भांगरभूंय | प्रतिनिधी
न्हंयाचें उदक पावलें रस्त्यार; वीज पुरवण खंडीत
भांगरभूंय । प्रतिनिधी
काणकोणः आयतारा काणकोणां पावसान सांवार घातलो. सगळोच वाठार उदकांत भरलो. न्हंयो, व्हाळ, तळी उपाय भरिल्यो. न्हंयेदेगेर आशिल्ल्या अर्धफोंड, पासल, पेंगीण, किंदळे, मणगण ह्या वाठारांतल्या न्हंयांचें उदक लोकांच्या आंगणा मेरेन पावलें. तशेंच खोतीगांव पंचायत वाठारांतल्या नवराचो सुमार 40 वर्सां आदल्या पोरण्या सांकवाचो कठडो कोसळ्ळो. हो सांकव दुबळो जाल्ल्यान खोतीगांव पंचायत कार्यालया कडल्यान बड्डे, म्हाल बड्डे, येडा, कुस्के, नडकेच्या लोकां कडलो संपर्क तुटलो. हो सांकव दुबळो जाल्ल्यान ताचे वयल्यान चारचाकी वा दुचाकी व्हरपाक मनाय केल्या. ह्या सांकवाची काणकोणचे मामलेदार मनोज कोरगांवकार आनी सरपंच आनंदू देसाय हांणी पळोवणी केली.
गांवचो संपर्क तुटिल्ल्यान जेसीबी मशिनाच्या आदारान दुबळ्या जाल्ल्या सांकवाच्या दुसरे वटेन उदकाक वाट मेकळी करून दिली. तो सांकव मोडून थंय तात्पुरतो मार्ग तयार करपाचो विचार आसा. ते नदरेन भौशीक बांदकाम खात्याच्या रस्तो विभागाच्या अभियंत्याक आपयला, अशें देसाय हांणी सांगलें.
पावसाक लागून काणकोणच्यो सगळ्यो न्हंयो, व्हांळ, व्हाळुल्यो उपाट भरिल्ल्यान भाटपाळचे तळपण न्हंयेच्या उदकाची पातळी वाडल्या. भाटपाल पुला लागसारच्या रस्त्याचेर तशेंच अर्धफोंड, घोटकामळ, भाटपाळ अळंबी फॅक्टरी लागसार उदक भरलां. घोडकेमळ आनी भाटपाळ पुला लागसार रस्त्याचेर उदक सांचिल्ल्यान आनी उदकाच्या झोतान दुचाकी न्हंयेच्या पात्रांत वचपाची शक्यताय आशिल्ल्यान कसलीच दुर्घटणां घडची न्हय हे खातीर काणकोणचे उपजिल्होधिकारी मधी नार्वेंकार हांणी सगळ्या खातें मुखेल्यांक परिस्थितीचेर नदर दवरपाचे आदेश दिल्यात. तशेंच भाटपाळ, घोडकेमळ, नवरा खोतीगांव वाठारांत पुलीस दवरिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
