भांगरभूंय | प्रतिनिधी
प्रकल्पाक मान्यताय दितना लोकसंख्येचो विचार जायना
पणजी : नवो प्रादेशीक आराखडो तयार करपाचो सरकाराचो कसलोच विचार ना. लोकसंख्येची आंकडेवारी नाशिल्ल्यान प्रकल्पांक मान्यताय दितना लोकसंख्येचो विचार जायना, अशी लेखी जाप नगरनियोजन मंत्री राणे हांणी दिल्या. आमदार कार्लोस फेरेरा आनी आमदार विजय सरदेसाय हांणी हो लेखी तारांकीत प्रस्न विचारिल्लो.
सरकार घरनिर्माण वा हेर प्रकल्पांक मान्यताय दितना गांवांतल्या वा वाठारांतले लोकसंख्येचो विचार करता काय? असो प्रस्न कार्लोस आनी विजय सरदेसाय हांणी केल्लो. २०११ उपरांत राज्यांत जनगणना जावंक ना. हाका लागून गांवचे लोकसंख्येची आकडेवारी सरकाराकडेन उपलब्ध ना. घरनिर्माण तशेंच हेर प्रकल्पांक गोंय जमीन उदरगत आनी इमारत बांदकाम नेमां २०१० प्रमाण मान्यताय दिता. तशेंच ओडीपींतल्या तजविजे प्रमाण एफएआर, रस्त्याची रूंदाय तशेंच पार्किंगाचो विचार करून प्रकल्पांक मान्यताय दितात, अशें लेखी जापेंत म्हणलां.
रस्त्याची रूंदाय ६ मिटरा परस उणी आसतना प्रकल्पांक मान्यताय कशी दिली? अशें लेखी प्रस्नांत विचारिल्लें. जमीन उदरगत आनी इमारत बांदकाम नेम २०१० प्रमाण सरकारान रस्त्यांच्या रूंदायेचो विचार करून प्रकल्पांक मान्यताय दिल्या, अशें लेखी जापेंत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
