भांगरभूंय | प्रतिनिधी
पणजी ः 1 एप्रील सावन नवें शिक्षणीक वर्स सुरू करपाच्या सरकाराच्या निर्णयाक विरोध करपी याचिका पालकांनी उच्च न्यायालयांत दाखल केल्ली. मजगतीं, सरकारान दाखल केल्ल्या प्रतिज्ञापत्राक जाप दिवपाक याचिकादारांनी वेळ मागिल्ल्यान सुनावणी सोमारा जातली. ताका लागून नवें शिक्षणीक वर्स 1 एप्रील सावन सुरू जातलें काय ना तें आतां फुडल्या सोमारा थारतलें.
यत्ता सवी पसूनचे नवें शिक्षणीक वर्स 1 एप्रील सावन सुरु करपाचो निर्णय सरकारान घेतला. पूण ह्या सरकाराच्या निर्णयाक वेगवेगळ्या वाठारांतल्या पालकांनी विरोध करपाक सुरवात केल्या. ह्या पालकांनी आपापल्या आमदारांक मेळून शिक्षणीक वर्स 1 एप्रील सावन सुरू करचें न्हय अशी मागणीय केल्या. देखून कांय आमदारांनीय ह्या निर्णयाक विरोध करपाक सुरवात केल्या.
पूण पालक आपल्या स्वार्था खातीर ह्या निर्णयाक विरोध करतात अशें मुख्यमंत्री डॉ. प्रमोद सावंत म्हणटात आनी 1 एप्रील सावन शिक्षणीक वर्स सुरू करपा विशीं आपल्या निर्णयाचेर ते ठाम आसात. देखून कांय पालकांनी ह्या निर्णयाक उच्च न्यायालयांत आव्हान दिलां. तांचे याचिकेचेर न्यायालयांत सोमारा सुनावणी जातली. हे सुनावणे उपरांतच नवें वर्स केन्ना सुरू जातलें तें थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
