्यान गोंयांतल्या विवीध माध्यमांक जोडून ताचो लाव लोकांक दिवपाचो विचार आसा अशें डॉ. प्रमोद सावंत हांणी म्हणलें.
स्वयंपूर्ण गोंय हे संकल्पने खाला गोंयांत भाजी लागवड, फुलां, डेरी, नुस्त्याचें उत्पादन खूब वाडलां. हाचे परिणाम फुडारांत सकारात्मकपणान दिसून येतले अशेंय तांणी मुखार उलयतना म्हणलें.
मजगतीं, हे कार्यावळींत सुमार 200 विद्यार्थ्यांचो मुख्यमंत्र्यां हस्तुकीं भोवमान केलो. कांय वेंचीक सहकार मळा वेल्या मानेस्तांचोय भोवमान केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
