नवोदयांतलो वाद तेंगशेर

भांगरभूंय | प्रतिनिधी

सध्या वाळपयचें जवाहर नवोदय विद्यालय वादांत सांपडलां. कारण जालां महाराष्ट्रांतल्या 25 विद्यार्थ्यांची घेतिल्ली प्रवेश परिक्षा. हे कथीत भानगडीची चवकशी करची अशी मागणी पालकांनी केल्या. ती करपाचें आस्वासन सत्तरीच्या उपजिल्होधिकाऱ्यान दिलां. तिडकल्ल्या पालकांची वाळपय उपजिल्होधिकारी कार्यालयांत बसका जाली. तातूंत विद्यालयाच्या वेवस्थापनानूय वांटो घेतिल्लो. तांणी दिल्ल्यो जापो पालकांक पटूंक नात. मागीर ते आक्रमक जाले आनी निमाणे ह्या प्रकाराची पुराय चवकशी करपाचे आदेश उपजिल्होधिकाऱ्यान दिले. चवकशी अहवाल पालकां मेरेन पावतलो अशें आस्वासनूय तांणी दिलां. ते प्रमाण तो बेगीन पावचो…. आनी हातूंत कोणूय दोशी सांपडले जाल्यार तांचेर कायद्यान कडक कारवाय जावची.
जवाहर नवोदय विद्यालय ही सीबीएसई शिक्षण मंडळाच्या अभ्यासक्रमा प्रमाण चलता. चडश्या राज्यांनी थळावी भास, हिंदी, इंग्लिशींत शिक्षण दितात. 1986 वर्सा आदले प्रधानमंत्री राजीव गांधी हांचे संकल्पनेंतल्यान हें निवासी विद्यालय सुरू जालें. प्रज्ञानं ब्रह्म हें ऋग्वेदांतले वाक्य ह्या विद्यालयाचें बोधवाक्य. प्रकट ज्ञान हेंच ब्रह्म असो ताचो अर्थ. केंद्रीय शिक्षण मंत्री ताचो अध्यक्ष आसता. सवी ते बारावे मेरेनचें शिक्षण ह्या विद्यालयांत मेळटा. 11 ते 19 वर्सां पिरायेच्या भुरग्यांक हांगा प्रवेश दितात. 2022 वर्सा हांगा 2 लाख 87 हजार 568 भुरगीं शिकतालीं. हांगां प्रवेश मेळचो म्हूण साबार विद्यार्थी (म्हणल्यार तांचे पालक) यत्न करतात. गोंयां भायल्या राज्यांनी तर अक्षरशा सर्त लागता. सादारण अडेज लाखां वयर विद्यार्थी पांचवे यत्तेंत आसतना ही नवोदयाची प्रवेश परिक्षा दितात आनी तातूंतले 50 हजारांच्या आसपास पास जातात. पास जावप तितलें सोंपें न्हय. ह्या विद्यालयाचो सीबीएसई मंडळाच्या परिक्षांनी दर वर्सा बरो निकाल लागता. हाचे वयल्यान ह्या विद्यार्थ्यांची गुणवत्ता कळटा. देशाच्या प्रशासकीय मळाचेर आघाडेचेर आशिल्ले बरेच अधिकारी हांगा शिकल्यात. हांगा शिकप्यांक मुफत शिक्षण मेळटा. जेवण, रावपाची वेवस्था फुकट. गणभेस, पुस्तकां, हेर शालेय सामानूय मुफत. सुटयेंत घरा येतात, तेन्ना रेल्वे, बशीची तिकेटूय दितात.
वाळपय नवोदय विद्यालय फाटीं इमारतीचे बाबत वेवस्थेक लागून वादांत सांपडिल्लें. कारण ताचो थेट फटको विद्यार्थ्यांक बसतालो. आतां तें गाजता प्रवेश परिक्षे खातीर. गोंयांत वाळपय आनी काणकोण म्हालांत 1- 1 नवोदय विद्यालय आसा. वाळपयच्या विद्यालयांत उत्तरेंतल्या पांच तालुक्यांतल्या विद्यार्थ्यांकूच प्रवेश दिवपाक मेळटा. तसो नेम आसा. तरीय राज्या भायल्या विद्यार्थ्यांक, तोय 25 जाणांक प्रवेश कसो दिलो? इतलें धाडस कोणे केलेंच कशें? नेमांत, कायद्यांत तशी पळवाट बी आसा? दरेका राज्यांत हीं विद्यालयां आसात. लोकसंख्ये प्रमाण तांचो आंकडो. महाराष्ट्रांत 75 परस चड विद्यालयां आसतना त्या भुरग्यांक वाळपय कित्याक हाडलीं? काणकोणांय बी भायले विद्यार्थी आसात? जर वाळपय बोगस कागदां करून प्रवेश दिला जाल्यार हो गुन्यांव जालो. हे विशीं भुरग्यांची कांय चूक ना. तांच्या पालकांक जापसालदार धरचे पडटले. ह्या विद्यालयाच्या एका कर्मचाऱ्याचो हातूंत हात आसा, असो आरोप सत्तरींतल्या पालकांनी केला. पुरावो आसले बगर ते ओगीच कोणाचेर आरोप करचे नात. म्हणटकच उपजिल्होधिकाऱ्यान ते नदरेन पावलां उखल्ल्यार बरीं. तो कर्मचारी गोंयचो काय महाराष्ट्रांतलो, तेंय पळोवचें. हे कायदो मोडून परप्रांतियांक प्रवेश दिवपाचे प्रकार अंदूंचेच काय पयलीं सावन चल्ल्यात, ताचीय चवकशी करची. नवोदयाच्यो आदल्यो नोंद वह्यो तपासल्यार तें कळटलें. विद्यार्थ्यांचो मूळ पत्तो तातूंत सांपडटलो. काय तोय बदल्ला?
बसकेंत सुरवेक नवोदयाच्या अधिकाऱ्यांनी, पालकांक आमी बांदील नात. ताका लागून संबंदीत अधिकाऱ्यांकूच आमी तपशील दितले अशी भुमिका घेतली. ताचेर विद्यालय हें लोकांचें. सरकाराचो पयसो ताचे खातीर खर्च जाता, अशें सांगून पालकांनी नेम, कायदेच सांगपाक सुरवात करतकच अधिकाऱ्यांनी अखेरेक तपशील दिवपाचें मान्य केलें. पालकांनी हें प्रकरण लावन धरलां. मात तांकां निमाणें मेरेन खंबीर रावचें पडटलें. हे विशीं नवोदय विद्यालय समिती कडेन, केंद्र सरकारा कडेन कागाळ करपाचें तांणी थारायलां. आरटीआय घालून प्रवेश दिल्ल्यांचीं कागदां घेवपाचेंय थारायलां. दोशी व्यक्तींचेर कारवाय जातली हे खातीरूय यत्न करपाचो निर्णय घेतला. ह्या लढ्यांत ते यशस्वी जाले जाल्यार गोंयच्या 25 भुरग्यांक थंय प्रवेश मेळटलो. तिडकल्ले कर्मचारी तांकां सतावचे नात, हाचेरूय पालकांक उपरांत लक्ष दवरचें पडटलें. लढाय अजून सोंपूंक ना. विद्यार्थ्यांचो बरो फुडार घडोवपी देशांतल्या एका आघाडेच्या विद्यालयांत हें अशें घडपाक जायनाशिल्लें.