भांगरभूंय | प्रतिनिधी
नवरात्रांचो उत्सव देशभर व्हडा खोशयेन आनी उमेदीन मनयतात. नवरात्र उत्सवाची सगळींजाणां आतुरतायेन वाट पळयतात. कारण ह्या उत्सवांतलें एक खाशेलपण म्हणल्यार गरबा आनी दांडिया. दुर्गा देवीच्या णव रुपांची णव दीस पुजा करतात. नवरात्रांत गरबा आनी दांडिया नाचाची खास करून गुजरातांत व्हड परंपरा आसा. ताका धर्मीक म्हत्वूय आसा. पूण हालींसराक सगळ्याच राज्यांनी ही परंपरा चलत आयल्या. ताका गोंयूय आडवाद ना.
नवरात्रांत गरबा आनी दांडियाचें चड आकर्शण आसता. घागरो, चोली आनी पारंपरीक अलंकार घालून हे नाचाचे प्रकार व्हडा उमेदीन आनी उर्जेन सादर जातात. पूण, दोगांय मदीं फरक आसा. देवीच्या आरती पयलीं गरबा नाच करतात, जाल्यार देवीचे आरती उपरांत दांडिया नाच करतात. गरबा आनी दांडिया ह्या दोनूय नाचांचो उगम गुजरातांत जाला.
गरबा आनी दांडिया हो नाचाचो प्रकार आशिल्ल्यान ताच्या सादरीकरणा फाटल्यानय धर्मीक म्हत्व आसा. गरबा नाचाचो प्रकार वेगवेगळ्या तरांनी करतात. पारंपारीक दिव्यां भोंवतणी गरबा करतात. गर्भ ह्या उतरा वयल्यान गरबा हें उतर तयार जालां. देवतेचेर आदारिल्ल्या गीतांचेर हो गरबा नाच करतात. तो नाच सदांच गोल भोंवून एके विशिश्ट पद्दतीन करतात. त्या वेळार धर्मीक पदां म्हणटात.
दांडिया नाचाचो प्रकार माता दुर्गा आनी महिषासुर हांचे मदल्या झुजाचें प्रतीक. पूण, लोक तरसादीच्या बदला रंगीत बडयो घेवन नाचतात. धर्मीक समजुती प्रमाण नवरात्रां वेळार गरबा वा दंडिया खेळप खूब म्हत्वाचें. देखून दर दिसा सांजवेळा णव दीस माता दुर्गेची पुजा करून थंय हाजीर आशिल्ले भक्त दुर्गा देवीचे मूर्ती मुखार दांडिया खेळटात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
