भांगरभूंय | प्रतिनिधी
उसगांव ग्रामसभेंत थाराव; कोयर प्रकल्प उबारपाची प्रक्रिया सुरू
भांगरभूंय । प्रतिनिधी
फोंडें: उसगांव पंचायत वाठारांतल्या लोकांक उदकाची समस्या आसा. ताका लागून फुडारांत नवें नळाचें कनेक्शन दिवचें न्हय, अशें भौशीक बांदकाम खात्याक कळोवचें. थळावे उद्देगीक वसणुकेंत थळाव्या तरणाट्यांक प्राधान्य दिवचें, पंचायतीच्या खर्चाचेर नियंत्रण दवरचे खातरी सिद्धेश्वरनगरांत आशिल्ले दोन भौशीक नळ बंद करचे तशेंच हेर म्हत्वाचे थाराव आयतारा जाल्ले ग्रामसभेंत घेतले.
सरपंच नरेंद्र गांवकार हांचे अध्यक्षते खाला जाल्ले ग्रामसभेंत पंच विनोद मास्कारेन्हस, मनिशा उसगांवकार, संजय गावडे, गोविंद फात्रेकार, सचीव विनायक शेट आनी हेर पंच हाजीर आशिल्ले.
उसगांव पंचायत वाठारांतल्या लोकांक उदकाचो उणाव जाता. हे खातीर नव्या नळ कनेक्शनांक थळाव्या लोकांनी विरोध केलो. थळाव्या लोकांचो उदकाचो प्रस्न सुटावो करचे खातीर नव्या प्रकल्पांक उदकाचें कनेक्शन पंचायत मंडळान दिवचें न्हय. हे खातीर भौशीक बांदकाम खात्याक कळोवन म्हायती दिवपाचो थाराव बसकेंत घेतलो.
सिद्धेश्वरनगरांत फाटल्या कितल्याशाच वर्सां सावन दोन भौशीक नळांचें उदक बिगर गोंयकारां खातीर चालू दवरलां. पंचायती वतीन हालींच 1,73,843 रुपयांचें उदकाचें बील भरलां. भौशीक नळांचें उदक कितलेशेच खेपे व्हावून वता. ताका लागून त्या नळांचें कनेक्शन तोडपाची गरज आशिल्ल्याचो थाराव, ग्रामसभेंत घेतलो.
पंचायत वाठारांत आशिल्ले उद्देगीक वसणुकेंत थळाव्यांक नोकरेंत प्राधान्य दिनात. पंचायती वतीन सगळ्या उद्देगीक वसणुकांच्या अधिकाऱ्यां कडल्यान म्हायती घेवन नोकर भरती करपाचे यत्न करचे. जे वरवीं थळाव्यांक शिक्षणा प्रमाण रोजगार मेळपाक शकतात. तशेंच पंचायत वाठरांत बिगर गोंयकारांची संख्या वाडत आसा. भाड्याक रावपी सगळ्यांची म्हायती पुलिसां वरवीं एकठांय करपाचो थाराव ग्रामसभेंत घेतलो. पंचायत वाठारांतल्या कोयराचेर प्रक्रिया करचे खातीर म्हारवासडा उसगांवच्या कोमुनिदादचे 5 हजार चौखण मिटर जमनीचेर कोयर प्रकल्प उबारपा खातीर यत्न सुरू केल्यात. वर्सभरांत प्रकल्प सुरू करपा खातीर प्रक्रिया सुरू आसा. तशेंच गांजे वाठारांत नव्यान बांदिल्ल्या प्रकल्पा उपरांत पंचायत वाठारांत उदकाचो उणाव जावचो ना. फुडल्या एक- दोन म्हयन्यांत ह्या प्रकल्पाचें लोकार्पण जातलें, अशी म्हायती सरपंच नरेंद्र गांवकार हांणी ग्रामसभेंत दिली.
ब्लॅकस्पॉटांचेर लायतले सीसीटीव्ही कॅमेरेः सरपंच
पंचायत वाठारांतल्या रस्त्याचे कुशीक कोयर हाडून उडयतात. ताका लागून सीसीटीव्ही कॅमेरे बसोवपाची प्रक्रिया सुरू केल्या. सुमार 15 सीसीटीव्ही कॅमेरे पंचायत वाठारांतल्या ब्लॅकस्पॉटांचेर बसयतले, अशें सरपंच नरेंद्र गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
