भांगरभूंय | प्रतिनिधी
नवी मुंबय, खबरां संस्था : नवी मुंबय पुलिसांच्या अनैतिक मानवी येरादारी प्रतिबंध विभागान सेक्स रॅकेट उक्ताडार हाडलां. तें टिंडर ह्या डेटिंग अॅपा वयल्यान ऑनलायन चलतालें, देखून पुलिसांक ताचो वास लागूंक नाशिल्लो. मुखेल आरोपी सतरा वर्सां पिरायेचे चली, हे रॅकेट जतनायेन चलयताले. पुलिसांच्या बनावट गिरायका कडेन लेगीत तें अडेज म्हयने चॅटिंग करीत रावलें.
मुंबय म्हणल्यार मायानगरी, जी चित्रपट आनी टीव्हीचेर काम करपा खातीर तरणाट्यांक आकर्शीत करता. कसलोच विचार करिनासतना दर दिसा शेंकड्यांनी तरणाट्यो चलयो हांगा येतात. सगळ्यांक ‘मुखेल नटी’ जावपाचें आसलें तरी जायती जाणां मागीर एक्स्ट्रा म्हूण बारीक सारीक कामां करतात. पूण घर भाड्याचो, फिट दिसपा खातीर जीम आनी जेवणाचो अतिरिक्त खर्च भागोवपाक तांकां पयशे मेळनात, देखून तीं चुकीच्या मार्गान वतात. अशा तरणाट्या चलयांचे जायते रॅकेट जुहू अंधेरी लोखंडवाला वाठारांत चलतात. अशेंच एक रॅकेट नवी मुंबय पुलिसांनी उक्ताडार हाडलें.
कक्षाचे वरिश्ठ पुलीस निरिक्षक अतुल आहिरे हांकां अंधेरीची एक बायल वेश्या वेवसाया खातीर मॉडेल, टीव्ही कलाकारांची पुरवण करता अशी म्हायती मेळ्ळी. ती ‘टिंडर’ ह्या डेटिंग अॅपा वरवीं संपर्क करता अशेंय कळ्ळें. ताचेर आदारून आहेर हांणी बनावट गिरायक जावन बायले कडेन संपर्क सादलो. पूण गिरायक अनवळखी आशिल्ल्यान ती बायल सुमार अडेज म्हयने फकत चॅटिंग करीत रावली. पूण तरी लेगीत आहेरान बनावट गिरायकाचें नाटक चालूच दवरलें.
निमाणे ते बायलेन नामनेच्या खाजगी चॅनलांतल्या लोकप्रिय सिरियलांतल्या अभिनेत्यांची आनी कांय मॉडेलांचीं चित्रां धाडलीं. तातूंतल्या टीव्ही सिरियलांत काम करपी चार चल्यांक बनावट गिरायकांनी पसंत केले. दरेकीं 50 हजारांची मागणी केली. पूण उपरांत ती 30 हजार रुपया थारायली. ते प्रमाण आरोपी ह्या चार जाणांक घेवन बनावट गिरायकान दिल्ले एपीएमसींतल्या एका हॉटेलाच्या पत्त्याचेर आयली. त्या वेळार आरोपीन एक लाख वीस हजार मान्य केले आनी पुलीस पंगड मुखार आयलो आनी सगळ्यांक एपीएमसी पुलीस स्टेशनाचेर व्हेले.
सुरवाती सावन रॅकेट जशें चलताले ते पद्दतीन आरोपी पिरायेची बायल आसूं येता अशें पुलिसांक दिशिल्लें, पूण प्रत्यक्षांत आरोपी एक तरणाटे चलये सारके दिसताले. आनी जेन्ना रॅकेट चलोवपी १७ वर्सा पिरायेचे नेण्टे चली आशिल्ल्याचे कळ्ळे तेन्ना पुलिस लेगीत अजाप जालें.
कायद्या प्रमाण आरोपी नेण्टे आशिल्ल्यान तिका बाल सुदारणा केंद्रांत धाडले जाल्यार 20-22 वर्सां पिरायेच्या चार चलयांक बायलां सुदारणा केंद्रांत धाडले अशी म्हायती वरिश्ठ पुलीस निरिक्षक अतुल आहेरान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
