भांगरभूंय | प्रतिनिधी
तेहरान, खबरां संस्था : अंदूंचो शांततायेचो नोबेल पुरस्कार जाहीर जाला. इराणी बायल विज्ञानीक आनी मनीस हक्क वावुरपी नर्गीस मोहम्मदीक तो फावो जालो. बायलांचें स्वातंत्र्य आनी हक्क विशयाचेर नर्गीस हांणी बरोच वावर केला. तिका १३ फावटीं अटक जाल्या. सरकारा आड सातत्यान झगडटना तिका आपलो घोव, भुरगीं, करियर सगल्यांचेर उदक सोडचें पडटां. इराणांतल्या डिफेंडर्स आॅफ ह्युमन रायट सेंटराची ती उपाध्यक्ष. नोबेल शांती पुरस्कार जैतिवंत शिरीन इबादी अध्यक्ष. नर्गीस हो पुरस्कार मेळोवपी दुसरी इराणी बायल.
५१ वर्सां पिरायेची नर्गीस आजूनय इराणांतले बंदखणींत कैद आसा. तिका ३१ वर्सां बंदखण आनी १५४ फटके मारल्यात. सरकारा आड अपप्रचार केल्ल्या आरोपा खाला इराणान तिका अटक केल्या. नोबेल मेळ्ळ्या उपरांत नर्गीस हांकां ८.३३ कोटी रुपयांचें इनाम आनी भांगरा पदक भेटयतले. तिणें बंदखणींतल्या बायलांचे मुलाखतींचेर ‘व्हायट टाॅर्चर’ हें पुस्तक बरयलां. हाचेर सिनेमाय आयला.
नर्गीसान स्वताचें स्वातंत्र्य पणाक लागून दुय्यम वागणूक मेळपी इराणी बायलांच्या स्वातंत्र्या खातीर आनी सगल्यांक मनीस हक्क मेळचे हे खातीर फाटलीं बरींच वर्सां वावर केला. तेच खातीर तिका बंदखणीची ख्यास्त दिल्या. तिच्या घोवाक आनी दोन भुरग्यांक देश सोडून वचपाक सांगलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
