भांगरभूंय | प्रतिनिधी
वक्तव्यान संसदेंत बोवाळ: खासदाराक निलंबीत करपाची मागणी
नवी दिल्ली, खबरां संस्था: भाजप फुडार्यांनी जायते फावटीं प्रधानमंत्री नरेंद्र मोदींची तुळा देव विष्णू कडेन केल्या. आतां भाजपाच्या आनीक एका खासदारान संसदेंत अशेंच वक्तव्य केल्ल्यान बोवाळ जाला. ‘प्रधानमंत्री नरेंद्र मोदी आदल्या जल्मान छत्रपती शिवाजी महाराज आशिल्ले’ अशें वक्तव्य खासदार प्रदीप पुरोहीत हांणी केलां. उपरांत सभाघरांत बोवाळ जाल्लो पळोवपाक मेळ्ळो. मजगतीं, तांचें हें वक्तव्य संसेदेच्या कामकाजांतल्यान काडून उडोवपाचे आदेश उपसभापतींनी दिले.
प्रदीप पुरोहित हांणी सांगलें, हांव ज्या वाठारांतल्यान येतां, तो दोंगराळ वाठार. हांगा गिरीजाबाबा नांवाचे एक संत रावतात. तांचे कडेन उलयतना तांणी योग्य तेंच सांगिल्लें. तांणी म्हणिल्लें, आयज जे प्रधानमंत्री नरेंद्र मोदी आसात तांचो पूर्वजल्म छत्रपती शिवाजी महाराजांचो आशिल्लो. आतां तांचो दुसरो जल्म नरेंद्र मोदी म्हणून जाला. हाका लागून ते आपल्या भारताक सगल्यांत बळीश्ट राष्ट्र करपाचो यत्न करतात.
खासदार वर्षा गायकवाड हांणी सांगलें, अखंड हिंदुस्तानाचें आराध्य दैवत आनी रयतेचे राजे छत्रपती शिवाजी महाराज हांचो सेगीत अपमान करपाचे आनी महाराष्ट्रांतल्या तशेंच संवसारभरच्या शिवप्रेमींची अस्मिताय दुखोवपाचें नियोजीत कारस्थान भाजपाचे फुडारी करतात. ह्या लोकांनी छत्रपती शिवाजी महाराजांचो मानाचो जिरेटोप नरेंद्र मोदी हांच्या माथ्यार बसोवन शिवरायांचो अपमान केला. भाजपाचो आमी जाहीर निशेध करतात. भाजप शिवद्रोही आसा. शिवरायांचो अपमान आमी कशेच सोंसचे नात. नरेंद्र मोदींनी देशाची माफी मागची आनी खासदाराक निलंबीत करचें अशें तिणें म्हणलें.
असले लोक खंयच्या जल्म घेतात?
खासदार संजय राऊत हांणी सांगलें, हे महाशय संसदेत उलयतात. नरेंद्र मोदींचो आदलो जल्म आशिल्लो, त्या जल्मांत ते छत्रपती शिवाजी महाराज आशिल्ले अशें ते म्हणटात. हांची भाजपा खर्या शिवाजी महाराजांक मानिना. तांचे शिवाजी फकत नरेंद्र मोदी. असले लोक खंयच्यान जल्म घेतात? भाजपाने शिवाजी महाराजांचो अपमान केला. माफी मागपाक जाय.
मजगतीं, भाजपाच्या खासदाराच्या त्या वक्तव्याचेर पुराय देशांतल्या लोकांनी आनी विरोधकांनी प्रतिक्रिया उक्तायल्यात. ह्या वक्तव्याचो निशेध केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
