भांगरभूंय | प्रतिनिधी
अंदुच्या 2024 वर्सा पडदो पडटलो आनी आमी उमळशिकेन नव्या वर्सांत पावल दवरतले. एक उमेदीची भावना हवेंत भरता. डिसेंबराचे निमाणें सप्तक हो आनंदाचो, अपेक्षेचो आनी चिंतनाचो काळ आसता. कारण आमचे मदले जायते लोक संकल्प, येवजण्यो आनी उत्सव घेवन नव्या वर्साक येवकार दिवपाक तयार आसतात. पूण ही उमळशीक सभावीक आसली तरी, खास करून आमच्या देशाच्या फुडाराचें प्रतिनिधित्व करपी आमच्या तरणाट्यां खातीर हुस्क्याची. तांणी विचार करून उत्सवां कडेन वचप म्हत्वाचें.
पिळग्यां सावन नव्या वर्साची सांज मनोवपाची परंपरा लोकांक एकठांय हाडटा. यादी सांबाळून दवरपाचो, आस्त आपणावपाचो आनी मोग आनी दया वांटपाचो हो काळ. तरी लेगीत, ग्रंथपाल म्हणून म्हाका एक म्हत्वाचो हुस्को, जापसालदारपणान उत्सव मनोवपाची गरज उक्तायन दिसता. दरवर्सा 1 जानेवारी दिसा दिसाळ्यांचे माथाळे अपघात, शोकांतिका आनी पश्चातापाच्या कथांनी भरिल्ले आसतात. तरणाट्यांची उमळशीक, तशेंच सादूरतायेचो उणाव आशिल्ल्यान चड करून आनंदाचो काळ कितें आसूंक जाय हाचेर सावळी पडपी घडणुको घडटात. अतिरेकीपण, बेपरवायेन वागप आनी वैयक्तीक सुरक्षे कडेन आडनदर केल्ल्यान फकत तरणाट्यांचें जिवीत धोक्यांत येता अशें न्हय तर कुटुंबांक आनी समाजाकूय खूब दुख्ख जाता.
2025 क येवकार दिवपाची तयारी करतना, आमी आमच्या तरणाट्यांक उत्सवाची भावना परतून थारावपाक आवाहन करूंक जाय. आनंद हो जिणेचो एक अभिन्न भाग, पूण सुरक्षfततायेची वा जापसालदारकेचें मोल घेवन तो केन्नाच येवचो न्हय. उत्सवाची मजा घेयात पूण तुमच्या भोंवतणची आनी कृतीची जाणीव दवरात. तुमकां वा हेरांक लुकसाण करपाक शकता अशीं अतिरेकी कामां टाळचीं.
दरेक उत्सवा फाटल्यान एक कुटुंब आसता, जें तुजे सुरक्षीत परत येवपाची उत्सुकतायेन वाट पळयता. तुमचें कल्याण ही तांची सगळ्यांत व्हड भेट. हो विचार तुमचे निवडींक मार्गदर्शन करपाक दियात. तुमी पार्टी आयोजीत करतात वा हाजीर रावतात जाल्यार सुरक्षेचे उपाय आसात हाची खात्री करात. कसल्याय प्रभावा खाला आसल्यार गाडी चलोवप टाळचें आनी एकामेकांची जतनाय घेवची. प्रिय व्यक्तीं वांगडा वेळ वांटून घेवप वा गरजू लोकांक आदार दिवप असो हो मोसम. दयाळूपणाचीं कृत्यां तिगून उरपी याद निर्माण करतात. सकारात्मकताय आनी उद्देश घेवन वर्साची सुरवात करात. तुमच्या उत्सवांत 2025 मेरेन तुमी पाळपाच्या मुल्यांचें आनी ध्येयांचें प्रतिबिंब दिसूंक दियात.
तरणाटेपण हो खंयच्याय राष्ट्राचो खजिना. तुमची उर्जा, सपनां आनी आकांक्षा उज्ज्वल फुडाराचें उतर दितात. जापसालदारपणान उत्सव मनोवन तुमी फकत स्वताचो मान दवरनात तर हेरां खातीरय एक देख घालून दितात. 1 जानेवारी हो आशेचो, खोशयेचो आनी प्रेरणादायी माथळ्यांचो दीस आसा हाची खात्री करात. आमी 2024 क निरोप दितात आनी 2025 क येवकार दितात, तेन्ना आमी शांततायेन, मोगान आनी काळजी घेवन अशें करूंक जाय. आमी सगल्यांनी योग्य कारणांक लागून हें परिवर्तन याद उरपाक शकता, हाची जाणीव दवरुया. नव्या वर्साचीं परबीं.
– सोनिया देसाय
91587 69312
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
