भांगरभूंय | प्रतिनिधी
न वरात्र. सद्याक नवरात्रीचो रंग देशभर उधळला. णव रातींक देवींच्या णव रुपांचें पुजन आव्हान करून तिची भक्ती आराधना करप. शैलपुत्री, ब्रह्मचारिणी, चंद्रघंटा, कूष्मांडिती, स्कंदमाता, कात्यायनी, कालरात्री, महागौरी आनि सिद्धीपुत्री अशीं ह्या देवींच्या णव रुपांचें महिमा मंडन करप. देशभर हो सण व्हड उमेदीन आनी दबाज्यान मनयतात. कायं कडेन हो सण दुर्गा मातेची मुर्ती स्थापना करून गरबा, दांडिया सयत रंगता. गोंयांत ह्या सणाची खाशेलपणां म्हणल्यार देवळांनी जावपी मखरां. देवीक सुंदर शृंगार न्हेसोवन लखलखीत सजयिल्ल्या मखरांत बसोवन धोलोवप. धोल ताश्यांच्या गजरांत तिका आरती उंवाळून तिची स्थुती करप. सगल्यांक एकठांय हाडपी हो उमेदीचो सण णव रातींच्या दिवजा उपरांत दशमी दिसा दसऱ्याच्या कौलान सांगता जाता. पूण हो सण इतल्यानूच हांगाच सोंपता काय? देवीचें स्वरूप आमचे मदीं फक्त नवरात्री पुरतेंच? आनी सदांच देवीच्या स्वरुपान समाजांत आसपी नारी, महिला, अस्तुरी तांचें कितें ? तांची पुजा करप, तांचो आदर करप हेंवूय नवरात्र उत्सवा सारखेंच न्हय? काय फक्त देवीच्या दिसा तिका प्रकट करपाक उपास, पुजन करप हेंच योग्य ? नारी / महिला / अस्तुरी – हिवूय देवीचींच रुपां न्हय. नवरात्रींचें जागरण म्हत्वाचें जाल्यार नारी सशक्तीकरण ? ताजे कशें? ताका कांयच म्हत्व ना ?
नारी हो शब्द ल्हान आसत, पूण तो तितलोच कठीण? घरांत भुरग्यां खातीर आवय, घोवा खातीर घरकान्न, भावा खातीर भयण, जाल्यार समाजांत दोतोर, आदवोगाद, फुडारी, उद्देजक, शिक्षक आनी किदें किदें न्हय ? नारी म्हणल्यार काळजी, नारी म्हणल्यार शिकवण, नारी म्हणल्यार समाजीक उदरगत, नारी म्हणल्यार निपुणता, नारी म्हणल्यार फुडारी, नारी म्हणल्यार शेतकार, नारी म्हणल्यार उद्देजक, नारी म्हणल्यार केन्नाच न हालपी एक बुन्याद. वेगळ्या वेगळ्या नात्यांक, वेगळ्या वेगळ्या कारणांक वेगळीं वेगळीं रुपां, पूण नांव एकुच नारी. आयचो हो समाज बायलांक प्राधान्य दिना अशें म्हणप योग्य जावचें ना. जर अशें आशिल्लें जाल्यार आयज आमचे मुखार शिक्षिका, दोतोर, आदवाेगाद, उद्देजक ह्यो अस्तुऱ्यो समाजांत आमचे मदीं दिसच्यो नाशिल्ल्यो. नारी आनी नारी-सशक्तीकरण ह्या विशयाचेर म्हज्या विचार आनी दिश्टीकोणांतल्यान उजवाड घालपाचो म्हजो हो ल्हानसो यत्न.
