नरकासूरा रे नरकासूरा

भांगरभूंय | प्रतिनिधी

नरकासूराचें काम निमण्या पांवड्यार

मध्यानराती उपरांत संगीत वाजोवपाक बंदी

आयज मळ्यांत नामनेच्या डीजेंचो ईडीएम

भांगरभूंय । प्रतिनिधी

पणजी : दिवाळी म्हणली काय कुलकुल्याचें शीं… नरकासूरा वांगडा रात जागयतना धग घालून बसपी भुरगीं… घडये गांवांनी नरकासूर थंडेंत कुडकुडटा आसात, पूण शारांनी हालींच्या वर्सांनी गरमेचो धग बसता. हवामान खात्याच्या अदमासा प्रमाण, गोंयाचेर फुडले दोन दीस पावसाचें सांवट आसा. पावस नासलो तरी गरमेचें ल्हार मात जाणवता…. अश्या समयाचेर दिव्यांचो उत्सव, दिवाळी एका दिसाचेर येवन तेंकल्या. वाड्यावाड्यार नरकासूर उबे रावपाक लागल्यात…. आयज रातभर (सरकारान 12 मेरेन परवानगी दिल्या.) संगिताच्या तालार नरकासूर जागतले… फांतोडेर तांचें दहन जातलें

नरकासूर लासोवन फाल्यां फातोडेर गोंयभर दिवाळी मनयतले. गोंयांत नरकासूराची रात फुलोवपा खातीर तरणाटे नेटान कामाक लागल्यात. खूब कडेन नरकासूराचें काम निमाण्या पांवड्यार पावलां. मजगती, नरकासूराचे रातीक व्हड आवाजांत चलपी संगिताचेर सरकारान मर्यादा घातल्या.

पणजी वाठारांत नरकासूर करपा खातीर उमेदीचें वातावरण आसा. आयज सांज मेरेन कशे भशेन नरकासूर बेगिनांत बेगीन तयार करपा खातीर कश्ट घेतात. खूब कडेन नरकासूराचें काम निमण्या पांवड्यार पावलां जाल्यार कांय जाणांचो नरकासूर अजून तयार जावंक ना.

अंदूं खूब जाणांक नरकासूर तयार करपाक मात्सो कळाव जाला. पयलीं दसरो सोंपले उपरांत रोखडेच नरकासूराक हात घालताले. पूण हे खेपे परिक्षा उसरां सोंपिल्ल्यान भुरग्यांक फावो तितलो वेळ मेळूंक ना. वेळ उणो आसून लेगीत भुरग्यांनी नरकासूराक हात घातलो खरो, पूण मदींच आडवेळ्या पावसान मेहनतीचेर उदक रकयलें. ताका लागून नरकासूर धांपून उरले.

आतां वातावरण नितळ जाल्ल्यान नरकासूराच्या कामाक नेट आयला. नरकासूराच्या सांगाड्यांक कागदां दसोवन जाल्यात आनी तांचेर रंग मारपाचें काम शेनवारा सांजे सावन नेटान चल्लां. आयज दनपार मेरेन रंगाचेर निमाणो हात मारून नरकासूर तयार जातले. पूण कांय जाणांनी दोन दिसा पयलीं नरकासूराचें काम हातांत घेतिल्ल्यान अजून दसयिल्लीं कागदां अजून सुकूंक नात. कितेंय जालें तरी आयज सांज मेरेन नरकासूर तयार करचेच पडटले.

सांतिनेज वाठारांतलो नरकासूर तयार करपी थळाव्या तरणाट्यान सांगलें, तांकां फावो असो वेळ नरकासूर तयार करूंक मेळूंक ना. देखून आतां नरकासूर तयार करपाक बोवाळ जालो.

दिवाळेच्या एका सप्तका पयलीं आमी नरकासूर तयार करपाक सुरवात केल्ली. पूण भुरग्यांचीं कामां आनी परिक्षेक लागून पयले दोन दीस फुकट गेले. मदीं-मदीं सांजवेळार मात्सो वेळ काडून आमी नरकासूराक आकार दिलो. वेळ खुबूच उणो उरिल्ल्यान फाटल्या दोन दीस आमी सांजे सावन फांतोडे मेरेन जागे रावन नरकासूर तयार करतात. नरकासूर करतना आमकां भुकेचो वा सकाळीं कामाक वयपाचो हुस्को मातूय सतयना, अशें तरणाट्यांन सांगलें.

नरकासूराची रात ही सासणाची उगडासाक उरची म्हूण शारांतल्या वेगवेगळ्या वाठारांनी संगिताची कार्यावळ आनी लायट शो करपाची तरणाट्यांनी तयारी केल्या. भुरग्यांचो एक वेगळोच पंगड हाची तयारी करपांक व्यस्त आसा. कोणाचे संगीत सगल्यांत व्हड आवाजाचें आनी कोणाच्यो लायटी कितल्यो ‘पावरफूल’ हाची नरकासूर करपी पंगडा मदीं सर्त चल्ल्या. मळ्यांतल्या एका नरकासूर करपी पंगडान आयज सांजे ईडीएम आयोजीत केल्या. ह्या ईडीएमांत गोंयचे तशेंच गोंया भायल्या राज्यांतले नामनेचे डीजे म्युझीक वाजोवपाचे आसात.

व्हड आवाजांत चलपी म्युझीक फांतोडे मेरेन नरकासूराक मारी मेरेन चालूच आसतात. हे खातीर थळाव्यांक हो एक दीस आकांताचो वता. चड करून जाण्ट्या लोकांक. खूब जाण काळजाचे दुयेंती आसतात. ह्या संगिताक लागून तांची भलायकी इबाडपाची शक्यताय आसता. गोंय प्रदुशण नियंत्रण मंडळान ह्या म्युजिकाचेर खर निर्बंध घातल्यात. मंडळान म्युझीक वाजोवपाच्या वेळाचे मर्यादेंत कसलीच वाड करूंक ना. म्युझीक वाजोवपाची मर्यादा रातच्या 12 वरांनूच दवरल्या. जर कोण 12 वरां उपरांत म्युझीक वाजयता जाल्यार पुलिशेंत कागाळ करची, तांचेर कारवाय जातली, अशें प्रदुशण नियंत्रण मंडळाच्या वरिष्ठ अधिकाऱ्यान सांगलां.