भांगरभूंय | प्रतिनिधी
स्वतंत्र गोंयांत पयलीच वेंचणूक जावन गोंयचे दोन खासदार लोकसभेंत पावले. पयली वेंचणूक म्हणटकूच कितलीं वर्सां उलगलीं आसतलीं पळेयात. गोंयच्यान जे खासदार गेल्ले ते महाराष्ट्रवादी गोमंतक पक्षाचे. हो पक्षूच मुळांत स्थापन जाल्लो गोंयचें महाराष्ट्रांत विलिनीकरण करूंक. कोंकणी ही मराठीची बोली आनी देखून गोंय महाराष्ट्रांत घालचें ही मागणी आसली. आतां ही तांची चूक म्हणूंक जावची ना. गोंयचे चडांत चड हिंदू अशेंच मानताले. हिंदू आपणाली भास मराठी मानताले, मागीर ती उलोवंक, बरोवंक वा वाचूंक येवं ना येवं. हिंदुंची देव देवस्पणां मराठींत आसलीं. ते मराठी संत साहित्य वाचून व्हड जाल्ले म्हणटकूच तांकां अशें दिसलें म्हणून अजाप करपाचें कारण नासलें. आनी कोंकणींत म्हणून कितें आसलें?
हिंदू मराठी जाल्यार क्रिस्तांव पुर्तुगेझ कातरपी. कोंकणी म्हणटात ती कुजनांतली वा रांदचीकुडींतली भास म्हणजेच क्रियांदांची भास अशेंच मानताले ते. हाकाच लागून कोंकणीक बोली मानपी एक व्हड वर्ग आसलो. देखून तर गोंयचें विलिनीकरण जावचें अशें दिसतालें न्ही त्या लोकांक. महाराष्ट्रवादी गोमंतक पक्षाचे खासदार लोकसभेंत तीच मागणी करताले. तेच लोकसभेंत काकासाहेब कालेलकार नांवांचो एक विदुषी आसलो. मराठी मनीस हो. हाची मातृभाषा जरी मराठी आसली तरी गुजराथीचेर प्रभुत्व मेळयिल्लो हो मनीस. ते भायर आनिकूय जायत्या भाशांचो अभ्यास आसलो ताका. कोंकणीचेरूय ताणें अभ्यास केल्लो. ताणेंय आपलें मत मांडलें. कोंकणी ही एक स्वतंत्र भास म्हणपाचें ताणें थंय आशिल्ल्यांक पटोवन दिलें. कोंकणीचो उगम मराठी वांगडाच जाला म्हणपाचेंय सांगलें. फक्त कोंकणी पुर्तुगेझांच्या शेकातळा चिड्डून उरिल्ल्यान तिचो विकास जावंक पावलो म्हणपाचें मत ताणें मांडलें. तांचे वरीच आनिकूय कांय मराठी लोक आसले जांकां गोंयचें महाराष्ट्रांत विलिनीकरण नाका आशिल्लें.
कोंकणीक जर संद मेळत तर ती भरारी घेतली म्हणपाचें काकासाहेबांचें सांगप कितलें सार्थ आसलें तें आयज कोंकणीन दाखोवन दिलां. कांय वर्सां भितरूच दोन ज्ञानपीठ आनी एक शारदा पुरस्कार मेळप ही सादी गजाल न्ही. कोंकणीक मुक्त वातावरण मेळूंक जाय म्हणपाचें काकासाहेबान त्या काळार सांगिल्लें. एक मराठी मनीस कोंकणीची बाजू घेवन झगडटा आनी जांणी स्वताक कोंकणी समजून तिची बाजू मांडूक जाय आसली ते कोंकणीक मराठीची बोली म्हणटात आनी विलिनीकरण मागतात, कितली अजापीत करपाची गजाल आसली ही. नेहरूंक जर हे लोक नवलांचे दिसले तर तातूंत अजाप कसलें?
