भांगरभूंय | प्रतिनिधी
पणजी : सरत्या वर्साक निरोप दिवन नव्या वर्साक येवकार दिवपा खातीर सिने कलाकार, राजकारणी तशेंच सेलेब्रेंटींचें गोंय हें एक आवडीचें थळ जावन आसा. हाका लागून बरेच राजकारणी वा सेलेब्रेटी ३१ डिसेंबराक गोंयांत येतात. अंदूं लेगीत केंद्रीय मंत्री, राजकी फुडारी, न्यायाधीश हांचें गोंयांत येवपाक सुरवात जाल्या.
केंद्रीय उद्देग आनी वाणीज्य मंत्री पियुश गोयल, केंद्रीय अवजड उद्देग मंत्री एच. डी. कुमारस्वामी, कर्नाटकाचे आदले मुख्यमंत्री आनी भाजप खासदार बसवराज बोम्माय हे नवे वर्स मनोपा खातीर गोंयांत पावल्यात. तांची ही गोंय भेट खाजगी स्वरूपाची आसा, अशी म्हायती शिश्टाचार खात्याच्या गोपां कडल्यान मेळ्ळी. दिल्ली उच्च न्यायालयाचे मुखेल न्यायाधीश (ऍक्टींग) विभू बाक्रू, सर्वोच्च न्यायालयाचे न्यायमुर्ती मनमोहन हे लेगीत गोंयांत पावल्यात.
२०२४ वर्स फाल्यां सोंपता. दर्यादेगांचेर आनी हॉटेलांनी सरत्या वर्साक निरोप दिवपा खातीर बरीच गर्दी जाता. हातूंत व्हीआयपी तशेंच सेलीब्रेटींचो आंकडो मोठो आसता. फाल्यां वर्साच्या निमण्या दिसा शेंकड्यांनी व्हीआयपी, राजकारणी, उद्देजक राज्यांत दाखल जातले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
