भांगरभूंय | प्रतिनिधी
लोलयेंच्या श्रीदामोदर विद्यालयाच्या शतकपूर्तीच्या निमतान शाळेंतल्या 42 वर्सांच्या (1972 ते 2014) म्हजे प्रदीर्घ तशेंच विक्रमी अशे शिक्षकी कारकिर्दींतल्या आनी खास करून (2008 ते 2014 काळांतल्या) मुख्याध्यापक पदावेल्यान उबारिल्ल्या उद्येगपर्वाच्या इतिहासाचें हें सिंहावलोकन.
कर्तव्यदक्ष, मायेस्त सहशिक्षक आनी वांगड्यांच्या पालवान शाळेच्या इतिहासांत पयलेच फावटी एसएससी परिक्षेंत 100% निकाला सयत साबार नाविन्यपूर्ण, सुंदर तशेंच प्रबोधनपर कार्यावळी चालीक लावन विद्यार्थीजीण अणभवांनी गिरेस्त केली. गुरुजनांचो आदर- भोवमान करीत, विंगडविंगड मळांचेर उत्कृश्ट यश मेळयत तशेंच साबार मळांवेल्या दिग्गज अशा प्रतिभावंताची भेट शाळेक घडयत, तिची शिक्षणीक उदरगत सादीत आसतनाच अत्याधुनिक साधनसुविधांची निर्मणी करून विद्यालयाच्या विकासाचें पर्व उबारपाची पयली गरज आशिल्ली ती शाळेचे नवे इमारतीचें सपन साकारपाची! बरोच काळ पयशांच्या उणावाक लागून फक्त तळमजल्याच्या सांगाड्याच्या रूपांत पडून आशिल्लें हें काम पयल्या मजल्या सकट पूर्ण करपाक गरज आशिल्ली ती सरकारा कडच्यान मुख्यमंंत्री भोवमानेस्त मनोहरबाब पर्रीकार पुरस्कृत साधनसुविधा अनुदानवजा रिणाचो 10 लक्ष रुपयांचो दुसरो हप्तो मेळोवपाची. तशेंच मुख्यमंत्री भोवमानेस्त दिगंबरबाब कामत पुरस्कृत तशेंच 75 वर्सा पूर्ण जाल्ल्या शाळे खातीर आशिल्या 25 लक्ष रुपयांच्या एकरकमी अनुदान येवजणेचो (OTGS) लाव मेळोवपाची. पूण ते खातीर एकतर साधनसुविधा अनुदानवजा रिणाचो पयलो हप्तो वापरिल्याचो तपशील सरकाराक सादर करप गरजेचें आशिल्ले. तो तर हांवे सुपुर्द केलोच. दुसरे वटेन एकरकमी अनुदान येवजणेचो लाव मेळोवपा खातीर सोपस्कार आनी बरोच काळ प्रलंबित आशिल्ली संस्थेचीं कामां तडीक लायलीं. गरजेचीं कागदां कश्टान मेळोवन आमच्या विनवणी अर्जाची फायल हांवें थेट तशेंच स्वामीमहाराजां मार्फतय मुख्यमंत्र्या वरवी शिक्षण संचालकां कडेन धाडून दिली.
शिक्षण संचालकपदार आशिल्ली हरशी शिस्तप्रिय, पुण खाष्ट बायल शाळेक 75 वर्सा पूर्ण जाल्ल्याचे सिद्ध केले बगर दाद दिवपाक तयार नाशिल्ली. अर्थातच ते आव्हान आशिल्लें. हरतरेन यत्न करूनय ह्या संबंधान कसलेच कागदोपत्री पुरावे तर मेळनाशिल्ले. शेवटाक शल्लाक पेटून दामोदर देवस्थानांतल्या पुर्तुगेज काळांतल्या पोरण्या कागदांतल्या मोडी लिपीतल्या लिखाणाचेर संशोधन करून फाव ते संदर्भ मेळोवपाक आनी शक- सालाची सांगड घालून शाळेक निर्णायकपणान 75 वर्सा परस चड वर्सा पूर्ण जाल्ल्याचें सिद्ध करपाक म्हाका यश मेळ्ळें. पुण तरीकूय आपणा कडेन मोडी लिपीचो तज्ञ नाशिल्ल्याचे निमित्त करून ही बायल दाद दिवंक तयार नाशिल्ली.. शेवटाक सगळ्या वाटांनी म्हायती काढून म्हज्या व्हडल्या भावाचो मेवणो डॉ. राजीव कामत हांचे मध्यस्थेन तांचो लागींचो सोयरो आशिल्ले पुरातत्व खात्याचे आदले संचालक डाॅ. शंकर कामत म्हामाय हांची भेट घेवन तांचे कडच्यान आमचे शाळेक 75 परसय चड वर्सां पूर्ण जाल्याचो म्हजो सप्रमाण दावो खरो आशिल्ल्याचे अधिकृत पत्र मेळोवपाकय म्हाका यश मेळ्ळें. सदर पत्रासकट सगळ्यो आवश्यक गजाली शिक्षण संचालिके कडेन सुपुर्द करूनय झारयेंतल्या शुक्राचार्याची भूमिका घेतिल्ली ती बायल अडेलतट्टूपण करीत आशिल्ल्याचे पळोवन म्हाका थेट मुख्यमंत्र्या वरवी तिका कानपिचक्यो दिवन एकरकमी अनुदानाचो मार्ग मोकळो करून घेवचो पडलो. अश तरेन अक्षरशः भगीरथ प्रयत्नांतल्यान आनी मूलगामी संशोधनांतल्यान एका परस एक आव्हानां पेलून आनी फक्त पुढाकारच न्हय तर चिकाटीन फाटपुरवण करून शिक्षण खात्या मार्फत एक रकमी अनुदान 25 लक्ष रुपया आनी साधनसुविधा रिणाचो दुसरो हप्तो 10 लक्ष रु. मेळोवन इमारतीचे काम मार्गी लावपाक म्हाका यश मेळ्ळेंच.