तशें पळोवंक गेल्यार नेहरूंकूच अजीब म्हणचो पडटलो. मरून साठ वर्सां जालीं तरी हो कांय लोकांक सोडीच ना. सामको कांठार बशिल्लेवरी भेश्टायता तांकां. रातदीस आपलोच जप करूंक लायता. मागीर ताका गाळी घालपा खातीर जायना, नांव तोंडांत येताच. परत परत जपचो पडटा. नेहरू हो हिंदू न्हय, ताचे पुर्वज मुसलमान आसले म्हणपाचें वेगळेवेगळे पद्दतीन सांगून जालें. सोशल मिडिया तर अजून अदींमदीं तेंच सांगता. कोणाक कसलो फरक पडलो? कांयच ना. ताका चाचा मानपी चाचाच म्हणटले न्ही? कोण खंयच्या धर्माचो, ताचे पुर्वज कोण, ताचीं कोणा वांगडा लफडीं आसलीं हें खंयच्यान तरी पुंजावन वा हांगचे फोटू थंय जोडून सोशल मिडियाचेर घालें आनी समजुया लोकांनी ते मानलें जाल्यार आयज कितें जावचें पडलां? तो ह्या देशाचो पयलो प्रधानमंत्री आसलो हें तुमी विसरूंक शकतले? ताणें फुडाराचेर लक्ष दवरून केल्लो विकास विसरूंक जातलो? 2014 पयलीं कसलोच विकास जालो ना म्हणपाचें ताळो सरांटून जरी कोणेंय सांगलें तरी ताचेर विश्वास कोण दवरतलो? देशांतलीं धरणां, कॉलेजां, आयआयटी, ऍम्स हीं नदरे आड जातलीं? हो विकास न्ही जाल्यार कितें तर?
खंयच्याय मनशाक बदनाम करतना आमी कांय गजाली विसरूंक फावनात. ताणें केल्लें कर्तुत्व, ताणें केल्लो त्याग विसरूंक जातलो? ताणें आपणालें सर्वस्व देशाक अर्पण केलां हें सत्य न्हयकारूंक जातलें? आमचे जाणटेले सांगताले, आमी जेन्ना कोणाकूय बोट दाखयतात तेन्ना आमचीं बाकीचीं तीन बोटां आमचे वटेन येतात आनी आंगठो प्रस्नचिन्न जावन उबो रावता. आनी आमकांच प्रस्न करता, तुजें कितें रे बाबा? तूं सामको नितळ? पूण आमकां ताचें पडून वचूंक ना. आमी कशेय आसूं पूण तुमकां बदनाम करतलेच. ते बगर आमी व्हड कशे थारतले?
अजाप एकेच गजालीचें दिसता. साठ वर्सां पयलीं हो संवसार सोडिल्ल्याक आज बदनाम करून कोणाक कसलें सूख मेळटलें? राहूल गांधीच्यो भगल्या उडयतात तें समजूं येता. तो तुमचो खांबो घेवंक पळेता आनी तुमकां खांबो कसोच सोडपाचो ना. पूण नेहरूंचो जप गा कित्याक? तो कितें वयल्यान परतो येवन वेंचणुकेक उबो रावतलो? मागीर कित्याक म्हणून हो जप? गोंयकार खंय अजीब न्ही. तांचो पुर्तुगेझां कडेन संबंध ना. ते भारतमातेचेंच आंग. कोण सांगता हें? गोंयांत पुर्तुगेझांची पिलावळ आसा हें फट तर? आमी केन्नाच सांगलें ना हें. कोण सांगताले तें पळयात. अजून म्हणपी आसात. ते फट उलयतात तर? तुमीच सांगल्यार बरें जातलें. गोंयकार जर भारतमातेचें आंग जाल्यार गोंयचे क्रिस्तांवूय आंग जावचे पडले नात? तांकां काय गोंया पसून वेगळे काडूंक जावचे ना. मागीर ती पिलावळ म्हणटात तें कितें?
हाचेर सारको बरो उजवाड पडूंक नाका? तो घालचोच. नासल्यार एकेवटेन तुमीच गोंयचो संबंध पुर्तुगेझां कडेन दाखयतले आनी तुमीच संबंध ना म्हणटले. एक कितें तरी सांगात न्ही? नासल्यार गोंयकार खऱ्यांनीच नवलांचेच म्हणचे पडटले. दिसना तुमकां अशें?
अभयकुमार वेलिंगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
