नवें शिक्षणीक धोरण आनी गोंय

भांगरभूंय | प्रतिनिधी

सरकाराचीं आनी खाजगी वेवस्थापनांचीं उच्च माध्यमीक विद्यालयां आसात पूण तांचे कडेन शाळा नात तांकां हें कशें जमतलें? जांच्यो शाळा आसात पूण उच्च माध्यमीक विद्यालयां नात तांकां हें कशें जमतलें?

नवें शिक्षणीक धोरण ह्या शिक्षणीक वर्सा सावन गोंयांत लागू करपाचो निर्णय जावन ते संबंदान शिक्षण संचालनालया कडल्यान
शिक्षण संस्थांक परिपत्रकां आयलीं. ह्या शिक्षणीक वर्सा सावन मुळावो पांवडो 1 वर्गांत (अपरेक / नर्सरेक) 3 वर्सां पुराय जाल्ल्यांकूच नोंदणी करपाक मेळटली अशेंय थारलां.
शिक्षणीक धोरण कितलेंय बरें आसलें तरी तें धोरण अंमलांत हाडप्यांक म्हणल्यार शिक्षकांक जर ते तरेचें प्रशिक्षण मेळ्ळें ना जाल्यार ताचो कांयच फायदो जायना हें आमी सातत्यपूर्ण सर्वंकश मुल्यमापन (सी सी ई) हे वरवींय पळयलां. भुरगीं आठवी मेरेन नापास जावचीं नात हें शिक्षणा कडेन संबंदीत आशिल्ल्या कांय जाणांनीच भुरग्यांच्या तकलेंत भरून एक पिळगी वाट लायली.
सातत्यपूर्ण सर्वंकश मुल्यमापनाचो अर्थ सारको समजावन सांगनासतना आदल्या सरकारी आस्थापनांनी सगल्या शिक्षकांक शाळांनी सातत्यपूर्ण सर्वंकश मुल्यमापनाची अंमलबजावणी करपाक लायली. कांय प्रशिक्षणाचे वर्ग जालेय बी. पूण ज्या शिक्षकां भितर समजून घेवपाची तांक आनी इत्सा आशिल्ली त्याच शिक्षकांक ताचो सारखो अर्थ कळ्ळो आनी तांणी खूबश्या भुरग्यांचें भविश्य घडयलें. जे शिक्षक पगारा खातीर नोकरी करतात तांणी भुरग्यांक समजावन शिकोवचे परस सोंप्यो प्रस्न पत्रिका काडून भुरग्यांक पास केले. नापास जाल्ल्या भुरग्यांक गाळ्यो घाल्यो, तांचे खातीर आनीक सोंप्यो प्रस्न पत्रिका काडून जापो बरोवपाक लायल्यो. तांकां धुकळत धुकळत तांणी तांची आठवी पास करून घेतली आनी णव्वेक धरून आपटिले. कितल्याश्याच जाणांची शाळा सुटली. आठवी मेरेन एका वर्गांत बसपी भुरगीं णव्वेक दोन वर्गांनी बसपाक लागलीं. धावेचो निकाल 100% हाडपा खातीर शिक्षकांक मोठी कसरत करची पडली. तांकां णव्वेचो निकाल 50% परस कमी लावचो पडलो. सातत्यपूर्ण सर्वंकश मुल्यमापनाचो उद्देश कितें आशिल्लो आनी आमी ताची कशी विटंबना करून उडयली.
देखून हो इतिहास परत घडून येवचो न्ही म्हण जतनायेन पावलां मारचीं पडटलीं.
ह्या धोरणाची अंमलबजावणी करतना शिक्षण संचालनालयाची बरीच गोची जावपाची आसा. मुखेल अडचण आसतली ती साधन सुविधेची. गोंयांत पयलींच्यान मुळावी शाळा पयली ते चवथी मेरेनच धरल्या. भारतांत हेर कडेन ती पयली ते पांचवी मेरेन धरतात. गोंयच्या आतांच्या समग्र शिक्षा अभियानान आनी पयलेंच्या सर्व शिक्षा अभियानान मोठ्या कसरतीन कागदार पांचवेचो वर्ग मुळाव्या पांवड्यार आनी प्रत्यक्षांत पांचवी माध्यमीक पांवड्यार दवरून काम केलां.
