भांगरभूंय | प्रतिनिधी
पणजी : राज्यांतल्या दोन पुनर्वसन केंद्रांनी सुवातो नाशिल्ल्यान आयपीएचबींत उपचार घेतिल्ल्या दुयेतींक उपचारा उपरांतूय ह्या हॉस्पिटलांत रावचें पडटा. हाका लागून राज्यांत विवीध म्हालांत नवीं पुनर्वसन केंद्रां तयार करपाची शिफारस राज्य मानवाधिकार आयोगान केल्या. हे विशीं आयोगाचे प्रभारी अध्यक्ष डेस्मंड डिकाॅस्टा हांणी, समाज कल्याण, प्रोव्हेदोरिया आनी दिव्यांग सशक्तीकरण खात्याक पत्र बरोवन ही शिफारस केल्या. हे विशीं केल्ले कार्यवाहीचो ९० दिसांनी अहवाल दिवपाची सुचवणीय आयोगान केल्या.
मानवाधिकार आयोगाच्या पंगडान मानवी हक्कां विशीं जागरूकताय निर्माण करपा खातीर हालींच मानसोपचार आनी मानवी वर्तन संस्थेक (आयपीएचबी) भेट दिली. आयपीएचबींत सुमार १९० दुयेंती आसात. उपचार पुराय जाले उपरांत दक्षीण गोंयच्या माजोर्डा आनी उत्तर गोंयच्या म्हापशेंच्या दोन पुनर्वसन केंद्रांत धाडटात. मात सध्या ह्या दोनूय केंद्रांची तांकां आसपावन घेवपाची तांक नाशिल्ल्यान दुयेतींक उपचारा उपरांतूय आयपीएचबींत रावचें पडटा. हाका लागून नवीं केंद्रां उबारप गरजेचें आशिल्ल्याचें मत आयोगान उक्तायलें.
ताचे पयलीं पंगडान बायलां तशेंच दादलो वॉर्डांक भेट दिली आनी दुयेतीं कडेन संवाद सादलो. पुराय हॉस्पिटल आनी ताचो वाठार नितळ आशिल्लो. पंगडांतल्या सगळ्यां खातीर हो एक शिकपाचो उत्कृश्ठ अणभव आशिल्लो. आयोगान कॅन्टीन आनी रांदचीकूड वाठारांकूय भेट दिली. हाका बरे तरेन नितळसाण आशिल्ली. हांगा आहारतज्ज्ञ आनी प्रशिक्षीत कर्मचार्यां वरवीं बर्यो सुविधायो दिल्ल्याचें निरीक्षण आयोगान नोंद केलां. आयपीएचबीचे डॉ. अनिल राणे आनी हेर डॉक्टर आनी नर्सींनी पंगडाक येवकार दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
