भांगरभूंय | प्रतिनिधी
प्रवीण बगळी : वेवसायाक उर्बा दिवपाक सरकाराक उलो
भांगरभूंय । प्रतिनिधी
पेडणें : प्रामाणीकपणान खर मेहनत केली जाल्यार चार म्हयन्यांत मीठ वेवसायांतल्यान बरो अर्थीक लाव जावपाक शकता. ते खातीर नवे पिळगेन मीठ वेवसायांत आवडीन मिठागरांनी देंवचें. सरकारी नोकरे परस ह्या वेवसायांत उण्या वेळांत, उण्या काळांत चड पयशे जोडपाक मेळटा, अशें मत तिसरे पिळगेंतले परंपरीक पद्दतीन मीठ वेवसाय करपी आगरवाड्या वयल्या प्रवीण बगळी हांणी उक्तायलें.
आगरवाडो पंचायतींतल्या शापोरा न्हंयेदेग वाठारांत आदीं आठ मिठागरां आशिल्लीं. पूण हालींसराक कांय वेवसायीक मीठ वेवसायांत खूब आडखळी निर्माण जाल्ल्या ह्या वेवसाया कडेन आडनदर करतात.
आगरवाड्यार सध्या चार मिठागरां चालू आसात. नवी पिळगी ह्या वेवसायांत येतली जाल्यार तांकां आदीं मनांतल्यान आवड आसपाक जाय. मीठ वेवसाय कसो करतात, हे संबंदांत जाणून घेवपा खातीर एकादो नवो वेवसायीक आपले कडेन आयलो जाल्यार ताका आपूण फुकट मार्गदर्शन करपाक शकता, अशें बगळी हांणी सांगलें.
नोव्हेंबर लागतकच बगळी मिठागरांत देंवता. थंयचीं मुळावीं कामां सुरू करता. जानेवारी लागता म्हणल्यार ते विक्रमी मीठ उत्पादन करता. पोरूं ताच्या मिठाक खुबूच मागणी आशिल्ली. ह्या वेवसायांक सरकारान अर्थीक मजत करची, अशी कोणाचीच इत्सा नासता, पूण तांचे मुखार आशिल्ल्या मुखेल आडखळी पयस करून सरकारान तांकां उर्बा दिवची, अशी मागणी बगळी हांणी केली. प्रवीण बगळी हांचे कडेन कांय हायस्कूल, उच्च माध्यमिकाचे विद्यार्थी येतात. ते मीठ वेवसाय कसो करतात, ते खातीर कसली प्रक्रिया करतात, हे समजून घेवचे खातीर मिठागरांत येवन बगळी हांकां मेळटात. बगळी लेगीत तांकां वेवस्थीत म्हायती दिता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
