भांगरभूंय | प्रतिनिधी
नवी दिल्ली, खबरां संस्था ः कोणाकूय आतां चडांत चड 9 सिम कार्डां घेवंक मेळटात. ताचे परस चड खरेदी केल्यार 50,000 ते 2 लाख मेरेन दंड जावं येता. तेच बरोबर चुकीच्या मार्गान बनावट सिम कार्ड मेळयल्यार 3 वर्सां बंदखण आनी 50 लाख रुपया मेरेन दंड भरचो पडूं येता. आयच्यान म्हळ्यार 26 जून सावन देशभरांत नवो ‘दूरसंचार कायदो 2023’ लागू जाला.
ह्या कायद्या प्रमाण सरकाराक राश्ट्रीय सुरक्षा निमतान खंयचीय दूरसंचार सेवा वा नेटवर्क जप्त करपाक, वेवस्थापन करपाक वा स्थगीत करपाक मेळटा. तशेंच झुजा सारके परिस्थितींत गरज पडल्यार सरकाराक दूरसंचार नेटवर्काचेर संदेश आडावंक मेळटा.
नव्या नेमा प्रमाण आतां भारतांतल्या खंयच्याच मनशाक 9 परस चड सिम कार्डां मेळूंक शकनात. तेच बरोबर जम्मू-काश्मीर आनी ईशान्य राज्यांतल्या लोकांक चडांत चड 6 सिम कार्डां मेळटलीं. चड घेतल्यार पयलेच खेपे 50 हजार रुपया आनी उपरांत दर खेपे 2 लाख रुपया दंड आसा.
नव्या दूरसंचार कायद्या विशीं…
० भारतीयांक चडांत चड 9 सिम कार्ड घेवंक मेळटात.
० 9 परस चड सिम खरेदी केल्यार 50,000 ते 2 लाख मेरेन दंड.
० बनावट सिम कार्ड घेतल्यार 50 लाख दंड, 3 वर्सां बंदखण.
० आणीबाणीच्या वेळार सरकार नेटवर्क वा दूरसंचार सेवा खंडीत करूंक शकता.
० आणीबाणीच्या वेळार तुमकां जाय थंय संदेश पातळावपाक आडोवपाक शकता.
० प्रचार संदेश धाडचे पयलीं गिरायकाची संमती घेवप गरजेचें.
० सगळे पोरणें दूरसंचार कायदे रद्द करतले.
० दूरसंचार परवानो जारी करप सोंपें जातलें.
कायद्यांत 62 कलमां, 39 चालीक लायल्यांत
फाटल्या वर्सा 20 डिसेंबराक लोकसभेंत आनी 21 डिसेंबराक राज्यसभेंत दूरसंचार विधेयक मंजूर जाल्लें. उपरांत राष्ट्रपती द्रौपदी मुर्मू हांचे संमती उपरांत ताचें कायद्यांत रुपांतर जालें. ह्या कायद्यांत वट्ट 62 कलमां आसात, तातूंतलीं फकत 39 चालीक लायल्यांत.
दूरसंचार क्षेत्राचेर नियंत्रण दवरपी 138 वर्सां पोरणो भारतीय टेलिग्राफ कायद्याचे सुवातेर हो कायदो येतलो. ते भायर भारतीय वायरलेस टेलिग्राफ कायदो 1933 च्या जाग्यार हें विधेयक येतलें. ट्राय कायदो 1997 त दुरुस्ती जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