नारी सशक्तीकरण म्हणल्यार एक बळिश्ट आनि संक्षिप्त विधान जें महिलांचे आनी समाजीक प्रगतीचें दृश्य आमकां स्पश्ट जाणून दिता. नारी सशक्तीकरण म्हणल्यार बायलांक तांचो अधिकार दिवप न्हय, तर तांचे भितरली शक्ती, तांची तांक पारखून समाजान तांकां समान हक्क आनी स्थान मेळोवन दिवप. जर बायल शिक्षीत, स्वावलंबी आनी राजकी रुपान सक्रीय जायत जाल्यार ती कुटुंबांत, समाजांत आनी देशांत बदल घडोवन हाडूंक शकता. खरें म्हणल्यार नारी सशक्तीकरण हो मुद्दो बायलांची समस्या न्हय तर ती एक मानवी दिश्टीकोण समस्या. कसलेंय काम करपाची योग्यताय पारखून जावं तें काम तिच्यान जातलें काय ना हे चिंतप लेगीत म्हणल्यार चुकीचें. तिची तांक जाणले बगर अस्तुरेक कमी लेखपाचो आमकां कसलोच अधिकार ना. आयच्या काळांत अशक्य अशें एकूय कार्य ना, ज्यो बायलो करूंक शकनात. आनी हाचें थेट उदाहरण दिवपी हालींच जाल्ल्या भारतीय सेनेचें जैतिवंत ऑपेरेशन सिंदूर. तांचें शौर्य आनी तांच्या पराक्रमांचो प्रमाण तांणी देशा मुखार जे पद्दतीन दवरलो तो तुमी पळयलाच आसतलो. नारी सशक्तीकरणाचें मुखेल घटक शिक्षण, अर्थीक, राजकी, समाजीक विकास आनी कायदो. हें सगलें मेळून एक सशक्त समाज घडोवन हाडूंक शकता. आयज कसलेय दिशे वाटेन पयलें पावल म्हणल्यार शिक्षण. पिराय मतींत दवरिनासतना जाता ते पद्दतीन बायलांक शिक्षीत करपाची गरज आसा. शिक्षीत बायल आपलो अर्थीक विचार करपाक पावतली. शिक्षीत आनी अर्थीक बायलो उद्देजक मन उभारून येतलीं. तांचे लघू उद्देग आनी तांचे अर्थीक मंडळ समाजाची तशेंच देशाची अर्थवेवस्था सुदारपक मजत करतली. तांकां बऱ्या सुविधांचो लाभ घेवंक मेळटलो. बारीक सारीक कामाक लागून कोणांक पांय पडपाची गरज उप्रासची ना. ती स्वतंत्रपणा पयश्यांचो वेव्हार करपाक भाग पडटलीं. तांका बऱ्यो नोकऱ्यो मेळटल्यो. तांचो अर्थीक विकास, तांच्या कुंटुंबाचो विकास जातलो आनी ती आपल्या भुरग्यांक बरें शिक्षण मेळोवन दिवंक शकतलीं. बायलाे समाजांत एकवटान येत जाल्यार राजकी दिशे कडेन तांची वाटचाल जातली. महिला राजकी फुडारी म्हूण फुडें येतलीं. आपलो स्वाभिमान राखपाक आनी तिगोवन दवरूंक तांकां योग्य ते तंत्र आनी प्रशिक्षण दिवप गरजेचें.
आयज बायलो खंयच्याच पांवड्यार कमी नात. भूंय तें मळब लेगीत तांणी आपल्या ताब्यांत घेतलां. तरी, खंय तरी कांय प्रतिबंध, कायं अडखळ्यो, कांय शिमो तांकां बांदून दवरतात. कोण घालता हीं बंधनां? खंय तरी उणें पडपी त्या मनशांची मानसीकताय. तीं बंधनां तोडपाची गरज असा. ती मानसीकताय बदलपाची गरज आसा. स्वताचें रक्षण करपाक, स्वताचे निर्णय स्वता घेवपाक, ती शीम मोडून पावल मारपाक तांकां तेंको दिवपाची गरज आसा. तांकां धीर दिवपाची, तांची स्फूर्त, उर्बा वाडोवपाची गरज आसा. तूं करूंक शकता, तुज्यान तें जातलें अशें म्हणून तांची तुस्त करपाची गरज आसा. जर काय तुमी अशें करूंक शकले जाल्यार एक चलो म्हूण, एक भाव म्हूण, एक बापूय म्हूण, एक नागरीक म्हूण, एक देशवासी म्हूण तुमकांच तिचो चड अभिमान दिसतलो. तुमच्या नवरात्रीच्या उत्सवाचो सार्थ जातलो. देवी तुमचेर सदांच प्रसन्न रावतली. तुमच्या उद्देशाक येस लाभतलें. जय अंबे जय जगदंबे जय अस्तुरी…
मधूर शांताराम नायक
9764241598
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
