भांगरभूंय | प्रतिनिधी
मंत्री मॉवीन गुदिन्हो : पोरणो उड्डाण पूल मोडचे ना
भांगरभूंय । प्रतिनिधी
वास्को : नवेवाडे ते शांतीनगर हांकां जोडपी पोरणो पूल मोडिनासतना ताचे कुशीक दुसरो नवो पूल बांदपाची संकल्पना रेल्वेन मुखार हाडल्या. ताका लागून पोरणो पूल येरादारी खातीर बंद जावचो ना, अशें पंचायत मंत्री तशेंच दाबोळीचे आमदार मॉवीन गुदिन्हो हांणी स्पश्ट केलें.
पोरणो पूल मोडून थंय नवो आनी दोनपदरी रूंद पूल बांदपा खातीर थंयची येरादारी एक वर्स बंद दवरची पडपाची. ताका लागून नवेवाडे आनी शांतीनगरांतल्या लोकांची व्हड गैरसोय जावपाची. नव्या निर्णयाक लागून लोक समाधानी जातले, अशें गुदिन्हो हांणी म्हणलें.
नवेवाडे आनी शांतीनगराक जोडपी रेल्वे उड्डाण पूल हो एकपदरी आनी अशीर आसा. ह्या पुला वयल्यान उदकाची व्हडली पायपलायन व्हेल्या. ताका लागून तो पूल लोकां खातीर खूब गैरसोयीचो जाला. थंय कसली तरी उपाय येवजण करची, अशी लोकांची मागणी आशिल्ली. ते संबंदांत दखल घेवन मंत्री गुदिन्हो हांणी थंय नवो आनी रूंद पूल बांदपाचो निर्णय घेतिल्लो. ह्या निर्णयाक रेल्वेन पाचवो बावटो दाखयल्लो. ते खातीर पुला वयली उदकाची पायपलायन दुसरे कडेन स्थलांतरीत करपाची आशिल्ली. ते प्रमाण थंय काम लेगीत सुरू जाल्लें. तशेंच नवो पूल बांदपाच्यो हालचाली सुरू जाल्ल्यो. पूण तो पूल बांदपाक सुमार वर्सभराचो काळ वतलो आशिल्लो. ताका लागून थंयची येरादारी वर्सभर बंद जातली आशिल्ली. हे खातीर लोक हुस्क्यांत सांपडिल्ले. तांणी आपले म्हणणें मंत्री गुदिन्हो हांचे मुखार मांडलें. ते प्रमाण आतां थंयच्या आराखड्यांत रेल्वे वतीन बदल केला.
हे संबंदांत मंत्री गुदिन्हो हांणी थंयच्या पुलाची पळोवणी केली. ह्या वेळार तांचे वांगडा उपजिल्हाधिकारी भगवंत करमली, मुरगांवचे नगराध्यक्ष गिरीष बोरकार, रेल्वेचे अधिकारी, पालिका अधिकारी, पुलीस आनी येरादारी पुलीस अधिकारी तशेंच हेर प्रतिनिधी उपस्थीत आशिल्ले. फुडल्या 10 दिसांत उड्डाण पुला वयली उदकाची पायपलायन नवे सुवातेचेर हालयतले. ते उपरांत नव्या पुलाचें काम हातांत घेतले. तशेंत थंय वोल्त मारपा खातीर एक सर्कल बांदतले. ताका लागून वाहन चालकांची गैरसोय पयस जातली, अशें गुदिन्हो हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
