नरकासूर आनी आवाजाचें प्रदुशण

भांगरभूंय | प्रतिनिधी

नरकासुराचे रातीं आवाजाक लागून कायदो माड्डुपाची एकूय घडणूक नदरेक येवंक ना. जर कायदो कोणे पाळूंक ना जाल्यार ते विशीं कारवाय करपाची जापसालदारकी पुलिसांची आशिल्ली. आमचे कडेन आवाजाच्या प्रदुशणाची कसलीच कागाळ येवंक ना, अशें गोंय प्रदुशण नियंत्रण मंडळान स्पश्ट केलां. हाचो अर्थ, व्हडल्या आवाजा विशीं कोणे कागाळ केल्याच जाल्यार ती पुलिशेंत केल्या वा ते रातीं कोणेच आवाजाची मर्यादा हुपूंक ना. रातीं 10 उपरांत आवाज बंद करपाचो आदेश गोंय मनीस हक्क आयोगान पुलिशेक दिल्लो. थोडे कडेन फोन करतकच पुलिसांनी रातीं 12 उपरांत नरकासूर आयोजकांक संगीत बंद करपाक लायिल्लें. पूण, हेर कडेन 12 उपरांतूय बोवाळ चलिल्लो. दुयेंती, जाण्ट्यांक, ल्हान भुरग्यांक, मोनजातीक कितें भोगलां आसतलें तें तेच जाणात! आतां मुखार दर्यादेगांचेर आवाज प्रदुशणाक ओतो येतलो, तेन्ना तरी प्रदुशण नियंत्रण मंडळान हाची दखल घेवची. ते खातीर जादा कर्मचारी दवरचे. कारण ह्या बोवाळाचेर रातचें बारा उपरांतूच चड नियंत्रण दवरपाची चड गरज आसता. लोकांक कागाळ करपाक फोन नंबरुय दिवचे.
जाचे खातीर बोवाळ जाता, तो हो नरकासूर प्रागज्योतिशपुराचो राजा. हो वाठार आसामांतल्या गुवाहाटींत पडटा. णवव्या शेंकड्यांत ताचो उल्लेख कामरुपांतलें नरक शार असो सांपडटा, तर कांय कडेन वराह दोंगरा वयलो तो नरकासुराचो किल्लो अशें म्हणलां. वराह दोंगर सध्याच्या पंजाब, सिंध ह्या वाठारांत येता. सोळा हजार बायलांक ताणें बंदखणींत घाल्लीं. सत्यभामेचे मजतीन कृष्णान सुदर्शन चक्र सोडून नरकासुराचो वध केलो, अशी कथा आसा. तर अशा ह्या नरकासुराचीं व्हडलीं आकर्शक बावलीं करून गोंयकार रात जागयतात. त्या वेळार सावंड बाॅक्सांच्यो वण्टी उब्यो करून रातभर संगीत वाजोवपाची प्रथा कांय वर्सां सावन चलता. 30- 40 वर्सां पयलीं हें फॅड नाशिल्लें. चडशे धोल, ताशे, लातां बडयताले. व्हडल्यान आरड, किंळच्यो मारताले. फांतोडेर नरकासूर लासतना फोग लायताले. मात, तंत्रज्ञानाची उदरगत जायत गेली, तशे नरकासूर सुदरतलेच, पूण रात जागोवपाक व्हडल्यान संगीत वाजोवपाची, नाचपाची पद्दत सुरु जाली. संगीत तरी कसलें तर इंग्लीश वा फक्त पश्चिमी वाद्यसंगीत. अत्याधुनिक वाद्यां वापरून केल्लें संगीत, यंत्रणेक लागून तें आयकतना काळीज उखलता. गाडी, इमारत थरथरता. धर्मीक म्हत्व आशिल्ल्या देशी दिवाळेच्या उत्सवांत हें विदेशी संगीत कित्याक अशें कोणाकूच दिसना काय? झेम येवंक जायना म्हूण वांगडा चिकन आनी थंड पेयांय आतां भुरग्यांच्या पोटांत वतात. तरणाट्यांचो मेनू अर्थांत वेगळो आसता. राजकी फुडाऱ्यांच्यो देणग्यो मेळपाक लागिल्ल्यान नरकासूर फुल्ल्यात, मातल्यात. वाड्यार एकाच्या जाग्यार चार- चार नरकासूर दिसपाक लागल्यात. गांव व्हडलो आसल्यार पन्नाशेक नरकासुरांक मरण ना. ते रातीं हजारांनी लोक नरकासूर पळोवपाक गाडयो घेवन भोंवतात. पणजे, मडगांवां तर जात्राच भरता. नरकासुराक लागून कलाकारांचे प्रतिभेक वाव मेळटा, भुरग्यांची उमेद भागता, वेवसायिकांक काम मेळटा, मनोरंजन जाता ही गजाल खरी. पूण आवाजाच्या प्रदुशणाक लागून सोंसू नजो अशे त्रास जातात, ताचें कितें? रातीं 10 उपरांत संगीत बंद करून वा पन्नास मिटर वाठारा पुरतेंच आयकूंक येतलें, अशा आवाजांत तें लावप शक्य ना? आतां डिसेंबरांत दर्यादेगांचेरुय हेंच जातलें. पर्यटनाच्या नांवान गोंयकारांचे भलायके कडेन हो खेळ चल्ला, अशें तुमकां दिसना?
मदल्या काळांत कांय विशिश्ट विचारसरणेच्या व्यक्तींनी नरकासूर बंद जावचे म्हूण हर तरेचे यत्न केल्ले. मडगांवां बाॅम्ब फुटून एकल्याक मरणूय आयिल्लें. अजून हो विरोध कायम आसा. तो कृष्णा बदला नरकासुराक म्हत्व दिता म्हूण जाता काय आवाजाच्या प्रदुशणाक लागून तें कळना. अंदूं कांय जाणांनी कृष्णाच्यो व्हडल्यो मुर्ती केल्ल्यो. ताचे हस्तुकीं बाण सोडून नरकासुराची गोमटीय उडयिल्ली. नरकासूर ही गोंयचे दिवाळेची वळख. म्हणटकच ताचेर बंदी घालची अशें कोण म्हणचो ना आनी म्हणलें तरीय ते बंद जातलेच अशें ना. मात नरकासूर म्हणल्यार आवाज प्रदुशण अशें समीकरण जालां, तें घातक थारूं येता. नरकासूर उबे जाल्ले थंय रावपी लोक, ते पळोवपाक भोवपी रसिक हें मान्य करतले. तेन्ना सरकारी यंत्रणांनी आनी मुखेल म्हणल्यार आयोजकांनी, तांकां अर्थीक फाटबळ दिवप्यांनी ह्या धुमशेणांचेर विचार करचो. धर्मीक लोकांचो नरकासूर प्रथेक विरोध आसाच, मुखार हेर लोकूय विरोधांत वच्चे न्हय, हाची जतनाय उमेदी, उत्साही, कलाकार तरणाट्यांनी घेतल्यार बरी.