भांगरभूंय | प्रतिनिधी
पणजी : राज्य अवयव आनी पेशी प्रत्यारोपण संघटणा (सोटो) आनी गोंय वैजकी महाविद्यालया वतीन (गोमॅको) नर्सीं खातीर एका दिसाचें कार्यशाळेचें आयोजन केल्लें. हातूंत क्रॉनीक किडनी रोग आनी तांच्या उपचारां विशीं मार्गदर्शन केलें. कार्यशाळेंत राज्यभरांतल्यो १०० नर्सी वांटेकार जाल्ल्यो. सोटो गोंयचो जोड संचालक डॉ. प्रीती वर्गीस हांणी तांकां मार्गदर्शन केलें.
हातूंत किडनी दुयेतीं कडेन संबंदीत विभाग, डायलिसीस युनीट, आयसीयू, ट्रान्सप्लांट युनिटांतल्यो नर्सी वांटेकार जाल्ल्यो. कार्यशाळेंत शिक्षणीक सत्रां सयत प्रश्नमंजुषा अशें सत्र-आधारीत कायारवळी घेतल्यो.
हातूंत क्रॉनीक किडनी रोग जाल्ल्या दुयेतींच्या भलायकेचो प्रवास, उपलब्ध उपचारांचे पर्याय, हेमोडायलिसीस आनी पेरिटोनियल डायलिसीस सारकिल्ल्या उपचार पद्धतींची म्हायती दिली. कार्यशाळेचो उद्देश नर्सींक ह्या रोगा विशीं चड काळजी घेवपा खातीर सक्षम करप होच आशिल्लो.
किडनी प्रत्यारोपणा सारकिल्ल्या चड काळाच्या उपाचारांचेरूय चर्चा केली. ह्या वेळार जिवंत दाता किडनी प्रत्यारोपणा विशीं चर्चा केली. किडनी रोग दुयेंती दर मंगळारा आनी शुक्रार गोमॅकोंतल्या ब्लॉक जॉयंट ट्रान्सप्लांट क्लिनिकांत येवन स्वताचें मुल्यांकन करपाक शकतात. अवयव प्रत्यारोपणाक लागून दुयेतींक बर्या दर्जाचें जीवनदान मेळटा. ते निरोगी मनशा सारके सगलें काम नेमान करपाक शकतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
