भांगरभूंय | प्रतिनिधी
गोंय प्रदुशण नियंत्रण मंडळाची म्हायती
भांगरभूंय । प्रतिनिधी
पणजीः नरकासूराचे राती कडेन आवाज प्रदुशणाच्यो कसल्योच कागाळी गोंय प्रदुशण नियंत्रण म्हामंडळा कडेन येवंक ना. हे विशीं उल्लंघन जाल्यार पुलिसांनी ताची दखल घेवन कारवाय करपाची तांची जापसालदारकी आशिल्ली. पूण आवाजाक लागून कायद्याचें उल्लंघन जाल्याची घडणूक नदरेक येवंक ना, अशें मंडळाचे अध्यक्ष महेश पाटील हांणी सांगलें.
नरकासूराचे रातीर सावंड सिस्टीम लायतना खर निर्बंध घातिल्ले. पणजे नरकारसूराचे राती व्हड आवाजांत म्युझीक लावपाच्या प्रकाराची गोंय मनीस हक्क आयोगान दखल घेवन सगळ्या पणजेच्या नरकासूर पंगडांक 10 मेरेन म्युझीक बंद करपाचो आदेश दिल्लो आनी कायद्याचें उल्लंघन जाल्यार पुलिसांक कारवाय करपाचे आदेश दिल्ले. पूण कांय सुवातांचेर हें म्युझीक उसरां मेरेन चालू आसलें आनी भुरगीं तशेंच जाण्ट्यांक रातचो न्हिदपाक त्रास जावपाक लागलो. कागाळी करून लेगीत पुलिसांनी कसलीच कारवाय करूंक नाशिल्ल्यान त्या त्या सुवातां वयल्या लोकांक दुसऱ्या थळार वच्चें पडलें. जाल्यार कांय सुवातांचेर रातच्या 12 वरां उपरांत पुलिसांनी कारवाय करून म्युझीक बंद उडयलां, अशी म्हायती मेळ्ळ्या.
हे विशीं गोंय प्रदुशण मंडळाचे अध्यक्ष महेश पाटील हांचे कडेन संपर्क केलो तेन्ना तांणी सांगलें, आवाज प्रदुशणाच्यो कागाळी थेट मंडळा कडेन येनात. हें पुलिसांचें काम आनी कागाळी आयल्यार तांणी कारवाय करपाक जाय.
आवाजाचेर नदर दवरपा खातीर मंडळा कडल्यान पुलिसांक मजत मेळटा. ते भायर ह्या व्हडान वाजपी आवाजाचेर देखरेख दवरपा खातीर पुलिसां कडेन फावो तशी यंत्रणा आसा. आवाज प्रदुशणाचें उल्लंघन जालें जाल्यार पुलिसांनी तांचेर कारवाय करची, अशे स्पश्ट निर्देश तांकां दिल्यात, अशें पाटील हांणी सांगलें.
आवाजाचेर देखरेख दवरपा खातीर आमी आमचे कर्मचारी नेमल्यात. पूण आवाज मर्यादेचें उल्लंघन जाता काय ना हें पळोवप जिल्होधिकाऱ्याची जापसालदारकी. उत्तर गोंय आनी दक्षीण गोंयांत आमचे कर्मचारी आसात. जर तांकां दिसता आवाजाचें उल्लंघन जाता जाल्यार जिल्हो कार्यालयां कडेन तांणी संपर्क करचो, आमचे कर्मचारी यंत्रणे सयत हजर रावतात, अशी म्हायती पाटील हांणी दिली. रातच्या 12 वरां उपरांत म्युझीक लावपाक परवानगी दिवंक नाशिल्ली. ते खातीर म्हाका दिसना आवाज प्रदुशणाक लागून नेम उल्लंघनाच्यो घडणुको नोंद जाल्यात आसतल्यो, अशें पाटील हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
