भांगरभूंय | प्रतिनिधी
भ्रश्टाचाराक लागून समाजाचो विकास आडावला. जर नव्या तरणाट्यांनी मुखार सरून वेंचणूक जिखली जाल्यारुच नितळ आनी प्रामाणीक उदरगत जातली.
आयच्या युवा तरणाट्यानी राजकारणांत येवपाक जाय. देशाचो फुडार तांच्या हातांत आसा. ते शिकिल्ले, उच्च पदार पावल्यात. नोकरी करतात. सध्याची राजकी स्थिती पळयल्यार तातूंत बरोच बदल जावंक जाय. उच्च शिकिल्ल्या सगल्यां कडेन नवे विचार, उत्साह, सळसळतें रक्त आसा, आंगात जोश आसा. ते उलयतात ते सिद्ध करून दाखोवपाची धमक तांच्या आंगांत आसा. उर्जाशक्त, विचारांचें भांडार, ज्ञान, सकारात्मक बदल घडोवन हाडपाची इत्साशक्त आसा.
आयचें राजकारण बुरशें अशें लोक म्हणटात. आयच्या डिजीटल युगांत देशाक शिक्षीत फुडारपणाची गरज आसा. आमची आदली पिळगी विचारान, अणभवान समृद्ध आसा. तांच्या बऱ्या संस्कारांची भुती आयचे युवा पिळगेक मेळ्ळ्या. आयचे युवक भारताचो फुडार घडोवंक सोदतात. ते राजकारणांत येवप खरेंच बरें. तांची बुद्धीमत्ता तिव्र आशिल्ल्यान नवी कल्पना, विचार मांडपाची, समाजांत सकारात्मक बदल घडोवन हाडपाची तांक आसा. आयज रोजगार, तंत्रज्ञान, पर्यावरण हांचें एकत्रित आकलन फक्त युवा पिळगी करूं शकता. देशाक उदरगतीच्या मार्गार व्हरपाक युवकांनी राजकारणांत येवपाक जाय. ताका नवें मुखामळ दिवंक जाय.
देशाचे उदरगती खातीर प्रामाणीक. शिक्षीत फुडारी गरजेचे आसात. भ्रश्टाचाराक लागून समाजाचो विकास आडावला. जर नव्या तरणाट्यांनी मुखार सरून वेंचणूक जिखली जाल्यारुच नितळ आनी प्रामाणीक उदरगत जातली. समाजांत सकारात्मक बदल जातलो.
राजकारण म्हणलें काय बऱ्याच लोकांक पयलो याद जाता तो भ्रश्टाचार. तो मुळा पसून हुमटून उडोवपाक तरणाट्यांनी भितर येवंक जाय. ते आयल्यार आमच्या देशाची उदरगत जातली. समाजा विशीं बांधिलकी आशिल्ल्या तरणाट्यांनी वेवस्थेचें शुद्धीकरण करपाक मुखार येवचें. हें फकत नवी पिळगीच करपाक शकता. तरणाट्यांनी मनार घेतलें आनी राजकारणांत येवन समाजकारण केलें जाल्यार आमचो भारत देश सगल्या मळांचेर उच्चांक गाठू शकतलो. स्वयंपूर्ण भारत, आत्मनिर्भर भारत जावपाक वेळ लागचो ना. तेन्ना तरणाट्यांनी विचार करचो.
– सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