नवे इमारतीच्या बांधकामाचो मार्ग प्रशस्त जायत आसतानाच धावेच्या गणित विशयाचे प्रश्नसंच तयार करचे खातीर म्हजे वांगडा काम केल्ल्यो कुडचडेच्या न्यू इंग्लिश हायस्कूलाची ज्येश्ठ शिक्षिका भोवमानेस्त कलावती आंगले हांकां लागून म्हज्या परिचयांत आयिल्ले तांचे सोयरे आनी ग्लोबल कॅपिटल मार्केटाचे अध्यक्ष वै. संजय हेगडे हांची (कृष्ण सावित्री चॅरिटेबल ट्रस्टा वरवीं) पांच लक्ष रूपयांची तशेंच म्हजे इश्ट वै. रंगनाथ आचार्य हांकां लागून म्हज्या परिचयांच आयिल्यो साहित्यकार माधवी देसाय हांचे मध्यस्थेन बाधकाम मंत्री भोवमानेस्त सुदिन ढवळीकार हांच्या ढवळीकर ट्रस्टाची पांच लक्ष रूपयांची अर्थीक मदत मिळोवन आनी तानशी, लोलयेचे सद्गृहस्थ राम गांवकार हांची 1.25 लक्ष रूपयांची मोलादीक मदत मेळोवन विद्यालयाच्या नूतन शोभिवंत वास्तूचे निर्मितीचोच न्ही तर कोटा लादयो वापरून शाळेच्या इंदिराकांततीर्थ सभाघराच्या कोटा लादयो वापरून सोबितीकरणाचोय मार्ग प्रशस्त करपाकय म्हाका यश मेळ्ळें. म्हजे शेजारी अरूण माधव भट हांची सून सौ. प्रियागा अर्वेश भट (आदली सपना सरमळकार) हांच्या बरेपणान सिप्ला कंपनी कडच्यान इमारती खातीर लायटीची साधनां आनी तांचे जोडणे सकट हेर बरीच मदत लाबली. विद्यालयाचे आदले मुख्याध्यापक उमेश जीवोत्तम नायक हांचे कडच्यानय फर्निचरा खातीर मोलादीक मदत जाली. साबार फावटी तांची तरेकवार प्रकारची मदत आमकां लाबल्या.
सातत्यान केल्ले फाटपुरवणेच्या बळाचेर, वैयक्तिक प्रतिश्ठा पणाक लावन आनी सरकारी कार्यालयातल्या तांबड्या फितीच्या कारभाराक शिटूकसाणेन बगल दिवन 19 लक्ष रु. मैदान अनुदान मेळोवन क्रीडांगणाचें काम मार्गी लावपाकय यश मेळ्ळें. ह्या कामात तेन्नाची उपसंचालक ज्युलियाना हांचें मोलादीक सहकार्य लाभले. शाळे खातीर भव्य क्रीडांगणाचे हें सपन कितलींशींच वर्सा हांव पळयत आशिल्लो. त्या खातीर क्रीडा संचालनालयाची अनुदान येवजणूय आशिल्ली. पुण हांगाय किचकट सोपस्कारांच्या वांगडा एक बिकट आव्हान उबें आशिल्ले. जे जमनीचें मैदानांत रूपांतर करपाचें तिचो रीतसर मालकी हक्कच शाळेच्या वा संस्थेच्या नावान नाशिल्लो. ही जमीन संस्थेची आशिल्याचे सिद्ध करून रीतसर संस्थेच्या नावान करून घेवप अत्यावश्यक आशिल्लें. श्री दामोदर देवालयान शाळेक दान म्हणून दिल्ल्याचें फकत आयकूंक येतालें. ही (4050 चौ.मी.) जमीन देवालयान शाळे खातीर संस्थेक दान रूपान दिल्ल्याच्या देवालयाच्या पुर्तुगेज कागदांचो अभ्यास करून खूब यत्नांनी ती संस्थेच्या नांवान करून घेवपाचें कामय हांवें पूर्ण केलें. या कामा खातीर गांवचे सुपुत आनी अतिरिक्त जिल्हाधिकारी प्रसन्न अरविंद आचार्य हांची मोलादीक मदत मेळ्ळी. शाळेच्या वसतीगृहा खातीर पसून फोमेंतो कंपनी कडच्यान भरघोस साधन सामुग्री मेळोवन दिवपाच्या कामांकय तांचें मोलादीक सहकार्य मेळ्ळें. ह्याच काळांत शाळेक समाज- कल्याण खात्या वरवी पयलो बालरथूय मेळिल्ल्यान एक खूब काळ आडकून उरिल्ली गरज पूर्ण जाली.
(मुखार चलता)
(लेखक लोलयेंच्या श्रीदामोदर विद्यालयाचे आदले मुख्याध्यापक आसात.)
शंभू गोपाळ प्रभू देसाय
9403272947
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
