भांगरभूंय | प्रतिनिधी
येजमान न्युझिलॅण्ड आनी भारत ह्या पंगडां मदीं आयच्यान टी-20 माळेक सुरवात जाता. हालींच ऑस्ट्रेलियेंत सोंपिल्ले संवसारीक टी-20 क्रिकेट सर्तींत दोनूय पंगड सेमी फायनलींत हारिल्ले. तें अपेस विसरून दोनूय पंगड नव्यान सुरवात करपाक इत्सूक आसतले.
संवसारीक टी-20 सर्तींतले पयले मॅचींत पाकिस्तानान न्युझिलॅण्डाक हारयिल्लो, जाल्यार दुसरे सेमी फायनलींत भारताक इंग्लंडा आड लजेक घालपी हार घेवची पडिल्ली. भारत 10 विकेटींनी हारिल्लो.
2021त युएईंत जाल्ले संवसारीक टी-20 सर्तीत भारताचें आव्हान सुपर 12त सोंपिल्लें. ते उपरांत भारतान बॅटिंगे सयत आक्रमक दृश्टीकोण स्विकारिल्लो, ताका लागून भारताक द्विपक्षीय माळांनी येस मेळपाक सुरवात जाली. पूण, अंदूंचे संवसारीक टी-20 सर्ती पयलीं भारताचे बॅटिंगेचो दृश्टीकोण भरकटलो अशें जाणकारांक दिसलें. विशेशः इंग्लंडा आडचे सेमी फायनलींत पयल्या स ओव्हरींनी बॅटिंगेंत आनी बॉलिंगेंत इंग्लंडाच्या आक्रमक खेळाचे तुळयेंत टीम इंडियान सामकें बाबत प्रदर्शन केलें.
फुडले संवसारीक टी-20 सर्तीक अजून दोन वर्सां बाकी आसात. भारताक इंग्लंडा भशेन आक्रमक वृत्तीन खेळपा खातीर स्वताक तयार करपाक फावोसो वेळ आसा. फुडले संवसारीक टी-20 सर्तींत पंगडाचो संभाव्य मुखेली हार्दिक पांड्या हो रोहित शर्माचे गैरहाजेरेंत न्युझिलॅण्डाचे भोंवडेर भारताचें फुडारपण करतना दिसतलो.
आधनीक खेळाचो गरजो पुर्ण करपाक वेवस्थापन फक्त टी-20 तज्ञांचो आस्पाव करपाक इत्सूक आसा अशें हंगामी मुख्य प्रशिक्षक व्ही व्ही एस लक्ष्मणान सुचीत केलां. ताका लागून आयचे मॅचींत ईशान किशन आनी शुभमन गिल हे आयचे मॅचींत डावाची सुरवात करतना दिसुये. बॅटिंगेंत प्रयोग चालू आसतना अंदूं इशान किशन आनी शुभमन गिल हांणी डावाची सुरवात केल्या. ताचो फायदो तांकां न्युझिलॅण्डाचे भोंवडेर जावपाक शकता.
बॉलिंगेंत लेग स्पिनर युजवेंद्र चहल, चायनामॅन कुलदीप यादव आनी ऑफ स्पिनर वॉशिंग्टन सुंदर हांचेर खऱ्या अर्थान टीम इंडियाची भिस्त आसतली. भुवनेश्वर कुमार आनी अर्शदीप सिंग नवो बॉल हाताळतले.
दुसरे वटेन न्युझिलॅण्ड आपलो बळिश्ट पंगड मैदानांत देंवतलो. भारता भशेन ताका लेगीत संवसारीक टी-20 सर्तीचे सेमी फायनलींत अपेस आयिल्लें. हातूंतल्यान स्वताक सांबाळून तो परतून जैताच्या मार्गार येवपाक इत्सूक आसतलो. डॅव्हॉन कॉन्वे आनी फिन अॅलन हांचेर धांवड्यो करपाची जापसालदारकी आसतली. मुखेली विलियम्साक संवसारीक टी-20 सर्तींत जलद रितीन धांवड्यो करपाक जमूंक नाशिल्ल्यो. तोय लेगीत लय मेळोवपाक इत्सूक आसतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
