भांगरभूंय | प्रतिनिधी
म्हापालिकेची कसिनो आड जावपाची आशिल्ली बसका जालीच ना
पणजी: मांडवी न्हंयेंतल्या नव्या कसिनो बोटी आड थाराव घेवपा खातीर काल जावपाची आशिल्ली पणजी म्हापालिकेची बसका जालीच ना. हाका लागून थळाव्यांनी म्हापालिकेच्या सभाघरांत बसकण मारून आंदोलन केलें. ह्या वेळार पुलिसांनी वाल्मिकी नायक हांचे सयत हेर कांय आंदोलकांक उबारून सभाघरा भायर काडले. सुमार दोन वरां उपरांत आंदोलन तात्पुरतें स्थगीत केलें. ह्या वेळार पद्मश्री लिबिया लोबो, सबिना मार्टीन हांचे सयत पणजेंतले हेर नागरीक हाजीर आशिल्ले.
हे विशीं वाल्मिकी नायक हांणी सांगलें, हाचे आदीं म्हापौर रोहीत मोंसेरात हांणी कसिनो विशया विशीं 12 फेब्रुवारी दिसा बसका घेतले अशें सांगिल्लें. हाका लागून आमी सकाळीं 11 वरांचेर हांगा आयिल्ले. पूण हांगा आयले उपरांत अशी बसका नाशिल्ल्याचें समजलें. आमी हांगाच बसपाचो निर्णय घेतले उपरांत पुलिसांच्या बळाचो वापर करून कांय जाणांक भायर काडले. बसका जावपाचीच नाशिल्ली जाल्यार म्हापौरांनी आमकां फाटीचें आस्वासन कित्याक दिलें? तांचेर, पुलिसांचेर कोणाचें चेपण बी आसा? हाची जाप आमकां मेळूंक जाय.
सरकारान मांडवी न्हंयेंतली पोरणी बोट वचून थंय नवी बोट येतली अशें सांगिल्लें. पूण नवी बोटी 112 मिटर लांब आनी 27 मिटर उंच आसा. ही बोट सुमार 9 माळ्याचे इमारती इतली उंच आसा. बोटीची तांक लेगीत पांच पटीन वाडल्या. हे बोटीक मार्ग काडून दिवपा खातीर दोन कसिनोंक हालोवचें पडटलें. व्हड कसिनोक लागून पणजेंतली समस्या लेगीत आनीक वाडटली. पणजेकारां खातीर हो खूब मोटो विशय आसा. हाचेर नगरसेवकांनी चर्चा करप गरजेचें आसा. काल जाल्ल्या प्रकारा विशीं म्हापौरांक पत्र बरयलां आनी आमी हाची फाटपुरवण करतले अशें वाल्मिकी नायक हांणी सांगलें.
आमकां घाणीतलें न्हय बरें नुस्तें खावंक जाय: लिबिया लोबो
मांडवी न्हंयेंतल्या कसिनोंक आमचो विरोध आसा. आमकां कसिनोंची घाण खावपाची नासून बरें नुस्तें खावपाचें आसा. मांडवी न्हंयेंत कसिनो येवचो न्हय हे खातीर आमचो लढो सुरूच उरतलो अशें लिबिया लोबो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
