भांगरभूंय | प्रतिनिधी
पणजी : दुरुस्तीच्या कामा खातीर नवो मांडवी पूल २७ मार्च ते ५ एप्रील मजगतीं, सगल्या तरेच्या येरादारी खातीर बंद उरतलो. ह्या धा दिसां मजगतीं येरादारी आदल्या पुला वेल्यान वळयतले. जाल्यार १२ टनां परस चड वजनाचीं वाहनां अटल सेतू मार्गान वळयतले. हे विशीं भौशीक बांदकाम खात्यान हालींच आदेश जारी केला.
फाटल्या म्हयन्यांत खात्यान आदल्या मांडवी पुलाचें दुरुस्ती काम केल्लें. ह्या वेळार हो पूल १५ दीस बंद दवरिल्लो. हाका लागून पणजी तशेंच पर्वरी वाठारांत येरादारीची कोयंडी जावन चालकांक बरेच त्रास सोंसचे पडिल्ले. पणजेचीं स्मार्ट सिटीचीं कामां तशेंच पर्वरेच्या महामार्गाचीं कामां, हाची येरादारी कोयंडींत भर पडिल्ली. हांगा विशेश करून सकाळीं आनी सांजे वेळार वाहनांच्यो रांको लागिल्ल्यो.
हाचे मजगतीं कांय शालेय परिक्षा आशिल्ल्यान पालक तशेंच विद्यार्थ्यांक मनस्ताप सोंसचो पडिल्लो. उपरांत नवो मांडवी पूल २ ते १० मार्च मजगतीं बंद करपाचो निर्णय जाल्लो. मात, ताका विरोध जाल्ल्यान दुरुस्ती काम फुडें धुकल्लें. आतां २७ मार्च ते ५ एप्रील मजगतीं नवो मांडवी पूल बंद करपाचो निर्णय घेतला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