आतांचें धोरण 5 – 3 – 3 – 4 अशे वर्गांचे वांटे घालता. म्हणल्यार शिक्षणाचीं पयलीं पांच वर्सां, (अपरी, बालवर्ग 1, बालवर्ग 2, पयली आनी दुसरी) जीं भुरग्यांचीं 3 ते 8 वर्सां आसतलीं, एका पंगडांत हाडल्यांत. मागीरचीं 3 वर्सां, (तिसरी, चवथी आनी पांचवी) जीं भुरग्यांचीं 9 ते 11 वर्सां आसतलीं तीं एका पंगडांत हाडल्यांत. मागीरचीं 3 वर्सां, (सवी, सातवी आनी आठवी) जीं भुरग्यांचीं 12 ते 14 वर्सां आसतलीं तीं एका पंगडांत हाडल्यांत. मागीरचीं 4 वर्सां, (णव्वी, धावी, अकरावी आनी बारावी) जीं भुरग्यांचीं 15 ते 18 वर्सां आसतलीं तीं एका पंगडांत हाडल्यांत.
गोंयांत सरकारी अंगणवाड्यो आनी बालवाड्यो बायलां आनी भुरग्यां उदरगत खात्या वरवीं चलतात. तांच्या कांय बालवाड्यां कडेन भुरग्यांक बसपाक आनी भायर खेळपाक अजिबात सुवात ना. ह्या धोरणा वरवीं एका गटांत येवपी सगल्या वर्गां भितर बरो समन्वय आसल्यारूच भुरग्याचें शिक्षण सारकें जातलें. म्हणटकूच बायलां आनी भुरग्यां उदरगत खात्याक मुखारले दोन वर्ग वाडोवचे पडले नातर हे आसात ते बंद करून ते शिक्षण संचालनालया कडेन सोंपोवचे पडटले.
भाऊसायब बांदोडकार सरकारान जेन्ना मुळाव्यो शाळा बांदून घेतल्यो तेन्ना सगल्या शाळांचो ढांचो एक सारखोच आशिल्लो. दोन कुडी जातूंत चार वर्ग चलतात. आतां तर खूब कडेन हे चारूय वर्ग एकूच शिक्षक / शिक्षिका घेता. जर बायलां आनी भुरग्यां उदरगत खात्यान अंगणवाडयो शिक्षण संचालनालया वरवीं ह्या सरकारी मुळाव्या शाळां कडेन सोंपयल्यो जाल्यार चडश्या कडेन आशिल्लो एक शिक्षक तें कशें सांबाळटलो? दोन वर्गांत, पयले पांच वर्ग आनी मुखारले तीन वर्ग शिकयतलो काय ह्या शाळांनी शिकोवपाक बालवाडींतल्यो शिक्षिकाय येतल्यो? आनी जर त्यो आयल्यो जाल्यार एका शाळेंत शिकोवपी शिक्षकांच्या (अंगणवाडी शिक्षिका आनी मुळावे शाळेंत शिकोवपी शिक्षक) पगारांत सद्याक आशिल्लें व्हडलें अंतर तशेंच दवरतले? ज्यो शाळा नीम सरकारी आसात, ज्यो खाजगी वेवस्थापन चलयता, तांचे कडेन तरी पयले तीन वर्ग घेवपाक सुवात आसा काय?
तिसरी, चवथी आनी पांचवी हे वर्ग एकठांय कशे करपाक जातले? णव्वी, धावी, अकरावी आनी बारावी ह्या पांवड्यार जे हेर विशय सुरवात करपाची मेकळीक दिल्या ताचो येशस्वीपणान लाव करून घेवपाक हे चारूय वर्ग एकाच पाख्या सकयल आसप गरजेचें आसतलें. (खाशेल्या विशयांचे शिक्षक, आतांचे कला आनी सांस्कृतीक संचालनालयांतल्यान येवपी संगीत आनी नाट्य शिक्षकां सारखे आसले जाल्यार तातूंतल्यान कांयच साध्य जावचें ना.) सरकाराचीं आनी खाजगी वेवस्थापनांचीं उच्च माध्यमीक विद्यालयां आसात पूण तांचे कडेन शाळा नात तांकां हें कशें जमतलें? जांच्यो शाळा आसात पूण उच्च माध्यमीक विद्यालयां नात तांकां हें कशें जमतलें?
ह्या मुळाव्या गजालींचेर जितले बेगीन विचार जातलो तितलें गोंयचे शिक्षणाचे नदरेन चड बरें.

चेतन आचार्य
9422389290